fbpx Granada, Córdoba og Sevilla | Vita

Granada, Córdoba og Sevilla

Perlur Andalúsíu

UPPSELT

Þessi ferð er uppseld. Vinsamlegast hafið samband til að fá nánari upplýsingar. Hægt er að senda okkur tölvupóst á info@vita.is. Síminn er 570-4444.

Hafa samband

Myndagallerí

Sveipaðar dulúð, fegurð og leynd

7. - 14. maí
Fararstjóri  Kristinn R. Ólafsson 

ANDALÚSÍA er allt í senn: lífsnautn, listir, saga, menning, landslag..., dulúð, leynd, fegurð, sólskin, svalur skugginn, vínið glóandi, ólífuekrurnar, flamenkóið, gítarspilið, söngurinn, dansinn... Fönikíumenn, Tartessar, Rómverjar, Karþagómenn, Vestgotar, Márar og kristnir miðaldakóngar og drottningar erum eðal þeirra fjölmörgu sem komið hafa þar við sögu.
Og borgir og bæir sem heilla hver á sinn einstaka hátt. Þrjár perlur í þessari festi eru Granada, Sevilla og Córdoba.

 granada_almennt_4.jpg

GRANADA er án efa sú borg Andalúsíu sem sveipuð er hvað mestri dulúð, fegurð og leynd, borg andstæðna, háskólaborg með heimsborgarbrag sem ber þess þó skýr merki að hafa verið síðasta vígi Mára í Vestur-Evrópu. Ótrúlega rík af miðaldasögu og ekki má gleyma Alhambrahöllinni með sína Generalife-garðaþ Hver sem skoðar þennan stað gleymir því seint. Hér borgar sig að leyfa innsæinu að ráða ferðinni. Fikrið ykkur upp eftir ævagömlum steinlögðum strætum í Albaicín og njótið útsýnis yfir Realejo-hverfið þar sem hvítkölkuð hús og afgirtir garðar renna saman í hreint magnað púsluspil. Granada er falleg og ögrandi í senn, hrein og bein en samt svo leyndardómsfull þar sem hún situr sem fastast í skjóli Sierra Nevada-fjallgarðsins.
Hvívetna er að finna minjar frá ýmsum tímum mannskynssögunnar og því er nóg að skoða. Grafhýsi Ísabellu og Ferdínands, kaþólsku konungshjónanna, og dóttur þeirra og tengdasonar, þeirra Jóhönnu brjáluðu og Filippusar fagra, gamaldags krár örlátar á smætlur, tehúsin þar sem arabísk ungmenni hittast yfir vatnspípum og iðandi næturlíf sveipað uppreisnaranda ungu kynslóðarinnar.
Það er engin hætta á öðru en að Granada heilli þig upp úr skónum, svo margt hefur hún upp á að bjóða. Að koma orðum yfir hvað það er nákvæmlega við borgina sem nær þessum tökum á þeim sem til hennar koma er annað mál. En kannski skiptir það ekki öllu. Við mælum með því að þú leyfir þér að slaka á og njótir alls þess sem þessi ómótstæðilega borg hefur upp á bjóða.

granada_alhambra1_4.jpg  

SEVILLA er höfuðborg Andalúsíu. Þróttmikil og lifandi borg með heillandi göngugötum, tapas-börum, iðandi mannlífi og flottum verslunum. Fjölsóttasta hverfið og það sem ef til vill heillar mest er Santa Cruz – Helgakrosshverfi -, gamla gyðingahverfið, með þröngum steinlögðum götum og kalksteinshúsum. Í Helgakrosshverfi er hægt er að tylla sér niður fyrir utan bar, gæða sér á mat og drykk meðan blíðunnar er notið og fylgst er með heiminum líða hjá., eða rölt um aldagamla garða og sest á fallegan bekk.
Um borgina líður Guadalquivir-fljót hægum straumi.
Dómkirkjan er mikilfengleg á að líta og að rúmmáli stærsta gotneska kirkja veraldar. Upp úr kirkjunni stendur bænakallsturninn Giralda. Hann reistu Márar á 12. öld við mosku sem stóð á sama stað og dómkirkjan. Við hlið kirkjunnar er hallasamstæðan Los Reales Alcázares, byggð kristnum konungum en sem ber listfengi Mára gott vitni. Ein hallanna er glæsileg 14. aldar höll þar sem byggingarstíll Máranna blandast skemmtilega við kristin einkenni. Mikilfengleg að utan og heillandi að innan en bakveggir snúa að afar fallegum skrúðgörðum vöxnum trjám og skreyttum gosbrunnum. 

