Atrion Resort, Agia Marina

Mjög gott hótel á frábærum stað í hjarta Agia Marina. Góð aðstaða fyrir alla fjölskylduna. Stutt er í veitingastaði, verslanir og aðra þjónustu. 
Í samstæðunni eru 52 nýuppgerð herbergi með stílhreinum, nútímalegum innréttingum, í dökkum við og hvítum og brúnum litum. Einnig eru 35 stúdíó sem eru nútímaleg, í dempuðum litum og með líflegum fylgihlutum. 

Ekkert skortir á þægindin, allar vistarverur eru með loftkælingu, stafrænu flatskjársjónvarpi með gervihnattarásum, öryggishólfi, ísskáp, síma og hraðsuðukatli. Matarkrókur er í stúdíóum með örbylgjuofni, kaffivél og hellum. Eldhúskrókur með öllu er í íbúðunum. Hárþurrka og ókeypis baðvörur eru á baðherbergjum. Svalir búnar húsgögnum eru við allar vistarverur og einnig þráðlaus nettenging sem fæst gegn vægu gjaldi, mismunandi eftir staðsetningu. Það þarf að greiða fyrir nettengingu á staðnum.  Athugið þó að nettengingin er oft fremur hæg.

Morgunverður og kvöldverður er borinn fram á hlaðborðsveitingastaðnum. Þar ættu allir að finna eitthvað við sitt hæfi því þar eru bæði bornir fram hefðbundnir grískir réttir auk alþjóðlegra. Barirnir eru tveir, annar í setustofunni og hinn við sundlaugina. Þar er snarl og léttir réttir í boði fram eftir degi auk svalandi drykkja. 

Hótelgarðurinn er gróðursæll og þar er hægt að taka góðan sundsprett í 40 metra laug á meðan börnin busla í sinni laug. Sólbaðsaðstaða er til fyrirmyndar, sólbekkir og sólhlífar. Leikvöllur fyrir börnin er á grænni flöt við hótelið og þar er einnig góð aðstaða fyrir foreldrana til að fylgjast með börnum sínum, nú eða taka þátt í leikjunum með þeim. 
Gestamóttakan er opin allan sólarhringinn, þar er töskugeymsla, bílaleiga og starfsfólk gefur leiðbeiningar um skoðunarferðir. 
Atrion er á góðum stað í hjarta Agia Marina, aðeins 30 metra frá ströndinni með gylltum sandi og tærum sjó. Stutt er í verslanir, veitingastaði og iðandi mannlíf og þeir sem hafa ekki eirð í sér til að fara snemma í háttinn þurfa ekki að örvænta því nóg er af næturklúbbum og börum í nágrenninu. 

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 1,5 EUR á mann á nótt. 

Oscar Suites and Village, Agia Marina

Fjölskylduvænt og vel staðsett íbúðahótel með fyrirtaks íbúðum. Hótelið er í hjarta Agia Marina, í léttu göngufæri við Platanias. Stutt á strönd, verslanir og veitingastaðir allt um kring. Nútímaleg hönnun og umhverfisvernd haldast í hendur á þessu fallega hóteli. 

Í hótelinu eru 60 smekklegar og rúmgóðar íbúðir. Stúdíó rúma tvo til þrjá einstaklinga, íbúðir með einu svefnherbergi rúma fjóra og íbúðir með tveimur herbergjum og tveimur baðherbergjum eru á tveimur hæðum og rúma allt að fimm. Innréttingar eru stílhreinar og nútímalegar, í dökkum við og björtum litum. Flísar eru á gólfum. Allar vistarverur eru búnar loftkælingu, flatskjársjónvarpi með gervihnattarásum og síma. Í eldhúskrók er ísskápur, örbylgjuofn, hellur, kaffivél, hraðsuðuketill og tilheyrandi áhöld. Á baðherbergjum er hárþurrka og sturta. Verönd eða svalir eru við allar íbúðirnar. Þráðlaus nettenging er gestum að kostnaðarlausu.

Morgunverður er borinn fram á veitingastaðnum Valentino Pasta & Grill og samanstendur af bæði heitum og köldum valkostum. Í hádeginu er boðið upp á létta rétti og sælkerarétti af matseðli á kvöldin. Áhersla er á ferskt hráefni af heimaslóðum, lífrænt ef kostur er, og matreiðslan er fjölbreytt, grísk í bland við alþjóðlega.

Litrík blóm og pálmatré prýða hótelgarðinn og þar eru tvær sundlaugar, báðar með afmörkuðu svæði fyrir börn. Sólbekkir og sólhlífar eru kringum sundlaugarnar. Snarl- og drykkjabar er í garðinum með úrvali ljúffengra veitinga.
Ágæt líkamsræktaraðstaða er í hótelinu, með nýjum tækjum, og hægt er að panta nudd. 

Oscar Village er á frábærum stað í Agia Marina, rétt við gyllta sandströndina. Verslanir og veitingastaðir eru í næstu götum og miðbær Platanias er í léttu göngufæri. Strætó sem gengur til næstu bæja stoppar fyrir utan hótelið. Hægt er að leigja bíl á hótelinu og þar er þvotta- og þurrhreinsiþjónusta.

Þess má geta að þegar hótelið var gert upp árið 2013 var áhersla lögð á fallega hönnun og umhverfisvæn byggingarefni og endurvinnslu.

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 3 EUR á mann á nótt. 

Ilianthos Village - Agia Marina

Ilianthos Village er fallegt íbúðahótel á baðströndinni Agia Marina sem hefur hlotið viðurkenningar hreinleika og fjölbreytt úrval vatnasports. Stutt er í verslanir, veitingahús og fjörlegt og skemmtilegt mannlíf á kvöldin.

Íbúðir á hótelinu eru 41, ýmist með einu eða tveimur svefnherbergjum með tvöföldum rúmum svo og setustofu með tveimur svefnsófum og rúma allt að 6 manns. Vel búin eldhúsaðstaða er í öllum íbúðum, setustofa og gott baðherbergi með baðkari. Íbúðirnar eru búnar loftkælingu, hárþurrku, síma, útvarpi, sjónvarpi, ísskáp (hægt er að sérpanta smábar), kaffigræjum, öryggishólfi og húsgögn eru á svölum.

Á hótelinu er veitingasalur þar sem boðið er upp á morgunverð. Hægt er að velja um tvo bari, aðalbarinn og sundlaugarbarinn. Á sundlaugarbarnum er hægt að fá snarl og ís auk heitra og kaldra drykkja.

Að sjálfsögðu er sundlaug við hótelið og einnig barnalaug svo og sandströnd með sólbekkjum og sólhlífum. Greiða þarf fyrir sólbekkina á ströndinni. Netsamband er í „nethorninu" og aðgangur er bæði að spilaherbergi og líkamsræktaraðstöðu. Nuddpottur er á sundlaugarsvæðinu og einnig er hægt að komast í sána, greiða þarf sérstaklega fyrir bæði nuddpottinn og sauna. Borðtennis- og billjardaðstaða er á hótelinu og ýmsar vatnaíþróttir eru aðgengilegar beint fyrir framan hótelið. Séð hefur verið fyrir því að aðgengi fyrir fólk í hjólastólum er mjög gott.
Hægt er að panta bæði barnapössun og nudd og herbergisþjónusta er frá klukkan 8 á morgnana til miðnættis.

