Mercure Edinburgh City

Mjög vinsælt 3ja stjörnu hótel við aðal verslunargötuna í Edinborg Princes street í hjarta borgarinna. Frá veitingastað hótelsins og herbergjum sem snúa að götunni er einkar fallegt útsýni að Edinborgar kastala og lystigarðinum Princes garden. Hótel hét áður Ramada Jarvis Mount Royal.

Gestamóttaka , veitingastaður og bar eru á 2 hæð, en hægt er að taka lyftu frá jarðhæðinni. Veitingastaðurinn er vel þekktur í borginni bæði fyrir fyrirtaks mat og svo er útsýni alveg einstakt að kastalanum. Allt í kringum hótelið eru verslanir og gegnt Mount Royal er lítil verslunarmiðstöð með búðum og kaffihúsum. Ýmsir ferðamannastaðir eru í göngufæri og má þar nefna smáverslanir við George Street, pubbarnir í Rose Street og næturlífið í Grassmarket.

Tvær gerðir eru af herbergjum. „Standard herbergi snúa að bakhlið hótelsins og svo herbergi með útsýni að kastalanum, sem eru dýrari.  Kastalaherbergi eru öll uppgerð og með flatskjá. Öll herbergin eru ágætlega rúmgóð með sjónvarpi, kvikmyndarásum,  nettengingu og buxnapressu. Á herbergjunum er einnig hárþurrka og bakki með hraðsuðukönnu, te og kaffi.

Courtyard by Marriott

Mjög fallegt og þægilegt hótel á frábærum stað í hjarta borgarinnar, 10 - 12 mínútur frá Princes Street og Waverly-lestarstöðinni. Hótelið var opnað árið 2016.

Í hótelinu eru 240 vistarverur sem skiptast í herbergi sem rúma einn eða tvo fullorðna og fjölskylduherbergi sem rúma allt að fjóra. Innréttingar eru nútímalegar en jafnframt hlýlegar, viður er áberandi með ljósum og grænbláum litum. Teppi eru á gólfum. Hér skortir ekkert á nútímaþægindin, alls staðar er ókeypis þráðlaus háhraðanettenging, sími, 32 tommu flatskjársjónvarp með gervihnattarásum, loftkæling og kynding, lítill ísskápur, aðstaða til að laga kaffi og te, straujárn og strauborð. Öryggishólf gegn gjaldi. Á baðherbergi er sturta, hárþurrka og Nirvae Botanicals baðvörur. 

Hægt er að velja um morgunverð af hlaðborði eða aðeins heita rétti eða kalda og þá er sérstakur valkostur fyrir þá sem eru á hraðferð og hafa ekki tíma til að setjast niður. Á veitingastaðnum The Lantern Room er lögð áhersla á bæði staðbundna og alþjóðlega rétti, ávallt úr ferskasta hráefni í boði. Þar er afslappað andrúmsloft og það sama má segja um Lantern barinn og kaffihúsið þar sem hægt er að fá kökur jafnt sem koníak og aðra ljúffenga drykki.
Líkamsræktaraðstaða er í hótelinu, með nýjum tækjum og lóðum.

Gestamóttakan er opin allan sólarhringinn og þar er boðið upp á þvotta- og þurrhreinsiþjónustu og starfsfólk aðstoðar við miðakaup og ferðaupplýsingar. 

Courtyard by Marriott er nýtt hótel á frábærum stað í hjarta Edinborgar. Aðeins tekur 10 – 12 mínútur að ganga að Waverly-lestarstöðinni og það sama gildir um Princes Street verslunargötuna þar sem þekktar verslanakeðjur og sérverslanir standa í röðum. Fjöldi veitingahúsa og bara er í næsta nágrenni við hótelið og auðvelt er að komast með almenningssamgöngum að þeim kennileitum sem ekki eru í göngufæri.  

