Alicante, Benidorm, Albir og Calpe

Eitthvað fyrir alla, menning, mannlíf, strandlíf, slökun.

Svæðið býður uppá fjörugt skemmtanalíf, mikla matar- og vínmenningu og veðursæld. Það er ekki hægt að biðja um meira.

Verðdæmi má sjá hér til hliðar. 

Í hjarta Costa Blanca héraðsins á Spáni finnur þú Alicante. Þaðan liggja vegir til allra átta en akstursfjarlægð til Valencia er um 90 mínútur og um fimm klst. til Barcelona.
Benidorm, Albir og Calpe státa af allri þeirri þjónustu sem hugsast getur.
Standlengjan við borgina er yfir 7 km löng, mjög falleg og breið.

Alicante borg og sumarleyfisstaðirnir Benidorm, Albir og Calpe. 

Fjölbreyttir skemmtigarðar eru í næsta nágrenni og aðstæður til íþróttaiðkunar eru á hverju strái. Strandlíf og slökun er ekki eina sem svæðið býður uppá. Í og við Alicante er hægt að finna fjölda áhugaverða safna, skemmtilega markaði að hætti innfæddra og heimsþekktar verslanir. Einnig eru ýmsar sögulegar minjar sem skemmtilegt er að kynna sér.

FJÖLBREYTTAR SKOÐUNARFERÐIR

Sérstætt fjallaþorp með aðeins um 200 íbúum. Yfir tvær milljónir ferðamanna heimsækja þorpið á hverju ári sem gerir Guadalest að einum fjölsóttasta ferðamannastað Spánar.

Það er mjög tilkomumikið að aka leiðina upp að Guadalest. Ekið er sem leið liggur framhjá "Terra Mitica"-skemmtigarðinum og afleggjaranum niður til Benidorm og beint upp til fjalla. Vegurinn til Guadalest er bugðóttur utan í bröttum hlíðum fjallsins en malbikaður. Að aka þessa leið er mjög eftirminnilegt.

Í Guadalest-þorpinu er gamalt Máravirki frá 8. öld. Það er byggt á kletti í um 900 metra hæð yfir sjávarmáli. Kastalarústirnar er til vitnis um stormasama sögu þess. Þræða þarf um fimm metra löng göng í gegnum klett til þess að komast að elsta hluta þorpsins. Efst trónir kirkjugarðurinn sem býður upp á einstakt útsýni yfir Guadalest dalinn og nærliggjandi sveitir. "Peñon de La Alcalá" turninn var notaður til að fylgjast með mannaferðum í dalnum fyrir neðan.

Einnig er að finna tvö söfn í þorpinu. Þau heita smámunasafnið "Belen" og pyntingasafn. Safnið er með lítil dúkkuhús til sýnis með öllum smáatriðum. Á hæðinni fyrir ofan er búið að útbúa stórt fjallaþorp úr þessum litlu húsum og öllu tilheyrandi.
Þorpsbúar eru svo frægir fyrir handverk. Þarna er hægt að nálgast handsaumaða dúka, körfugerð og barnaföt. Vörurnar eru í verslunum sem eru við þröngar götur þorpsins. Þær eru höggnar inn í bergið.

ALTEA

Altea er yndislegur bær í nágrenni Calpe. Allir sem koma til Spánar ættu að heimsækja Altea. Gamli bærinn stendur uppá hæð sem áður fyrr gerði þorpsbúum kleift að sjá til sjóræningjana. Þeir komu oftast frá Ibiza eða Mallorca og gerðu mikinn óskunda á meginlandinu.
Bærinn er þekktur fyrir kirkju sem er rómuð fyrir fegurð. Gamli bærinn byggist í kringum hana. Það er einstaklega notalegt að ganga um litlu steinlögðu göngugöturnar þarna í kring (háir hælar geta reynst hættulegir). Rétt við kirkjuna er útsýnispallur þaðan sem sést yfir til Benidorm og Calpe.
Fjöldi smáverslana selja listmuni, skartgripi og leðurvöru við þröngar götur þorpsins. Í júlí og ágúst er starfræktur markaður á kirkjutorginu. Tilvalið er að fara til Altea seinnipartinn og ná ljósaskiptunum. Í lok dags má bregða sér á einn á veitingastöðum þorpsins.
Auk ofangreindra skoðunarferða er hægt að velja úr ferðum með enskumælandi fararstjórum á svæðinu.