Hótelið er mjög vel í sveit sett. Það stendur alveg við ströndina og allt sem máli skiptir eins og verslanir veitingahús í göngufæri. Ekki tekur nema 20 mínútur að aka til Chania, 60.000 manna borgar á vesturhluta Krítar. Borgin hefur upp á allt það að bjóða sem hugurinn girnist, nútímalegar verslunargötur og gamlan borgarhluta sem hefur haldið sínu gamla feneyska yfirbragði og stíl, veitingahús, bari og skemmtistaði af öllu tagi auk kyrrlátra almenningsgarða fyrir þá sem það kjósa.

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 3 EUR á mann á nótt. 

Thalassa Beach Resort, Agia Marina

Thalassa beach resort í Agia Marina er rólegt hótel sem er eingöngu fyrir fullorðna. Glæsilegt útsýni er frá hótelinu yfir á Thodorou eyju. Hér má upplifa á eigin skinni hina frægu grísku gestrisni, í stuttri göngufjarlægð frá ströndinni og yndislegu veðurfari.

Á hótelinu eru 81 herbergi sem skiptast í tveggja manna herbergi og svítur. Herbergin eru fallega hönnuð en í þeim eru stórir gluggar sem hleypa birtunni inn. Á gólfunum er dökkt og hlýlegt parket, húsgögn eru úr ljósum við og veggir ljósmálaðir. Í öllum herbergjum eru loftkæling, internet, sjónvarp með gervihnattastöðvum, öryggishólf, lítill ísskápur og sími. Öllum herbergjum fylgja svalir með útihúsgögnum og frá sumum þeirra er fallegt útsýni út á hafið. Baðherbergi eru með baðkari og sturtu, helstu snyrtivörum, stækkunarspegli, síma og hárþurrku. 

Á hótelinu er veitingastaður þar sem pantaður er matur af girnilegum matseðli. Í hótelgarðinum er snarlbar þar sem hægt er að panta léttari rétti og fjölbreytta drykki, jafnvel án þess að fara upp úr sundlauginni. Á strandbarnum er svo hægt að fá sér gríska smárétti og auðvitað drykki. 
Hótelgarðurinn státar af fallegri sundlaug með frábæru útsýni. Við sundlaugina er hægt að sitja í notalegu umhverfi og spjalla eða fá sér eitthvað í svanginn. Sólbekkir og sólhlífar eru á sérstökum sólbaðssvæðum.

Þar sem engin börn koma á hótelið og lágmarksaldur er 16 ára er einstaklega rólegt þar og hótelið því frábær staður til að slaka aðeins á. Hægt er að fara í jógatíma við sundlaugina eða til dæmis sækja matreiðslunámskeið og læra að elda grískan mat. Á hótelinu er heilsulind þar sem er innisundlaug og hægt er að bóka nudd og aðrar meðferðir. Ýmis afþreying er á hótelinu, allt frá skipulagðri dagskrá á daginn til lifandi tónlistar við sundlaugina á kvöldin. Listasalur er á hótelinu og eru þar settar upp fjölbreyttar sýningar.

Í heildina er Thalassa beach resort gott hótel þar sem fullorðnir geta slakað á og notið þess að vera í fríi við sjávarsíðuna.

Iolida Beach, Agia Marina

Iolida Beach er flott fjögurra stjörnu íbúðahótel með öllu inniföldu í hjarta Agia Marina, vinsæls strandbæjar stutt frá Chania, aðeins fáein skref frá ströndinni.

Í hótelbyggingunum tveimur, sem eru tengdar með glergangi, blandast saman nútímaleg byggingarlist og þjóðleg einkenni og hún rennur óaðfinnanlega saman við umhverfið.  Við ströndina eru lágreistar byggingar, ein sundlaug og barnalaug, en handan við aðalgötuna er 9 hæða bygging ásamt sundlaug og barnalaug. Hótelið er tilvalið fyrir pör eða fjölskyldur sem vilja slaka á í friðsælu andrúmslofti. Tvær sundlaugar eru fyrir fullorðna og tvær fyrir börn.

Á hótelinu eru 139 íbúðir og stúdíó, mjög huggulega innréttað, með öllum nútímaþægindum eins og loftkælingu, sjónvarpi, netaðgangi, hárþurrku og öryggishólfi svo að fátt eitt sé talið.  Til að tryggja góðan nætursvefn er tvöfalt gler í gluggum. Á hótelinu eru tveir veitingastaðir þar sem hægt er að velja úr úrvali rétta og svo er að sjálfsögðu sundlaugarbarinn þar sem hægt er að velja úr fjölda drykkja og kokteilum allan liðlangan daginn.

Indigo Mare, Platanias

Falleg og þægileg íbúðasamstæða á frábærum stað nokkur skref frá ströndinni í Platanias, sem er líflegur bær með verslunum og veitingastöðum.

Í samstæðunni eru 88 rúmgóðar vistarverur sem skiptast í svítur og íbúðir sem rúma frá tveimur og upp í fjóra einstaklinga, allar með eldhúskrók. Innréttingar eru snyrtilegar og flísar eru á gólfum. Loftkæling og upphitun er í öllum vistarverum, einnig sími, flatskjársjónvarp með gervihnattarásum og öryggishólf. Eldhúskrókur er vel útbúinn, þar er ísskápur, hellur og allur nauðsynleg áhöld til að elda og matast. Á baðherbergjum er hárþurrka og ýmist sturta eða baðker. Þráðlaus nettenging er gestum að kostnaðarlausu. Við allar vistarverur er verönd eða svalir búnar húsgögnum.

Morgunverðarhlaðborð er í veitingasal en á kvöldin er annað hvort hlaðborð eða kvöldverður af matseðli sem samanstendur af 4 réttum og hefur hver réttur tvo mismunandi valkosti. Fer það eftir fjölda gesta á hótelinu hverju sinni hvort val er um hlaðborð eða af matseðli. Við sundlaugina er veitingastaður og bar og þar eru bornar fram steikur auk léttari rétta yfir daginn.

Sundlaug er við samstæðuna með sólbaðsaðstöðu og busllaug fyrir börnin. Auk þess eru aðeins nokkur skref niður á ströndina sem tilheyrir hótelinu og þar er nóg er af bekkjum og sólhlífum. Sérstakt leiksvæði er fyrir börnin. Billjarð- og borðtennisborð eru í hótelinu.

Gestamóttakan er opin allan sólarhringinn og þar er töskugeymsla og boðið er upp á gjaldeyrisskipti og strauþjónustu. Verslun er í samstæðunni og þar er hægt að kaupa hefðbundið hráefni og matvöru úr smiðju heimamanna, olíu, vín og annað ljúfmeti.