Leonardo Royal Haymarket

Leonardo Royal Haymarket er heillandi hótel á góðum stað í hjarta þessarar sögufrægu höfuðborgar Skotlands, Edinborg. Hótelið er á rólegum stað en þó aðeins í nokkurra mínútna fjarlægð frá öllu því helsta í iðandi borgarlífinu. Jafnframt er stutt í helstu samgöngur frá hótelinu.

Á hótelinu eru 282 herbergi sem skiptast í tveggja til þriggja manna herbergi og fjölskylduherbergi. Herbergin eru snyrtileg og rúmgóð. Þau eru innréttuð í notalegum breskum stíl. Veggirnir eru skreyttir fallegum málverkum og ljós viðarhúsgögn, fallegt gólfteppi og stillanleg lýsing gera vistarverurnar hlýlegar. Í öllum herbergjum er loftkæling, frítt internet, flatskjársjónvarp með úrvali af fjölbreyttum stöðvum, kaffivél, öryggishólf og skrifborð. Á baðherbergjum eru baðkar, sturta og helstu snyrtivörur.

Á hótelinu er afslappaður veitingastaður þar sem hægt er að panta klassískan enskan pöbbamat. Þar er einnig borinn fram morgunverður að hætti innfæddra (full English breakfast) ásamt fjölbreyttum valkostum af hlaðborði. Á hótelinu er einnig rólegur bar þar sem er gott að slaka á og fá sér nokkra drykki eftir matinn eða yfir daginn. Í næsta nágrenni við hótelið eru einnig fjölmargir frábærir veitingastaðir og barir sem hægt er að setjast inn á, njóta matar og drykkjar og hlaða batteríin eftir viðburðaríkan dag. Á Leonardo Royal hótelinu er herbergisþjónusta í boði sem er frábær kostur til dæmis ef gestir vilja panta mat til að njóta á herberginu sínu. Á matseðlinum eru til dæmis nokkrir girnilegir valkostir þegar kemur að eftirréttum.

Edinborgarkastalinn, Princes Street verslunargatan, dýragarðurinn og helstu ráðstefnuhallir og íþróttaleikvangar eru í næsta nágrenni við hótelið. Leonardo Royal er því er frábær kostur fyrir ferðamenn, hvort sem þeir leita að skemmtun, listum, menningu, íþróttum eða eru staddir í borginni vegna vinnu. Þeir sem hafa áhuga á að spila golf ættu svo endilega að skoða einhvern af hinum frábæru völlum sem eru í grennd við borgina.

Apex Waterloo

4ra stjörnu lúxushótel við Waterloo Place, sem er við endann á aðal verslunargötu Edinborgar,  Princes Street. Hótelið er nýtt, en í byggingu frá árinu 1819, einstaklega fallegt og vel staðsett.

Á hótelinu er gestamóttaka og inn af henni rúmgóður bar. Veitingastaðurinn er talinn með þeim betri í borginni og er með úrvali alþjóðlegra og skoskra rétta. Verslanir, barir og stór verslunarhús eru í göngufæri , einnig  helstu ferðamannastaðir borgarinnar eins og George Street, krárnar í Rose Street og næturlífið í Grassmarket.  Fimm mínútna gangur er að Royal Mile, eins fallegasta gata borgarinnar og þar liggur leiðin upp í Edinborgarkastala.

Á hótel Apex Waterloo eru 187 herbergi.  Þau eru fallega innréttuð í nútímalegum stíl, öll með síma, sjónvarpi með flatskjá, aðgangi að interneti, straujárni og straubretti, buxnapressu, öryggishólfi og hárþurrku, einnig bakka með hraðsuðukönnu, te og kaffi.

Crowne Plaza Edinburgh

Crowne Plaza er fallegt hótel á frábærum stað miðsvæðis í Edinborg. Hótelið er í fallegri byggingu sem er hönnuð í georgískum stíl. Stutt í menningu og listir, verslun og sögulega áfangastaði auk þess að vera stutt frá helstu samgöngum.

