Gönguferð Toscana

Fjallastígar Garfagnanadalsins í Toscana

Uppselt

Þessi ferð er uppseld. Vinsamlegast hafið samband til að fá nánari upplýsingar. Hægt er að senda okkur tölvupóst á info@vita.is. Síminn er 570-4444.

Hafa samband

Myndagallerí

Fjallastígar Garfagnanadalsins í Toscana

03. - 10. júní 2019
Hefðbundinn taktur, tvö fjöll

Norðvestur Toscana er það svæði sem af mörgum er talið eitt best varðveitta leyndarmál Ítalíu. Þetta afskekkta hérað býður upp á einstaklega fjölbreytta náttúrufegurð. Stórbrotin fjallasýn blasir hvarvetna við, auðug flóra skartar sínu fegursta og mannlífið byggir enn á gömlum hefðum. Það eru liðin fjölmörg ár síðan Göngu Hrólfur bauð upp á gönguferð á þennan spennandi stað. Þá var gist nokkra daga í fjallaskála  La Quiete í Apuan-ölpunum. Nú bjóðum við nýja ferð á þessar slóðir og förum í skemmtilega göngu upp í þennan dal.                                                                                                      Lögð er áhersla á að kynnast héraðinu og fólkinu sem best. Fyrstu þrjár næturnar er gist á La Baita í fjallabænum Corfino hjá vinum okkar þeim Roberto, Möru og Martinu. Bærinn er í útjaðri Orecchiella-friðlandsins. Þar skiptist á svipmikið og klettótt fjalllendi, laufskrúðug skóglendi, grösugar sléttur og ávalar hæðir. Mjög takmörkuð byggð er í garðinum en dýralíf og blómskrúð því fjölbreyttara. Þar er gengið upp á bæjarfjallið Pania di Corfino og gamlar fjárhirðabyggðir heimsóttar. Síðan er farið á markað í bænum Castelnuovo og gengið um fallegar sveitir í dalnum þar til komið er að bændabýlinu La Costa þar sem gist verður næstu tvær nætur. Einnig er ekið um Garfagnanadalinn í gamalli lest og gengið um vínræktarhéröð. Að lokum er gist í skemmtilegum húsum í eyðiþorpinu Capanne di Careggine í uppgerðum húsum á gistiheimilinu La Ceragetta. Þaðan er gengið upp í eyðidalinn Puntato en þar var blómlegur seljabúskapur áður fyrr og ber landslagið þess merki.

Dagur 1. Keflavík - Corfino

Flogið frá Keflavík og lent á flugvellinum í Mílanó. Ekið eins og leið liggur til þorpsins Corfino (860 m). Þetta er um fimm tíma ferð. Af torgi bæjarins er frábært útsýni yfir Garfagnanadalinn. Á gistiheimilinu La Baita, þar sem gist verður næstu þrjár nætur, tekur Roberto hótelstjóri vel á móti hópnum . Hótelið er í útjaðri þjóðgarðsins Orecchiella og við rætur fjallsins Pania di Corfino (1606 m).

Dagur 2. Gengið frá Corfino upp á fjallaengi til Campaniana.

Við tökum því rólega um morguninn. Eftir síðbúinn morgunverð er gengið frá hótelinu eftir fornum stígum sem voru lagðir af fjárhirðum sem fluttu hjarðir sínar upp á fjallsengin á vorin. Þeir bjuggu í fjárhirðaþorpinu Campaiana yfir sumarið og gættu hjarðarinnar. Þar á engjunum breiðum við úr dúknum og snæðum ljúffengan lautarverð. Eftir matinn er haldið aðra leið til baka framhjá hinum spennandi brunni Fonte de Amor  Gengið í um sex klukkustundir. Hækkun 600m, lækkun 600m.

Dagur 3. Upp á topp á Pania di Corfino

Í dag er haldið frá La Baita að fjárhirðaseljunum í Pruno en þeim hefur nú verið breytt í sumarhús. Þarna undir vesturhlíðum Pania di Corfino í útjaðri Orecchiella-friðlandsins virðast fjallshlíðarnar ókleifar. En í skriðunum leynist skemmtilegur stígur upp á fjallið sem við leitum uppi og höldum alla leið upp á topp (1606 m). Þaðan er einstakt útsýni yfir Garfagnanadalinn og yfir til Apuan-alpanna. Eftir ljúffengan lautarverð er haldið niður af fjallinu eftir þægilegum stíg sem er umvafinn björtum beykitrjám. Síðdegis er ekki ólíklegt að Róberto bjóði upp á gönguferð um Corfino. Albergolabaita

Gengið í sex klukkustundir, hækkun og lækkun 800 m.

Dagur 4. Markaðsdagur ,Montalfonso og Barga

Það er komið að því að kveðja La Baita og halda með rútu niður til Castelnuovo sem er aðal verslunar- og viðskiptamiðstöð dalsins. Öld eftir öld komu bændur og iðnaðarmenn þangað með vörur sínar og afurðir og seldu á fimmtudagsmarkaðnum. Enn í dag eru allar götur og torg þakin ýmiskonar varningi á fimmtudögum og við notum tækifærið og sláumst í hópinn með heimamönnum. Í hádeginu gefst svo tækifæri til að bragða á framleiðslu héraðsins hjá Andrea sem rekur hinn sérstæða veitingastað Il Vecchio Mulino (Gamla myllan).  Eftir ljúffenga máltíð og skemmtilega göngu umhverfis bæinn og upp í kastalann  Montalfonso sem er fyrir ofan bæinn er haldið af stað til hins fallega miðaldabæjar Barga. Nýlega hefur „The Italian Touring Club“ veitt bænum appelsínugulan fána sem tákn um að hann sé„besti miðaldabær á Ítalíu“ Það er mikil viðurkenningu á fegurð og sérkennum bæjarins. Við gistum á hótel Pergola.