Indigo Mare íbúðasamstæðan er einstaklega vel staðsett á gullfallegri ströndinni í Platanias. Bærinn er líflegur, þar eru verslanir, veitingastaðir og barir á hverju strái og aðeins tekur nokkrar mínútur að rölta að aðaltorgi bæjarins. Við ströndina er hægt að stunda vatnasport ýmiss konar og um korter tekur að aka inn í Chania-borg þar sem er áhugavert að skoða gamla bæinn sem er einstaklega fallegur. 

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 1,5 EUR á mann á nótt. 

Omega Platanias Village, Platanias

Omega Platanias Villages er einfalt og þægilegt íbúðahótel, vel staðsett í Platanias og í göngufæri við ströndina. Nóg er af verslunum, veitingastöðum og börum allt um kring.

Hægt er að velja á milli stúdíó íbúða sem rúma tvo einstaklinga eða íbúð með einu svefnherbergi sem rúmar allt að fjóra. Allar íbúðirnar eru vel útbúnar með litlu eldhúsi með öllu tilheyrandi ásamt sófa, sjónvarpi, eldhúsborði og stólum, loftkælingu og öryggishólfi. Greiða þarf fyrir loftkælingu á staðnum en öryggishólf er án gjalds. Íbúðirnar eru þrifnar 6 sinnum í viku, skipt er um handklæði þrisvar í viku og um rúmföt tvisvar sinnum í viku. Í hótelgarðinum er sundlaug og sólbaðsaðstaða er til fyrirmyndar með bekkjum og sólhlífum. Á hótelinu er veitingastaður sem bíður upp á grískan og alþjóðlegan mat og sundlaugarbar þar sem hægt er að kaupa sér morgunverð, snarl og drykki. 

Erato Beach, Platanias

Erato Beach er fallegt íbúðahótel staðsett á frábærum stað alveg við ströndina í Platanias.

Hótelið er eingöngu fyrir fullorðna og bíður upp á bæði stúdíó íbúðir fyrir tvo til þrjá og íbúðir með einu svefnherbergi fyrir allt að fjóra. Íbúðirnar eru snyrtilegar og innréttaðar á látlausan hátt, allar með sófa, sófaborði, sjónvarpi, litlum setkrók og litlu eldhúsi. Loftkæling og upphitun er í öllum íbúðunum. Gestamóttakan er opin allan sólarhringinn og starfsfólk aðstoðar við miðakaup eða leigu á bíl eða hjóli. Á hótelinu eru tveir veitingastaðir, einn við sundlaugina og hinn með útsýni yfir aðalgötuna í Platanias. 

Hótelið er sérstaklega hannað til að einangra hávaða frá umhverfinu og því góður kostur fyrir þá sem vilja slaka vel á í fríinu. Einnig er þó valkostur að komast í iðandi mannlífið á strandgötunni þar sem nóg er af veitingastöðum, börum og verslunum. 

Sunrise Village, Platanias

Gott, nútímalegt íbúðahótel, ofarlega í Platanias þannig að það þarf að ganga upp brekku. Hótelið er um 550 m frá strönd. 
Þjónustan er notaleg og máltíðir eru innifaldar.

Á hótelinu eru 65 rúmgóðar og smekklegar vistarverur sem skiptast í 28 fermetra stúdíó sem rúma allt að þrjá einstaklinga, og 50 til 56 fermetra íbúðir á einni eða tveimur hæðum sem rúma allt að fimm. Innréttingar eru stílhreinar og ljósar í bland við bjarta og skæra liti. Flísar eða parkett er á gólfum. Allar vistarverur eru búnar þægindum eins og loftkælingu, sjónvarpi með gervihnattarásum og öryggishólfi. Eldhúskrókurinn er lítill en þar er ísskápur, hellur, hraðsuðuketill og eldhúsáhöld. Á baðherbergjum er baðker með sturtu, hárþurrka og baðvörur. Við allar íbúðir eru svalir búnar húsgögnum. Þráðlaus nettenging er gestum að kostnaðarlausu. 

Morgunverðarhlaðborðið er ríkulegt með heitum og köldum réttum. Í hádeginu er áherslan á gríska og Miðjarðarhafsrétti og á kvöldin er ýmist grískt, ítalskt eða grillþema og skemmtiatriðin á kvöldin eru í takt við það. Við eldamennskuna er mikið lagt upp úr að nota ferskt hráefni úr næsta nágrenni. Á setustofubarnum er ljúft að slaka á eftir langan dag í sólinni áður en sest er að snæðingi. 

Í hótelgarðinum er sundlaug með afmörkuðu svæði fyrir börnin og sólbekkjum. Sundlaugarbarinn sér um að hvorki börn né fullorðnir þurfi að þjást af þorsta eða þörf fyrir snarl. Sérstakt leiksvæði er fyrir börnin og starfsfólk sér um afþreyingu. 

Sunrise Village er gott fjölskylduhótel, nýlegt, snyrtilegt og þjónustan notaleg.
Fallegi bærinn Hania er í 10 kílómetra fjarlægð og þangað er auðvelt að komast með bílaleigubíl eða almenningssamgöngum. 

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 1,5 EUR á mann á nótt. 

Sunset Suites, Platanias

Fjölskylduvænt og þægilegt íbúðahótel í 2 byggingum, 150 metrar í Platanias-ströndina. Stutt í verslanir, veitingahús og stemninguna í miðbæ Platanias.

Í hótelinu eru 60 rúmgóðar íbúðir, allt frá stúdíóum sem rúma tvo til þrjá fullorðna og upp í íbúðir sem rúma tvo til fjóra einstaklinga. Innréttingar eru látlausar og snyrtilegar, flísar eru á gólfum. Íbúðirnar eru búnar sjónvarpi, síma og loftkælingu og öryggishólfi. Greiða þarf fyrir loftkælingu á staðnum og einnig þarf að leiga öryggishólf. Í eldhúskrók er ísskápur, hellur og nauðsynlegustu áhöld til matargerðar. Á baðherbergjum er hárþurrka. Svalir eru við allar íbúðirnar.

Þráðlaus nettenging er á sundlaugasvæðinu, gestum að kostnaðarlausu, en er takmörkuð inni í íbúðunum.

Í hótelgarðinum er sundlaug og barnalaug. Sólbaðsaðstaða er góð, sólbekkir og sólhlífar eru umhverfis sundlaugarnar. Garðurinn er lítill og rólegur en mjög notalegur. 

Sunset Suites er á frábærum stað í Platanias, 150 metra frá gylltum sandinum við ströndina. Í götunum í kring eru verslanir, veitingastaðir og barir á hverju strái og stutt er í miðbæinn. Hægt er að leigja bíl til að skoða nágrennið en auk þess stoppar strætó, sem gengur á 20 mínútna fresti, rétt við hótelið og því auðvelt að skreppa í skoðunarferð til bæjanna í kring. 

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 1,5 EUR á mann á nótt. 

Porto Platanias Village Resort, Platanias

Falleg íbúðasamstæða á frábærum stað í hjarta hins líflega bæjar Platanias. Veitingastaðir, verslanir og krár allt um kring og aðeins 200 metrar niður á strönd.