Hægt er að fara í köfun, hjólaferðir og hestaferðir. Jeppasafaríið og tvíbolungssiglingin eru einnig mjög spennandi kostir. 

JEPPASAFARÍ

Ferðin inniheldur heilan dag af ævintýrum og fjöri á meðan ekið er í gegnum fallega, óheflaða og græna sveitina á Costa Blanca. Keyrt er um fjöll og dali og stoppað við gömul og gleymd þorp, djúp gljúfur, grænblá lón og skóga. Í hádeginu er val um að kaupa sér 3ja rétta máltíð á mjög góðu verði á ekta fjallaveitingastað eða koma með eigið nesti. Við mælum með "náttúrulegu sturtunni" hjá Algar-fossum til að þvo í burtu allt rykið áður en lagt er af stað til baka.

TVÍBOLUNGSSIGLING

Risastór tvíbolungur (C-atarman) bátur sem bókstaflega flýgur yfir hafið. Hvað gæti verið betra? Í þessari ferð er siglt úr höfn í Altea. Gamli bærinn, falleg fjöll Sierra Bernia, Ferrer og Aixortá blasa við. Þá er farið í Sierra Helada-fjallgarðinn. Þarna er nægur tími til sunds á köfunarsvæðum en sundgleraugu og öndunarpípur eru til staðar á bátnum. Hægt er að skoða undur neðansjávarheimsins í þessari einstöku ferð. Við heimkomuna bíður hlaðborð eftir farþegum ásamt hressandi glasi af heimatilbúnu sangria, sem er innifalið í verði.

Úrval af skemmtun og afþreyingu fyrir fólk á öllum aldri.

Terra Mitica-skemmtigarðurinn Fjör fyrir alla fjölskylduna
Stærsti og skemmtilegasti garður í Evrópu! Stórkostlegir rússíbanar af öllum stærðum og gerðum, sýningar á hverju strái, sjóræningjar, skylmingaþrælar og ýmislegt fleira, meðal annars stórfenglegar leiksýningar á kvöldin. Frábær skemmtun fyrir unga sem aldna.
Vegalengd er ca 25-35 km frá flestum gististöðum á Calpe.

Aqualandia  Vatnsrennibrautagarður í heimsklassa
Big Bang eða Kamikaze? Báðar rennibrautirnar? Ekkert mál, þær eru hver annarri betri í þessum frábæra garði. Stórskemmtilegt lón er í garðinum þar sem finna má svæði fyrir börn, og alla hina líka! Slettu úr klaufunum í Aqualandia, þaðan sem allir fara heim með bros á vör.
Vegalengd er ca 25-35 km frá flestum gististöðum á Calpe.

Mundomar Vatnaveröld og framandi dýralíf
Heillandi ævintýraland með fallegu sjávarlífi og framandi fuglalífi. Sjáðu dansandi höfrunga, sæljónin leika sér, páfagaukasýninguna og farðu með börnin í barnalandið. Og ekki gleyma hinu risastóra fiskabúri þar sem litadýrðin og fjölbreytnin er æðisleg. Frábær garður.
Vegalengd er ca 25-35 km frá flestum gististöðum á Calpe.

Terra Natura Glænýr náttúrulífsgarður
Engar sýnilegar hindranir á milli þín og dýranna. Sjáðu undur náttúrunnar með eigin augum á stórfenglegum sýningum og með snilldarlega útsettum atriðum. Í garðinum færðu tvo fyrir einn, þar er líka Aqua-Natura garðurinn, frábær vatnsrennibrautagarður þar sem þú getur skemmt þér og slappað af áður en þú snýrð aftur heim í sólskinsskapi.
Vegalengd er ca 25-35 km frá flestum gististöðum á Calpe.