sevilla_almennt_medejar_pavilion.jpg 

CÓRDOBA er þriðji demanturinn af hinum dásamlegu miðaldaborgum Andalúsíu, ein fegursta og sögufrægasta borg héraðsins og alls Spánar. Súlnaskógurinn og rauðhvítir skeifubogarnir í stórmoskunni frá miðöldum, með hina kristnu dómkirkju, eins og skrattann úr sauðarleggnum, í miðju húsi, eru skínandi dæmi þessarar dýrðar. Og utandyra er glóaldingaður moskunnar en allt um kring hvít hús miðbæjarins með blómum skreytta inngarða sína og öngstrætin þar sem sól og skuggi bregða á leik.  Á steinlögðum strætunum og torgunum má nánast enn heyra fótatak allra þeirra snillinga sem settu svip sinn á staðinn allt frá tímum Rómverja.
Og skammt undan líður fljótið Guadalquivir fram. Engin furða þótt gamli borgarhlutinn hafi komist á heimsminjaskrá UNESCO 1984.
Höfuðborg Al-Aandalús-ríkis og kalífadæmis Mára sem réðust inn á Spáni 711. Það stóð jafnfætis Damaskus að ljóma í heimi múslíma: miðstöð lista, fræða og vísinda, mesta siðmenningarborg í Evrópu. Á tíundu öld, um það leyti sem Íslendingar stofnuðu Alþingi, er talið að íbúar hafi verið um hálf milljón. Á sama tíma voru Lundúnir rykugt smáþorp á bökkum Tempsár. Meðal þess sem Márar fluttu með sér til Evrópu voru hugmyndir um hina rómantísku ást, heimspeki, núllið í stærðfræði, aðferðir í læknisfræði og klassískar grískar bókmenntir sem fallið höfðu í gleymsku í Vestur-Evrópu.

cordoba_andalusia_3.jpg  

Dagskrá og ferðatilhögun 7. - 14. maí

Þriðjudagur 7. maí. Flogið til Alicante og ekið til Granada.
Flogið með Icelandair til Alicante. Brottför er kl. 8:00 og áætluð lending kl. 14:20. Ekið til Granada og gist á hótel Barcelo Allegro Granada í 2 nætur, en milli Alicante og Granada eru 350 km og áætlað að aksturinn taki um 5 klst.
Síðbúinn kvöldverður bíður gesta í Granada.
Máltíðir: M - K

granada_almennt_3.jpg  

Miðvikudagur 8. maí. Skoðunarferð Alhambra og Generalife-garðarnir.
Ekið um Granada-borg að hápunkti ferðarinnar, þ.e. heimsókn í Alhambra-höllina og Generalife-garðana frá tímum Mára. Við göngum þar á vit márískrar listar og austurlenskra lystisemda, sjáum m.a. hinn unaðsfagra Ljónahúsgarð og komum í Hásætissalinn þar sem við lítum sjöunda himin augum í lofti hinna sjö himna. Allsstaðar hjalar rennandi vatn í bunustokkum eða gýs úr gosbrunnum og er enn sama eyrnayndið og það var Márum forðum daga. Að baki gnæfa hin ægifögru Snæfjöll -Sierra Nevada.
Frá Alhambra er gengið niður af hæðinni að Konungskapellunni. Þar berjum við augum m.a. grafhýsi kaþólsku konungshjónanna, þ.e. Ísabellu og Ferdínands, og Jóhönnu brjáluðu, dóttur þeirra, og eiginmanns hennar, Filippusar fagra, Niðurlandaprins.
Ferðin endar þar
Kvöldverður á veitingastað í borginni og aftur gist á hótel Melia Granada.
Máltíðir: M - K

granada_almennt_5.jpg 

Þriðjudagur 9. maí. Granada - Córdoba.
Eftir morgunverð, eða kl. 9 er ekið til Córdoba á spænsku sem er ein fegurstu og sögufrægasa borg Andalúsíu og alls Spánar. Súlnaskógurinn og rauðhvítir skeifubogarnir í stórmoskunni frá miðöldum, með hina kristnu dómkirkju í miðju húsi, eru skínandi dæmi þessarar dýrðar. Og utandyra er glóaldingarður moskunnar en allt um kring hvít hús miðbæjarins með blómum skreytta inngarða sína og öngstrætin þar sem sól og skuggi bregða á leik. Á steinlögðum strætunum og torgunum má nánast enn heyra fótatak allra þeirra snillinga sem settu svip sinn á staðinn allt frá tímum Rómverja. Og skammt undan streymir Guadalquivir-fljót fram. Ekki furða þótt gamli borgarhlutinn hafi komist á heimsminjaskrá UNESCO 1984.
Milli Granada og Córdoba eru 208 km og við byrjum á hádegisverði.
Eftir það heimsækjum við  stórmoskuna, göngum um fallegu göturnar í elsta hluta bæjarins áður en ekið er á hótel AC Cordoba þar sem gist er um nóttina.
Kvöldverður á hóteli
Máltíðir: M - H - K