Þessi skemmtilega hótelsamstæða er byggð eins og lítið þorp með fallegum gróðri og hellulögðum stígum á milli bygginga. Í samstæðunni eru 164 bjartar vistarverur sem skiptast í stúdíóíbúðir sem rúma allt að þrjá og íbúðir með einu eða tveimur svefnherbergjum sem rúma frá fjórum og upp í sex einstaklinga. Innréttingar eru stílhreinar og nútímalegar, flísar á gólfum. Lítill eldhúskrókur með ísskáp, helluborði, hraðsuðukatli og kaffivél auk tilheyrandi áhalda er í öllum vistarverum. Flatskjársjónvarp með gervihnattarásum, sími og öryggishólf er til staðar og loftkæling er stillanleg. Á baðherbergjum er sturta, hárþurrka og baðvörur. Verönd eða svalir búnar húsgögnum eru við allar íbúðir. Þráðlaus nettenging er gestum að kostnaðarlausu.
Morgunverðarhlaðborð með heitum og köldum réttum er í veitingasal. Í hádeginu og á kvöldin er þar einnig boðið upp á fjölbreytt úrval hefðbundinna krítverskra og alþjóðlegra rétta af hlaðborði. Á veitingastaðnum í sundlaugargarðinum fást Miðjarðarhafsréttir af matseðli.

Sundlaugarnar eru tvær, önnur er heilir 850 fermetrar en hin alveg passleg fyrir börnin að busla í. Sólbaðsaðstaðan er hin ágætasta með sólbekkjum og sólhlífum kringum laugina. Sérstakt leiksvæði er fyrir börnin. Sundlaugarbarinn sér til þess að enginn ætti að ofþorna og býður einnig upp á snarl og létta rétti.
Gestamóttakan er opin allan sólarhringinn og þar er boðið upp á gjaldeyrisskipti, þvottaþjónustu og bílaleigu. Þar er einnig lítil kjörbúð. Gestum hótelsins býðst að nota vel útbúna heilsulind systurhótelsins, Porto Platanias Resort & Spa, sem stendur hinum megin við götuna.

Porto Platanias er á einstaklega góðum stað í hjarta bæjarins, stutt frá ströndinni. Verslanir, veitingastaðir og barir eru í nærliggjandi götum. Aðeins 9 kílómetrar eru til Chania, sem er einstaklega sjarmerandi bær með nógu að skoða, stærri verslunum og iðandi mannlífi, og þangað er auðvelt að komast með almenningssamgöngum.

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 3 EUR á mann á nótt. 

Porto Platanias Beach Resort and Spa, Platanias

Gott hótel á frábærum stað við miðbæinn og ströndina í Platanias. Herbergi og fjölskylduherbergi og hægt að velja um hálft fæði eða hafa "allt innifalið".
Herbergin eru fyrir tvo til þrjá (ungabarn telst líka sem þriðji aðili) og herbergi á tveimur hæðum "Maisonette" sem tekur fjóra. Í þeim er loftkæling, sjónvarp, þráðlaust internet gegn gjaldi, ísskápur (smábar ef óskað er), öryggishólf og svalir. Á baðherbergjum er baðkar með sturtu, baðsloppar, inniskór og hárþurrka.

Í garðinum eru fimm laugar, en auk þess er hótelið við góða strönd, þar sem eru sólstólar og -hlífar. Fyrir börnin eru barnalaug, leiksvæði og klúbbur með dagskrá fyrir 5-12 ára. Ein laugin í garðinum er ætluð eingöngu fyrir fullorðna.

Í heilsulindinni eru upphituð laug, nuddpottur, sauna og gufubað. Þar er hægt að fá fjölda snyrti-, vellíðunar- og heilsumeðferða. Einnig góð líkamsrækt.

Einn aðalveitingastaður með hlaðborði í morgun-, hádegis- og kvöldverð. Yfir sumartímann er svo annað svæði með sérstökum þemakvöldum. Við sundlaugina er veitingastaður með létta hádegisrétti. 
Fimm barir; við móttökuna, tveir í sundlaugargarðinum, við ströndina og á þaki hótelsins.

Þráðlaust internet án endurgjalds í móttöku og á börum. Lítil verslun.

Tveir tennisvellir sem staðsettir eru við bílastæði hótelsins. Hægt er að bóka tíma í afgreiðslu hótelsins gegn gjaldi.

Hótelið útvegar sundlaugar-/strand handklæði fyrir þá sem óska gegn tryggingu sem er endurgreidd þegar handklæðum er skilað.

Minoa Palace, Platanias

Glæsilegt hótel í stórum og fallegum garði. Frábær aðstaða, framúrskarandi þjónusta, dýrindis matur – eitt besta hótelið í Platanias

Herbergi eru rúmgóð og í þeim öllum eru loftkæling, gervihnattasjónvarp, þráðlaust internet, smábar, öryggishólf og svalir. Á baðherbergjum eru baðsloppar og hárþurrka.

Herbergi eru í þremur byggingum, aðalbyggingu, hliðarbyggingu (2ja hæða hliðarbyggingu sem hótelið kallar "bungalows) og "Imperial herbergi" í byggingu neðan við aðalgötuna og liggur við ströndina.
Imperial byggingin er tengd við hótelið með göngubrú.

Í sundlaugargarðinum eru fjórar laugar og tveir nuddpottar. Einnig tennisvöllur og lítill fótboltavöllur. Fyrir börnin er barnalaug, leiksvæði, leikherbergi og klúbbur fyrir 4-10 ára.

Í heilsulindinni er upphituð innilaug með grynnra svæði fyrir börnin, sauna og nuddpottur. Gestir hótelsins hafa aðgang að vel búinni líkamsrækt. Í boði að fá andlits-, snyrti-, vellíðunar- og heilsumeðferðir. Við ströndina er hægt að prófa ýmis vatnasport.

Fjórir veitingastaðir eru á hótelinu, Elia, Thalassa, Ta Nissia og Galazio. Í boði er morgunverður, hálft fæði eða fullt fæði. Hálft fæði samanstendur af morgunverði og kvöldverði af hlaðborði án drykkja á veitingastaðnum Elia. Fullt fæði samanstendur af morgunverði, hádegisverði og kvöldverði af hlaðborði án drykkja á veitingastaðnum Thalassa eða á "a la carte" veitingastaðnum Ta Nissia í hádeginu. Ef gestir í hálfu eða fullu fæði vilja fara á sérréttastaðinn Galazio fá þeir 40% afslátt af matseðli án drykkja. Gestir þurfa að hafa samband við móttöku hótelsins áður. Fjórir barir eru á hótelinu; píanóbar í móttökunni, sundlaugarbar, snarlbar við ströndina og sjónvarpsbar. Einnig matvöruverslun.

Hótelið er beggja vegna við aðalgötuna í Platanias og er brú þar yfir.

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 4 EUR á mann á nótt. 

Golden Bay Suites, Agia Apostoli

Golden Bay Suites hótelið er heillandi hótel á fallegum stað við Agios Apostoli ströndina í um 4 km fjarlægð frá Chania.  Fallegt útsýni til sjávar og vingjarnlegt viðmót gera dvölina þar dásamlega.

