Skoðunarferðir

Akrópólis og Akrópólissafnið 

11.október
Hálfsdagsferð þar sem við byrjum á því að keyra um borgina til að skoða m.a. háskólabyggingarnar, skiptingu varðanna fyrir framan gömlu konungshöllina og fyrsta ólympíuleikvang okkar tíma. Næst höldum við upp á Akrópólis þar sem við skoðum hofin 3 sem þar standa, hof sigurgyðjunnar vængjalausu, Erekþeifshofið og fallega Meyjarhofið sem er þeirra frægast. Eftir góða stund uppi á hæðinni göngum við að Akrópólissafninu sem á hverju ári er kosið eitt af fallegustu söfnum í heimi. Þar skoðum við allt það helsta sem safnið hefur upp á að bjóða.  

Verð á mann: 13.900 kr
Innifalið í verði: Rúta, aðgöngumiðar á fornleifar og safn, grískur leiðsögumaður og íslensk fararstjórn.  

Delfí

12.otktóber
Heilsdagsferð til frægustu véfréttar fornaldar sem er staðsett hátt upp í Parnasoss fjalli norður af Aþenu. Eftir tæplega 3 klst keyrslu og stuttu á stoppi í skíðabænum Arachova komum við til Delfí. Véfréttin er á stórkostlega náttúrufögrum stað og þar eru fornleifarnar og lítið safn skoðað. Þaðan er haldið inn í litla bæinn þar sem borðaður er hádegismatur. Eftir matinn er haldið til baka. 

Verð á mann: 15.900 kr
Innifalið í verði: Rúta, aðgöngumiðar á fornleifar og safn, hádegismatur, grískur leiðsögumaður og íslensk fararstjórn.  

Argolida

13.október
Heilsdagsferð til Argolissýslunnar þar sem best varðveitta útileikhús Grikklands stendur og forna borgin Mýkena gnæfir hátt uppi á kletti. Á leiðinni er stoppað hjá Kórinþuskurðinum og eftir að við erum búin að skoða leikhúsið og Mýkenu sem kom mikið við sögu í Ilionskviðu Hómers, keyrum við til litla bæjarins Nafplion sem er fræg fyrir að vera fyrsta höfuðborg hins frjálsa Grikklands. Þar borðum við hádegisverð og höldum síðan til baka. 

Verð á mann: 15.900 kr
nnifalið í verði: Rúta, aðgöngumiðar á fornleifar, hádegismatur, grískur leiðsögumaður og íslensk fararstjórn.  

Sigling

14.október
Yndisleg heilsdags skemmtisigling til þriggja eyja í Saróníska flóanum. Siglt er til Hydru sem er fræg fyrir litlu fallegu höfnina sína og það að þar eru engir bílar. Eftir gott stopp á þessum demanti, er siglt til Poros í gegnum dásamlegt sund á milli eyjarinnar og meginlands Pelópsskagans. Á Poros er stoppað stutt, en þaðan er siglt til Aeginu sem er stærst þessara þriggja eyja. Aegina er landbúnaðareyja og þaðan koma m.a. bestu pistasíuhnetur Grikklands. Frá Aeginu er svo siglt til baka til Aþenu. 

Verð á mann: 15.900 kr
Innifalið í verði: rúta, skip, hádegismatur og íslensk fararstjórn. 

Sounio

15.október
Hálfsdagsferð til suðurodda Attíkuskagans þar sem hof Poseidons stendur. Keyrt frá Aþenu í gegnum strandbæji borgarinnar og út með fallegri strandlengju til Sounio sem oft er kölluð Aþenska rivieran. Þar er hof Poseidons skoðað og staldrað um stund á kaffihúsi staðarins. Ferðin endar útá flugvelli.

Verð á mann: 8.900 kr
Innifalið í verði: Rúta, aðgöngumiðar á fornleifar, grískur leiðsögumaður og íslensk fararstjórn.  

Hagnýtar upplýsingar

FLUGVÖLLUR

Flogið er á Athens International Airport, ATH 

FLUG:

Flogið er með Icelandair

Farangur:

Leyfilegt er að taka með sér eina innritaða tösku ef flogið er á almennu farrými. Hún má að hámarki vega 23 kg og heildarumfang (lengd + breidd + hæð) má ekki vera meira en 158 cm, að meðtöldu handfangi og hjólum.
Hægt er að finna nánari upplýsingar um leyfilegan farangur á vefsíðu Icelandair. 

SAMGÖNGUR:

Hægt er að bóka rútu með VITA til og frá flugvelli.
Leigubílar: Eru þægilegur ferðamáti og þá er oftast auðvelt að finna, en þeir gulir að lit. Þegar um lengri vegalengdir er að ræða er gott að fyrifram semja um ákveðið verð eða fá upplýsingar hjá hóteli hvað verðbilið sé á slíkri ferð. Leigubílstjórar mega taka aðra farþega upp í bílinn.
Strætó: Vagnar í mismunandi litum ganga um bæina og út á strendurnar. Kynnið ykkur áætlun vagnanna  í þjónustumöppum Vita sem eru á hótelunum, starfsfólk í gestamóttökum er einnig reiðubúið til aðstoðar.
Bílaleigubílar: Rétt er að hafa í huga að væntanlegur ökumaður þarf að hafa gilt ökuskírteini og vegabréf.  Við árekstur þarf alltaf að kalla til lögreglu og fylla út skýrslu, bæði fyrir bílaleiguna og leigutaka.
Sýna þarf vegabréf og ökuskírteini þeirra sem ætlað að aka bílnum.  Mikilvægt er að bílaleigusamningurinn sé í bílnum, enda getur lögreglan sektað ökumann bílaleigubíls um allt að 1.500 evrur ef hann er ekki til staðar. Flestar bílaleigur hafa einnig aldurstakmark á leigutaka og er oftast miðað við 21 árs aldur.