Dagur 5. Hæðirnar umhverfis Barga

Í dag höldum við frá hótelinu upp í hæðirnar fyrir ofan bæinn og göngum hálfhring umhverfis Barga. Við fylgjum gömlum stígum, skoðum fornar brýr, kirkjur, sérstæð þorp og smábæi og fáum fræðslu um þetta fallega og sögulega svæði. Jafnframt njótum við einstakts útsýnis á göngunni og sjáum Barga frá mörgum mismunandi sjónarhornum. Farið er um gil og skóga og elsta mannvirki svæðisins kirkjan La Lopa verður skoðuð. Þegar líður á gönguna sést til Apuan Alpanna sem ramma Garfagnanadalurinn  af í suðri á móti Appenínafjallgaðinum í norðri. Næsta dag liggur svo leiðin yfir í Apuan Alpana sem eru spennandi kalksteins- og marmarafjöll með mörgum frægum marmaranámum.  Áður en komið er aftur heim á hótel er bærinn Barga skoðaður og gengið  upp að kirkjunni San Cristoforo sem er merkilegasta miðaldakirkja svæðisins, hún stendur hátt og frá henni  er einstakt útsýni yfir bæinn og Serchiodalinn. Gengið um 14 km., hækkun og lækkun 450m

Dagur 6. Vínsmökkun, dalir og vínekrur

Við yfirgefum nú Barga og höldum með rútu  til Borgo á Mozzano sem er í neðri hluta Garfagnanadalsins. Þá er gegnið um einstaklega fallegar vínekrur í blómlegum dal. Göngunni lýkur við vín- og ólífubúgarðinn Macea. Þar búa miklir hugsjónamenn sem stunda lífræna ræktun af miklum eldmóð. Vínið sem er unnið úr sérstökum þrúgunum er einstaklega gott og við fáum að bragða á því með léttri máltíð.   Eftir notarlega heimsókn er ekið með lítilli lest til bæjarins Castelnuovo de Garfagnana og þaðan er hópnum ekið upp í eyðibæinn Capanne di Careggine sem er í hjarta Apuan Alpanna.  Þar hefur nokkrum húsanna verið breytt í skemmtilegt gistiheimili. Góð aðstaða er í húsunum og  íbúarnir snæða þar morgunmat en kvöldmatur verður á góðum veitingastað  skammt frá. Þeir sem vilja geta tekið sundsprett fyrir matinn. Gengið er í um þrjár klukkustundir.   Gist: La Ceragetta resort

Dagur 7.Puntato hringur     

Við höldum gangandi niður úr þorpinu  að vatninu Isola Santa, það er í raun uppistöðulón því fyrir um 60 árum var þorpinu Isola Santa sökt vegna stíflugerðar.Eftir að hafa skoðað okkur um og fræðst um sögu staðarins er haldið upp í móti og stefnt á annað eyðiþorp  Col di Favilla. Það er sérstætt að sjá hvernig hrunin og yfirgefin húsin standa á mjóum fjallshrygg. Brátt erum við komin inn í úfið landslag kalksteinsfjallanna þar sem finna má  fjölmargar marmaranámur,kastaníu- og beikiskóga, gömul engi og merki um fornan seljabúskap. Loka takmark okkar er dalurinn Puntato sem er í 1000 metra hæð. Þar dvöldu áður um 400 manns á sumrin með búfé sitt. Nú eru sum húsanna nýtt sem sumarhús og  fjallaskálar. Við heimsækjum einn þeirra Rifugio La Quiete.  Hér breiðum við úr dúknum og njótum sérstæðs andrúmslofts staðarins.  Síðan er haldið til baka að Isola Santa  og upp til Ceragetta framhjá gömlum marmaranámum og vatnsmillu.Göngutími 6 klst. Hækkun /lækkun 800 m lengd 10 km.

Dagur 8. - Heimferðadagur

Um hádegisbil  er lagt af stað til Mílano til að vera komin í góðum tíma en flogið verður um um kvöldmatarleitið.

Ath að þessi dagskrá getur breyst lítillega vegna veðurs eða af öðrum ástæðum

Sjá nánari ferðalýsingu

Uppselt

Þessi ferð er uppseld. Vinsamlegast hafið samband til að fá nánari upplýsingar. Hægt er að senda okkur tölvupóst á info@vita.is. Síminn er 570-4444.

Hafa samband
  • Veðrið

  • Flugtími

    Kef íkon mynd af flugvél MXP

    3:50

    Eftirmiðdagsflug

  • Gjaldmiðill

    Evra

    Gengi

Sjá Kortasýn Sjá gististaði

Við notum vefkökur (e.cookies) t.d. til að greina umferð um vefinn og til að bæta upplifun notanda á síðunni. Með því að halda áfram að vafra um síðuna samþykkir þú vefkökuskilmála VITA

Nánari upplýsingar um vefkökunotkun