Á hótelinu eru 42 svítur, íbúðir og stúdíóíbúðir. Allar vistarverur eru bjartar og rúmgóðar, klassískir litir eru á veggjum og húsgögnum og innréttingar eru nútímalegar. Flísar eru á gólfum. Á öllum herbergjum er loftkæling, internet, sjónvarp, kaffivél og ketill, sími, ísskápur og öryggishólf. Hverri íbúð eða svítu fylgja svalir eða verönd með garðhúsgögnum og annað hvort er útsýni til sjávar eða út í garðinn. Baðherbergin eru flísalögð, þar eru hárþurrka, stækkunarspegill og helstu snyrtivörur

Á hótelinu er veitingastaður þar sem hægt er að njóta matar og drykkjar innandyra eða úti á veröndinni. Útsýnið út á hafið er stórkostlegt svo engin ástæða er til að flýta sér að borða. Sérstaða veitingastaðarins eru klassískir réttir úr hreinu gæðahráefni og drykkirnir eru ljúffengir. Á hótelinu er matvöruverslun sem hentar vel þeim sem vilja sjá sjálfir um matargerð og ef gestir vilja fara út að borða eru veitingastaðir í göngufæri við hótelið.  Einnig er auðvelt að taka strætó eða leigubíl til Chania og njóta alls þess sem gamli bærinn og Feneyska höfnin hafa uppá að bjóða.

Hótelgarðurinn er góður með fallegri og svalandi sundlaug og nóg af bekkjum til að leggjast á og sleikja sólina en þar sem hótelið stendur á ströndinni má segja að strandlengjan sé partur af hótelgarðinum. Aðeins þarf að taka nokkur skref til að finna heitan sandinn undir iljum sér og leika sér í flæðarmálinu. 

Í heildina er Golden Bay Suites hótelið hentugt fyrir fjölbreytta hópa ferðamanna, bæði þá sem vilja slaka á í ótrúlegu umhverfi og þá sem ferðast með fjölskyldu og vilja meira stuð. Frí bílastæði eru við hótelið svo hægt er að leigja bíl og keyra um eyjuna. Stutt er í skemmtigarða og vatnaíþróttir, dagsferðir út fyrir borgina eru vinsælar, sem og gönguferðir og fjallgöngur í fallegu umhverfi. 

Helios apartments, Agia Apostoli

Helios apartments er lágreist og heillandi íbúðahótel sem er staðsett á yndislegum stað í úthverfi Chania. Gylltar og fallegar sandstrendur, blár hafflöturinn, frábært veðurfar og fallegt landslag umlykur.

Hótelið samanstendur af 27 íbúðum sem skiptast í eins til tveggja herbergja íbúðir og stúdíóíbúðir. Íbúðirnar eru bjartar, snyrtilegar og rúmgóðar með hvítmáluðum veggjum og flísum á gólfum. Húsgögn eru klassísk og innréttingarnar eru í ljósum við. Í öllum íbúðum er nettenging, sjónvarp, lítið eldhús með ísskáp og öllu því helsta sem þarf til léttrar matargerðar og setustofa. Loftkælingu og öryggishólf er hægt að fá gegn aukagjaldi. Í sumum herbergjum eru svalir með útihúsgögnum. Á baðherbergjum eru baðkar eða sturta, hárþurrka og helstu snyrtivörur.

Í hótelgarðinum er snarlbar þar sem hægt er að fá sér svalandi drykki til að kæla sig niður í sólinni, ís, kaffi og létta rétti. Herbergisþjónusta er í boði á hótelinu og einnig eru góðir veitingastaðir, kaffihús, búðir og barir í nágrenni við hótelið svo hér ætti enginn að vera svangur. Í hótelgarðinum er góð sundlaug og önnur minni, barnalaug. Þar er aðstaða til sólbaðsiðkunar og hægt að fá sólstóla og sólhlífar. Umhverfið er fallegt og gróið. Inni á hótelinu er gestamóttaka þar sem starfsfólk er alltaf tilbúið til að aðstoða gesti við að gera fríið ógleymanlegt. 

Hótelið er fullkomið fyrir alla sem vilja slaka á og endurnæra sig á daginn en á sama tíma geta komist í líflega skemmtanamenningu á kvöldin. Í næsta nágrenni við hótelið er garður þar sem er mikið af furutrjám og tröllatrjám (e. eucalyptus). Miðbær Chania og gamli bærinn sem er vel varðveittur eru aðeins í stuttri fjarlægð en þar er fallegt hafnarsvæði og viti sem gaman er að skoða. Frí bílastæði eru við hótelið svo hér er um að gera að leigja sér bíl og skoða sig um á eyjunni.

Domes Noruz, Autograph Collection, Agia Apostoli

Glæsilegt og hlýlegt hönnunarhótel, aðeins ætlað fullorðnum, á kyrrlátum stað með beinu aðgengi að gylltri sandströnd. Aðeins nokkrar mínútur með leigubíl í iðandi mannlífið í Chania. Fullkomin slökun og lúxus.

Í hótelinu eru 83 rúmgóðar vistarverur af ýmsum gerðum, allt frá 32 fermetra herbergjum sem rúma tvo upp í 80 fermetra svítur sem rúma fjóra fullorðna. Innréttingar eru fallega hannaðar, hlýlegar og nútímalegar, með áherslu á millibrúnan við og bláa liti. Parkett og flísar á gólfum. Alls staðar er 49 tommu flatskjársjónvarp með gervihnattarásum, loftkæling, sími, öryggishólf, straubretti og straujárn, aðstaða til að laga kaffi og te og ókeypis þráðlaus nettenging. Fyllt er á smábar gegn gjaldi. Matarkrók fylgja diskar og glös. Á baðherbergi er sturta, hárþurrka, náttsloppar og inniskór. Við allar vistarverur er stór verönd með baðkeri, nuddpotti eða einkasundlaug. 

Á Zeen er boðið upp á ljúffenga rétti af matseðli á morgnana, í hádeginu og á kvöldin og er áherslan á nútímalega krítverska matargerð. Athugið að panta þarf borð á veitingastaðnum. Á setustofubarnum eru allar gerðir drykkja í boði.

Tvær sundlaugar eru í hótelgarðinum og sólbaðsaðstaðan er til fyrirmyndar, með bekkjum, þægilegum beddum og nægum handklæðum og við sundlaugarbarinn er hægt að njóta snarls og svalandi drykkja. Ekki skemmir fyrir að útsýnið nær yfir himinblátt hafið til nærliggjandi eyja. Auk þess er beint aðgengi að gylltri sandströndinni fyrir neðan hótelið með bekkjum, sólhlífum, sandi og hlýjum sjó til að næra líkama og sál. 

Að sjálfsögðu er heilsulind í hótelinu, með innilaug, gufubaði, þurrgufu, nuddpotti og líkamsræktaraðstöðu og boðið er upp á nudd- og andlitsmeðferðir.
Þvotta- og þurrhreinsiþjónusta er í hótelinu, bílaleiga og önnur almenn þjónusta.