TAX FREE:

Hægt er að fá virðisaukaskattinn endurgreiddan.

Endurgreiðslan skiptist í:
4% Nauðsynjavörur
8% Matur
18% s.s raftæki, föt, barnavörur, hjól og s.fr.

Lágmarksupphæð sem þarf að versla fyrir til að fá endurgreiðslu eru 90 evrur og nauðsynlegt að fá tilskilda pappíra merkta Tax Free og kassastrimil þegar varan er keypt. Fyllið í reitina nafn, heimilisfang, númer vegabréfs, bankareiknings eða kreditkortanúmer svo að endurgreiðslan skili sér rétt.
Fyrst þarf að innrita sig í flug. Vöruna þarf svo að hafa með sér til tollvarða á flugvelli auk kvittana, vegabréfs og brottfararspjalds til að fá pappíra stimplaða. Svo má pakka vörunni og fara með töskurnar í innritun. Inní fríhöfninni er svo þjónustuborð sem á stendur tax free. Þangað er farið með stimpluðu kvittunina og þá er hægt að fá endurgreitt. Ef þjónustuborðið er lokað eru pappírar settir í þar til gerðan póstkassa.

TÖLVUR OG INTERNET:

Flest hótel bjóða upp á aðgang að netinu, annaðhvort frítt eða gegn gjaldi. Einnig er frítt Wifi á mörgum börum og skemmtistöðum.
Bankar: Eru opnir frá kl. 08:00 til 14:30 mánudaga til fimmtudaga og frá 08:00 til 14:00 á föstudögum. Hraðbankar eru víða og mælum við með að nota þá sem eru tengd bankaútibúum. Hægt er að taka út peninga í hraðbönkum, en athugið þá að hafa PIN númer kortsins við hendina. Þegar kort eru notuð í verslunum getur komið fyrir að beðið sé um að sýna vegabréf eða ökuskírteini til staðfestingar og þar þarf ávallt að stimpla inn PIN.

GJALDMIÐILL:

Evra

GREIÐSLUKORT:

Tekið er við greiðslukortum víðast hvar en ekki allsstaðar. Ef kort týnist eða er stolið verður að loka því umsvifalaust með því að hringja í neyðarsíma greiðslukortafyrirtækja á Íslandi.

APÓTEK:

Bera nafnið Farmakio á grísku og eru auðþekkt á grænum krossi. Þau eru yfirleitt opin alla virka daga á sömu tímum og verslanir en þó er það aðeins breytilegt milli staða. Yfirleitt er auðvelt að nálgast lyf í apótekum við minni háttar kvillum.

LÆKNISÞJÓNUSTA: 

Ef grunur leikur á veikindum skal hiklaust leita til læknis. Sama á við ef slys verða. Ef óskað er eftir aðstoð læknis hringið í þjónustunúmer fararstjóra (eða neyðarsíma utan þjónustutíma). Bendum á starfsfólk í gestamóttöku hótelanna sem ávallt er tilbúið til að aðstoða gesti sína.

Allir sem hafa greitt ferðina með kreditkorti frá Mastercard eða Visa hafa sjúkrahústryggingu sem gild er á öllum einkasjúkrahúsum í Grikklandi, svo framarlega að sjúklingur sé ekki veikur áður en ferðin hefst eða veikindin séu krónísk.

MOSKÍTÓ:

Lifa á Krít og því er skynsamlegt að nota krem til varnar – ekki síst þegar rökkva tekur. Slík krem/úða er hægt að kaupa í apótekum og í flestum matvöruverslunum.  Við hvetjum alla til að leita hiklaust til læknis ef um slæm bit er að ræða.

HÓTEL OG UMGENGNI:

Á öllum gististöðum eru ákveðnar reglur um umgengni og mikilvægt að fylgja þeim. Yfirleitt er ætlast til að ró sé komin á um miðnætti. Ef gestir virða þessar reglur að vettugi er hætta á að þeim verði vísað frá gististaðnum. Ákveðnar reglur gilda einnig um umgengni í sundlaug og garði. Mikilvægt er að virða þessar reglur sem eru settar með öryggi gesta í fyrirrúmi.
Húsbúnaður í íbúðum. Hverri íbúð á að fylgja nægilegt magn af eldunaráhöldum og borðbúnaði miðað við fjölda í gistingunni. Ef eitthvað vantar uppá þá skal gera athugasemdir við starfsfólk í gestamóttöku.
Sum íbúðahótel taka tryggingargjald, 100 til 150 evrur á íbúð sem er svo greitt til baka daginn áður en farið er heim. Þetta er til tryggingar gegn hugsanlegum skemmdum og til að lyklum sé skilað á brottfarardegi.

ÞJÓRFÉ:

Samkvæmt lögum er þjórfé innifalið í verði, en samt er venja að skilja eftir um það bil 5-10% af heildarupphæð til þjóna, hreingerningafólks og bílstjóra, ef ánægja er með þjónustuna.

KRANAVATN:

Er drykkjarhæft en það bragðast ekki vel. Mælt er með að nota flöskuvatn til drykkjar og matargerðar.

RAFMAGN:

Er 220 volt. Hægt er að nota öll algengustu rafmagnstæki hér eins og á Íslandi.