Á hótelinu eru í heildina 97 herbergi sem skiptast í tveggja og fjögurra manna herbergi. Herbergin eru björt, rúmgóð og snyrtileg. Veggir eru ljósmálaðir og hönnunin er klassísk og stílhrein en um leið hafa herbergin notalegt yfirbragð. Á gólfum eru teppi. Í öllum herbergjum er internet, flatskjársjónvarp, skrifborð og teketill. Baðherbergin eru snyrtileg, með sturtu og baðkari ásamt helstu snyrtivörum.

Á hótelinu er veitingastaður og bar. Veitingastaðurinn á hótelinu er á jarðhæðinni. Hann er opinn og skemmtilegur með léttri sumarstemningu allt árið um kring en hægt er að borða úti á veröndinni eða fá sér sæti á rólegum bar í anddyrinu. Hægt er að panta mat upp á herbergið ef stemningin er þannig að gestir vilja njóta máltíðar innan herbergisins. 
Barinn á hótelinu er opinn daglega og þar er gott úrval af viskíi og skoskum bjórum ásamt fleiri köldum og heitum drykkjum. Þar er einnig hægt að panta léttar máltíðir.

Á hótelinu er líkamsræktarstöð sem er vel búin öllu því helsta sem þarf til að halda rútínunni gangandi í fríinu. Einnig eru fjölmargir möguleikar til hreyfingar og íþróttaiðkunar í næsta nágrenni við hótelið. Hótelið er á rólegum stað í íbúðagötu en stutt er í helstu samgöngur og því er auðvelt að komast á milli staða, hvort sem förinni er heitið á flugvöllinn, lestarstöðina eða innanbæjar. 

Crowne Plaza Edinburgh er góður kostur fyrir þá sem ferðast til Edinborgar, hvort sem það er vegna vinnu, til að upplifa sögu og menningu eða einfaldlega til að versla.

Apex Grassmarket

Apex Grassmarket Hotel Edinborg er flott hótel á frábærum stað í hjarta gamla bæjarins. Stórbrotið útsýni til kastalans, líkamsræktarstöð, góður matur og stutt í allt það helsta sem laðar ferðamenn að borginni.

Á hótelinu eru 169 herbergi sem skiptast í tveggja til fjögurra manna herbergi og fjölskylduherbergi. Hægt er að sérpanta herbergi með svölum gegn aukagjaldi. Um er að ræða lúxusgistingu með góðum rúmum og frábærri aðstöðu til afslöppunar en herbergin eru sérstaklega innréttuð svo gestum líði notalega. Herbergin eru björt og ljósmáluð en á gólfum eru teppi. Húsgögn eru úr ljósum viði en litasamsetningin í herbergjunum er falleg og býður gesti velkomna. Frítt internet er hvarvetna á hótelinu en í herbergjunum má jafnframt finna flatskjársjónvarp, teketil og öryggishólf. Baðherbergi eru flísalögð en þar er sturta og ókeypis lúxus snyrtivörur.

Veitingastaðurinn á hótelinu er mjög góður og hefur unnið til verðlauna. Þar er boðið upp á morgunmat, hádegisverð og kvöldverð. Á matseðlinum eru ólíkir en girnilegir réttir en úrvalið er mismunandi eftir árstíðum. Andrúmsloftið á veitingastaðnum er gott og útsýnið þaðan er frábært. Á hótelinu er líka góður bar þar sem einnig er hægt að panta sér snarl. Í göngufjarlægð við hótelið eru fjölmargir góðir veitingastaðir og barir. Ef gestir kjósa sér að borða á herbergi sínu er hægt að panta herbergisþjónustu. Á hótelinu er jafnframt heilsulind með innisundlaug og sánu. Einnig er þar vel búin líkamsræktarstöð. 

Apex Grassmarket er frábær kostur fyrir ferðamenn með ólíkar þarfir. Hvort sem þú leitast eftir því að sökkva þér ofan í sögu og menningu borgarinnar, hoppa á milli verslana á Princes Street eða búa til minningar með fjölskyldunni hefur hótelið allt sem þarf fyrir notalega dvöl á góðum stað í borginni.