Domes Noruz er fullkominn kostur fyrir þá sem þrá að slaka á í sönnum lúxus á hóteli sem var opnað árið 2016. Öll hönnun innan sem utan dyra er til fyrirmyndar og það sama má segja um þjónustu og aðbúnað. Aðeins nokkurra mínútna bílferð er í litríkt mannlífið og menningarumhverfið í Chania. 

Theartemis Palace, Rethymnon

Þetta snyrtilega fjögurra stjörnu hótel er vel staðsett í Rethymnon, aðeins í nokkurra mínútna göngufjarlægð frá bænum og ströndinni.

Herbergin eru rúmgóð og snyrtileg og rúma allt frá tveimur fullorðnum til tveggja fullorðna og tveggja barna. Á öllum herbergjum er loftkæling, internet, sjónvarp með gervihnattastöðvum, ísskáp, öryggishólf og kaffivél. Hægt er að velja á milli eingöngu morgunverðar, hálfs fæðis eða allt innifalið. 

Á hótelinu er líkamsræktarstöð þar sem fólk getur haldið áfram sinni venjulegu rútínu þó það sé í fríi. Einnig er þar heilsulind þar sem hægt að panta hinar ýmsu meðferðir, til dæmis nudd og aðrar heilsumeðferðir eða snyrtimeðferðir. Í heildina er um að ræða frábært hótel fyrir alls konar ferðamenn. Staðsetningin er skemmtilegt því hótelið er beint fyrir ofan Rethymnon sandströndina, en einnig er stutt að fara inn í miðbæðinn til að skoða það helsta í sögu og menningu svæðisins.

Bio Suites, Rethymnon

Bio Suites er umhverfisvænt íbúðahótel í rólegu umhverfi í Rethymnon. Stutt er að ganga á ströndina og aðeins 10 mín gangur er niður að höfn. Hótelið bíður upp á mjög góða heilsulind þar sem hægt er að fara í gufubað og heitan pott gegn gjaldi. Einnig er hægt að kaupa sér nudd og aðrar heilsumeðferðir. Flott líkamsræktaraðstaða er á hótelinu ásamt tveimur sundlaugum, flottu leiksvæði fyrir börnin og gestamóttöku sem opin er allan sólarhringinn. Einnig er læknisþjónusta í boði fyrir gesti hótelsins ef á þarf að halda. Bio Suites er frábær kostur fyrir fjölskyldur.

Hægt er að velja um stúdíó íbúðir og íbúðir með einu og tveimur svefnherbergjum sem rúma allt að 5 manns. Allar íbúðirnar eru með eldhúskrók og stofu ásamt örbylgjuofni, sjónvarpi og loftkælingu. Hótelgestir hafa aðgang að þráðlausu interneti á öllu hótelinu. 

Creta Palace, Rethymnon

Glæsilegra gerist það ekki. Lúxushótelsamstæða við Rethymnon-ströndina, 5 kílómetra frá iðandi mannlífinu í miðbænum.

Í samstæðunni eru 335 vistarverur, allt frá herbergjum og svítum upp í smáhýsi og sérbýli með einkasundlaugum, og rúma frá þremur upp í sex einstaklinga. Innréttingar eru í mismunandi stíl, hvítir litir áberandi með gylltu, við og björtum litum í bland. Ýmist er viðarparkett eða steinflísar á gólfum. Loftkæling og upphitun, sími, flatskjársjónvarp með gervihnattarásum, hljómtæki, rafrænt öryggishólf, ísskápur, þráðlaus nettenging og smábar sem fyllt er á gegn gjaldi er í öllum vistarverum. Á baðherbergjum eru baðsloppar, inniskór, hárþurrka og baðvörur. Svalir eða verönd fylgja og er útsýni ýmist yfir hótelgarðinn eða á haf út.

Kalla mætti hótelið himnaríki sælkerans því að hér eru heilir 10 veitingastaðir, kaffihús og barir, hver með sína áherslu og andrúmsloft. Hægt er að velja um asíska, krítverska og alþjóðlega og lífræna matargerð, steikur og sjávarrétti, allt unnið úr besta fáanlega hráefni. Þess má geta að hótelið hefur verið verðlaunað fyrir matargerðina.

Saltvatnslaug og ferskvatnslaug eru við hótelið með góðri sólbaðsaðstöðu og eins eru sólbekkir og sólhlífar á einkaströnd hótelsins. Krakkaklúbbur er starfræktur og sérstök laug með rennibrautum er fyrir börnin. Skemmtidagskrá með lifandi tónlist og viðburðum er á kvöldin.

Heilsulindin er heilir 2.000 fermetrar og þar er líkamsræktaraðstaða, öldulaug, gufuböð af ýmsu tagi, hvíldarhreiður, snyrtistofa, boðið er upp á andlits- og líkamsmeðferðir, paranudd og Ayurveda-meðferðir til að næra bæði líkama og sál. Og hver væri ekki til í að prófa súkkulaðimeðferðina?

Í gestamóttöku er boðið upp á þurrhreinsun og þvottaþjónustu. Þar er hraðbanki, gjafavöruverslanir og sérverslun með kræsingar úr smiðju heimamanna.

Creta Palace er einstök hótelsamstæða, hér er allt sem hægt er að biðja um til að njóta frídaganna, hvort sem um er að ræða í mat eða drykk, við slökun, hreyfingu eða aðra afþreyingu. Tennisvellir eru á svæðinu og vatnasport af ýmsu tagi er á vegum hótelsins. Aðeins tekur nokkrar mínútur að aka inn í miðbæ Rethymno til að skoða gamla bæinn og kíkja í verslanir eða á veitingahús. 

Vinsamlega athugið að fararstjóri VITA er staðsettur í Chania en hægt er að ná í hann í þjónustusíma. 

Ferðamannaskattur á Krít er ekki innifalinn í gistiverði. Hann greiðist beint á hótel og er 4 EUR á mann á nótt. 

Swell Boutique Hotel, Rethymnon

Swell Boutique hótelið stendur á glæsilegum stað á ströndinni við bæinn Rethymnon á Krít. Stutt er frá hótelinu í allt það helsta á svæðinu og hótelið hefur rólegt yfirbragð. 

Á hótelinu eru 27 herbergi sem skiptast í tveggja til þriggja manna herbergi og svítur af nokkrum stærðum. Herbergin eru rúmgóð, snyrtileg og klassísk en hönnunin er mínímalísk og nútímaleg í senn. Á öllum herbergjum eru loftkæling, internet, sjónvarp með gervihnattastöðvum, ísskáp, síma, öryggishólfi og tekatli. Út frá öllum herbergjum eru svalir með góðum útihúsgögnum og útsýni til sjávar. Baðherbergin eru flísalögð og með frábærri sturtu, hárþurrku og helstu snyrtivörum.

Á hótelinu er veitingastaður sem býður upp á ferskt hráefni frá svæðinu en áhersla er lögð á þekkta gríska rétti og gríska matarmenningu. Morgunverður er borinn fram á girnilegu hlaðborði. Einnig er bar í hótelgarðinum þar sem hægt er að fá svalandi drykki og ljúffengt snarl.