cordoba_andalusia_1.jpg  

Föstudagur 10. maí. Córdoba- Sevilla.
Frjáls morgunn og lagt af stað til Sevilla um kl. 9:00. Vegalengdin er 145 km og tekur um eina og hálfa klst.
Sevilla, höfuðborg Andalúsíu, er þróttmikil og lifandi borg sem hefur upp á margt að bjóða, m.a. byggingarlist, frábæran mat og skemmtilegar hátíðir. Vinsælasta hverfið fyrir ferðamenn er Santa Cruz, fegursta og mest heillandi hverfi borgarinnar. Þú getur þrætt þröngar steini lagðar götur milli kalksteinshúsa og tyllt þér niður fyrir utan bar, gætt þér á tapas og fylgst með heiminum líða hjá, eða rölt um aldagamla garða og tyllt sér á fallegan bekk. Santa Cruz-hverfið liggur að götunum Mateos Gago, Santa María la Blanca/ San José, sem og Murillo-görðunum með Reales Alcázares-höllinni. Í Santa Cruz stóð áður hverfi gyðinga, og sumar kirknanna vorubænahús gyðinga. Frá Patio de Banderas torgi er ógleymanlegt útsýni yfir dómkirkjuna í Sevilla. Dómkirkjan er mikilfengleg á að líta og að rúmmáli stærsta kristna kirkja veraldar. Við kirkjuna stendur kallturninn Giralda, sem márar reistu á 12 öld. Honum var síðan breytt í kirkjuturn með klukknaporti, en hann státar af 25 kirkjuklukkum og óviðjafnanlegu útsýni yfir borgina, svo það er vel þess virði að leggja á sig gönguna upp í 90 metra háan turninn.
Við hlið kirkjunnar er höllin Reales Alcázares, sem ber listfengi mára gott vitni. Þetta er gríðarstór og glæsileg höll þar sem byggingarstíll máranna blandast skemmtilega við kristin einkenni. Mikilfengleg að utan og heillandi að innan, því að þar eru hallargarðar og fallegir skrúðgarðar, gosbrunnar og appelsínu- og sítrónulundir. Aðalverslunargöturnar eru Sierpes og Tetuán, sem liggja samsíða. Við annan enda þeirra er La Campana og Plaza del Duque-torgið, þar sem El Corte Inglés er til húsa. Verslunarhverfið teygir anga sína inn í hliðargötur sem liggja í átt að Afalfa-torgi og nokkrar götur liggja í átt að Guadalquivir-fljóti. Á Sierpes og Tetuán eru yfirleitt bestu verslanirnar til að finna þekkt vörumerki og einnig eru nokkrar El Corte Inglés verslanamiðstöðvar í Sevilla.
Kvöldverður og gisting á hótel Melia Lebreros.
Máltíðir: M

  sevilla_almennt_1.jpg

Laugardagur 11. maí. Skoðunarferð um Sevilla.
Eftir morgunverð er farið í skoðunarferð um  borgina. Ekið að að Plaza de España, kórónu 20. aldar byggingarlistar í Sevilla. Arkítektinn Aníbal González, heimamaður, hannaði byggingu við torgið í tenglsum við  Íberamerísku sýninguna árið 1929.
Við sjáum og la Torre del Oro, Gullturninn, við Guadalquivir-fljót. Förum um í Santa Cruz-hverfið, en ferð um stræti þess er veisla fyrir öll skilningarvitin. Farið inn í dómkirkjuna og upp í Giralda turninn.
Gisting á hótel Melia Lebreros. 
Máltíðir: M

Sunnudagur 12. maí. Sevilla – Granada.
Morguninn er frjáls í Sevilla en um hádegi er ekið aftur til Granada þar sem eigum frí þann eftirmiðdag og um kvöldið.
Gisting á hótel Melia Granada

granada_almennt.jpg 

Mánudagur 13. maí. Gönguferð um Albaicin-hverfið.
Eftir morgunverð fer Kristinn fararstjóri með hópinn í skemmtilega gönguferð um Albaacín-hverfið og uppá útsýnisstaðinn San Nicolás borgina, en síðdegis ræður hver sínum tíma.
Um kvöldið er farið á veitingastað til að snæða kvöldverð og sjá flamenkósýningu. Aftur gist á hótel Melia Granada.
Máltíðir: M - K

granada_alhambra_4.jpg 

Þriðjudagur 14. maí. Granada -  Alicante - Heimferð.
Ekið frá Granada til Alicante. Áætlað að leggja af stað um kl. 11:30. Brottför flugs er kl. 20:50 og áætluð lending í Keflavík er kl. 23:20.
Máltíðir: M – H

granada_almennt_6.jpg  

Sjá nánari ferðalýsingu

UPPSELT

Þessi ferð er uppseld. Vinsamlegast hafið samband til að fá nánari upplýsingar. Hægt er að senda okkur tölvupóst á info@vita.is. Síminn er 570-4444.

Hafa samband
  • Veðrið

  • Flugtími

    Kef íkon mynd af flugvél ALC

    Morgunflug

  • Gjaldmiðill

    Evra

    Gengi

Gististaðir

Kort

Sjá alla gististaði
Sjá Kortasýn Sjá gististaði

Við notum vefkökur (e.cookies) t.d. til að greina umferð um vefinn og til að bæta upplifun notanda á síðunni. Með því að halda áfram að vafra um síðuna samþykkir þú vefkökuskilmála VITA

Nánari upplýsingar um vefkökunotkun