Hótelgarðurinn er lítill, þar sem ströndin er í bakgarði hótelsins. Þó er í garðinum lítil upphituð sundlaug og eitthvað af sólbekkjum. Á hótelinu er líkamsræktarstöð þar sem fólk getur haldið áfram sinni venjulegu rútínu þó það sé í fríi. Einnig er þar heilsulind þar sem hægt er að fara í sánu, tyrkneskt bað og fleira en einnig er hægt að panta meðferðir, til dæmis nudd og aðrar heilsumeðferðir eða snyrtimeðferðir. 

Í heildina er um að ræða frábært hótel fyrir alls konar ferðamenn. Starfsfólk hótelsins er reynslumikið, kurteist og alltaf tilbúið að hjálpa gestum að gera fríið ógleymanlegt. Staðsetning er skemmtileg því hótelið er beint fyrir ofan Rethymnon sandströndina einnig er stutt að fara inn í miðbæinn til að skoða það helsta í sögu og menningu svæðisins. 

Atrium Ambiance City Hotel, Rethymnon

Þetta glæsilega fjögurra stjörnu hótel sem er aðeins ætlað fullorðnum er vel staðsett í Rethymnon, í örstuttu göngufæri við Rethymno ströndina.

Hótelið er á fjórum hæðum og á því eru um 120 herbergi sem rúma tvo til þrjá. Hægt er að velja á milli standard, superior eða deluxe herbergja, ýmist með sundlaugarsýn eða ekki. Á öllum herbergjum er loftkæling, internet, sjónvarp, lítill ísskápur, setkrókur og hárþurrka.

Á hótelinu er hægt að finna margskonar afþreyingu, t.d. líkamsræktarstöð, billjard eða borðtennis og hægt er að panta sér tíma í nuddi. Í hverri viku skipuleggur hótelið svo ýmsa afþreyingu á kvöldin s.s. lifandi gríska tónlist, dans, magadans, einhverskonar sýningar og ýmislegt fleira. Skammt frá hótelinu er hægt að fara í minigolf og margskonar vatnasport er í boði við ströndina.

Tveir veitingastaðir eru á hótelinu, Onions sem býður upp á bæði morgun- og kvöldverðarhlaðborð og A la carte veitingastaðurinn Green & Grill sem býður upp á margskonar gríska rétti. Einnig eru tveir barir, annar úti við sundlaugina þar sem hægt er að njóta úrvals hressandi drykkja og snarls yfir daginn og einnig hádegisverðar í hádeginu. Ginger Coctail barinn er svo staðsettur inni þar sem hægt er að njóta flottra kokteila á kvöldin.

Ideon Hotel, Rethymnon

Mjög sjarmerandi hótel í aðeins 5 mínútna göngufæri við gamla bæinn í Rethymnon.

Hótelið sem er á fjórum hæðum samanstendur af þremur byggingum. Einni aðalbyggingu og tveimur sögulegum byggingum sem eru samliggjandi aðalbyggingunni. Öll herbergin eru um 20 fm og eru búin sjónvarpi, ísskáp, hárþurrku og loftkælingu ásamt frírri nettengingu og öryggishólfi.

Veitingastaður hótelsins býður gestum góðan daginn með morgunverðarhlaðborði en á kvöldin er þar framreiddur kvöldverður sem hægt er að snæða annaðhvort inni við loftkælingu eða úti í garðinum við sundlaugina. Yfir daginn er síðan hægt að fá sér létta hressingu og drykki við sundlaugarbarinn og síðdegis er tilvalið að setjast á lobby barinn þar sem hægt er að sitja inni eða úti þar sem er glæsilegt útsýni yfir sjóinn.

Amira Luxury resort & Spa, Rethymnon

Glæsilegt 5 stjörnu lúxushótel aðeins 10 km frá iðandi mannlífinu í miðbænum í Rethymnon. Hótelið er eingöngu fyrir fullorðna eða eldri en 15 ára.

Hótelið er á einkaströnd sem er innan við 15.000 metrar og á því eru 172 vistarverur, bæði herbergi sem rúma tvo til þrjá og svítur með eða án einkasundlaugar sem rúma þrjá til fjóra. Allar herbergjatýpurnar eru með "walk in" sturtu, stækkunarspegli, hárblásara, sloppum og inniskóm, sundlaugarhandklæðum, loftkælingu, þráðlausu interneti, USB tenglum, örgyggishólfi, vatnskatli, Espresso kaffivél, minibar, straujárni og strauborði.

Þrír veitingastaðir eru á hótelinu, Nisos sem býður upp á bæði morgun- og kvöldverðarhlaðborð og A la carte veitingastaðirnir Almyra og Kritamo. Einnig eru þrír barir, aðal barinn Oniro þar sem hægt er að njóta flottra kokteila frá morgni fram á kvöld og njóta hrífandi útsýnisins yfir Eyjahafið og svo sundlaugarbarinn Asterias og strandbarinn Votsalo. Á kvöldin er boðið upp á ýmsa skemmtidagsrká.

Flott heilsulind er á hótelinu sem býður m.a. upp á slökunarherbergi, alls konar meðferðir, paraherbergi með nuttpotti og hægt er að fá hand- og fótsnyrtingu og hárgreiðslu. Á móti heilsulindinni er flott 150 fermetra líkamsræktaraðstaða.

Vinsamlega athugið að fararstjóri VITA er staðsettur í Chania en hægt er að ná í hann í þjónustusíma.

Ferðamannaskattur á Krít er ekki innifalinn í gistiverði. Hann greiðist beint á hótel og er 4 EUR á mann á nótt.

Panorama, Galatas

Glæsilegt hótel með allt innifalið sem stendur uppi á höfða í Galatas með óviðjafnanlegu útsýni yfir Chania flóa og Thodorou-eyju. Það þarf að ganga niður brekku að ströndinni, um 100 m. Strætisvagn stoppar fyrir neðan hótelið.

Á öllum herbergjum eru loftkæling, gervihnattasjónvarp, þráðlaust internet, smábar, öryggishólf og svalir með útsýni yfir hafið eða garðinn. Á baðherbergjum eru baðkar með sturtu og hárþurrka.
Herbergin eru með teppi á gólfum. 

Garðurinn er glæsilegur í alla staði með tveimur laugum, góðri sólbaðsaðstöðu og sérstökum svæðum fyrir börnin. Einnig er huggulegt útisvæði fyrir kvöldskemmtanir. 

Heilsulind með saunu og hægt er að fá nudd og ýmsar dekur- og snyrtimeðferðir gegn greiðslu. Vel búin líkamsrækt og flóðlýstur tennisvöllur. Einnig hárgreiðslustofa.

Tveir veitingastaðir, annar þeirra Symposium með morgun- og kvöldverð. Bar með útisvæði þar sem hægt er að sitja og njóta frábærs útsýnisins yfir Chania-flóa. Við sundlaugina er bar með snarl og létta rétti. Lítil verslun.

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel.

Creta Palm, Stalos

Fallegt fjölskylduvænt íbúðahótel með 130 íbúðum á mótum Agia Marina og Stalos. Umhverfis hótelið eru verslanir og veitingastaðir og stutt er á ströndina, fara þarf yfir götu.

Í öllum íbúðum er eldhúskrókur með ísskáp, gervihnattasjónvarp, þráðlaust internet, loftkæling, svalir og öryggishólf gegn gjaldi. Á baðherbergjum eru baðkar með sturtu og hárþurrka.
Greiða þarf fyrir afnot af interneti, €12 á viku, eða €5 á dag.

Tvær sundlaugar með svæðum fyrir börn. Fyrir börnin er einnig leiksvæði og leikherbergi.  Tveir sundlaugarbarir, tækjasalur, sauna og nuddpottur

Veitingastaður með vel útilátið hlaðborð kvölds og morgna, bar með snarl og létta rétti og bar við laugina. Einnig lítil verslun.
Hótelið er tæpa 4 km frá Platanias en á leiðinni eru veitingastaðir og alls kyns verslanir.

Fæði: Hálft fæði eða "allt innifalið"

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 3 EUR á mann á nótt. 

Lito Beach, Gerani

Lito beach er hótel og íbúðahótel sem er staðsett á ströndinni í Gerani, í um 2,5 km fjarlægð frá Platanias og 15 km frá Chania. Heillandi útsýni út á Miðjarðarhafið, yndislegt veðurfar og allt til alls fyrir gott frí.

Á hótelinu eru 50 stílhrein og hlýlega innréttuð herbergi og íbúðir. Húsgögn eru úr dökkum viði og ljósar flísar eru á gólfum. Hér er um að ræða vistarverur af öllum stærðum og gerðum; tveggja til þriggja manna herbergi, stúdíóíbúðir, eins til tveggja herbergja íbúðir og svítur. Í öllum vistarverum eru loftkæling, internet, sjónvarp, öryggishólf, sími og míníbar ásamt því að allar vistaverur hafa verönd eða svalir. Í íbúðum eru svefnherbergi og setustofur ásamt léttum eldhúsum. Baðherbergin eru flísalögð en þar eru baðkar með sturtu, hárþurrka og helstu snyrtivörur. 

Hótelgarðurinn er fallegur og gróinn en í honum eru útisundlaug, barnasundlaug og góð sólbaðsverönd með sólbekkjum og öllu sem þarf til að slaka á og njóta sólarinnar. Í garðinum er einnig leiksvæði fyrir börnin og bar er við sundlaugina þar sem hægt er að nálgast svalandi drykki, létta rétti eða kaffiveitingar. Á hótelinu er einnig veitingastaður sem býður upp á spennandi Miðjarðarhafsrétti í hádeginu og á kvöldin. Einnig er herbergisþjónusta í boði á hótelinu.

Við hótelið eru frí bílastæði svo tilvalið er að leigja bíl og skoða sig um á eyjunni. Hótelið hentar fjölskyldufólki og öðrum ferðamönnum sem vilja dvelja í fallegu umhverfi, kósý andrúmslofti og fá úrvals þjónustu frá vingjarnlegu starfsfólki.  

Nontas Íbúðahótel, Daratso

Einfalt og snyrtilegt íbúðahótel á góðum stað í Daratso-hverfinu. Hótelið er í útjaðri Agia Marina, um 500 metra frá Agii Apostoli ströndinni og 4 kílómetra frá fjörinu í miðbæ Hania.

Í hótelinu eru 30 rúmgóðar vistarverur sem skiptast á milli stúdíóa og íbúða sem rúma tvo til fjóra einstaklinga. Íbúðirnar eru snyrtilegar, innréttingar í millibrúnum við og flísar eru á gólfum. Öll helstu þægindi eru til staðar, eins og loftkæling og upphitun, flatskjársjónvarp með gervihnattarásum, sími og öryggishólf. Í eldhúskrók er ísskápur, hellur, hraðsuðuketill, kaffivél og öll nauðsynlegustu áhöld. Á baðherbergjum er sturta. Við allar íbúðir eru svalir eða verönd með útsýni yfir hafið og nágrennið. Athugið að einnig er í boði Stúdíó Deluxe svokallað en þau eru ekki með eldhúskrók og eru því hefðbundin herbergi, þau rúma tvo einstaklinga. Þráðlaus nettenging er í öllum vistarverum gestum að kostnaðarlausu. Loftkæling er gegn gjaldi og einnig öryggishólf.

Á hótelinu er snakkbar þar sem hægt er að fá sér klassískar kræsingar að hætti heimamanna og upplagt er að fá sér fordrykk í setustofubarnum. 

Sundlaug er við hótelið með afmörkuðu svæði fyrir börnin. Sólbaðsaðstaða er við laugina með sólbekkjum og sólhlífum. Á sundlaugarbarnum er hægt að fá snarl og létta rétti auk drykkja í fljótandi formi, áfengra jafnt sem óáfengra. Sagt er að mojito-inn sem þar fæst sé svo góður að það sé saga til næsta bæjar. 
Heilsulind með snyrtistofu og nuddpotti er í hótelinu og boðið er upp á nuddmeðferðir. 

Starfsfólkið í móttökunni leggur sig fram við að aðstoða gesti að leigja bíl eða hjól, veita ferðaupplýsingar og fleira. Boðið er upp á þvotta- og þurrhreinsiþjónustu og gjaldeyrisskipti.

Nontas íbúðahótelið er frábær valkostur fyrir þá sem vilja njóta þess að slaka á. Ekki skortir veitingastaði og verslanir í næstu götum. 

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 1,5 EUR á mann á nótt. 

Euphoria Resort, Kolymbari

Stílhreint og fallegt lúxushótel við ströndina í Kolymbari. Dekur á alla kanta, fullkomin slökun og endurnæring með nægri afþreyingu. Allt innifalið.

Í hótelinu eru 287 vistarverur í sex þriggja hæða lyftubyggingum. Herbergin eru 30 fermetrar og rúma 2 til 3 einstaklinga og svítur eru 40 og 60 fermetrar og rúma allt að fimm. Innréttingar eru stílhreinar og hlýlegar, úr við og ljósum jarðarlitum. Parkett er á gólfum. Öll nútímaþægindi eru til staðar, stillanleg loftkæling, sími, sjónvarp, minibar og aðstaða til að laga te og kaffi. Baðherbergi eru vel búin, með hárþurrku og baðvörum. Verönd eða svalir eru búnar húsgögnum. Þráðlaus nettenging er gestum að kostnaðarlausu. Herbergi á jarðhæð með verönd hafa aðgang að sundlaug sem eingöngu er ætluð þessum herbergjatýpum. 

Aðalveitingastaðurinn býður úrval rétta af hlaðborði en tveir aðrir bjóða girnilega rétti af matseðli. Bar er bæði inni á hótelinu og við sundlaugina. Af þakveröndinni er útsýni yfir sundlaugargarðinn og á haf út.

Sundlaugargarðurinn er skemmtilegur, sólbaðsaðstaðan til fyrirmyndar með sólbekkjum, sólhlífum og handklæðum og sólbaðseyjum sem liggja út í laugina. Við laugina er bar þar sem einnig er hægt að gæða sér á snarli og svalandi drykkjum. Hægt er að velja um að sitja á bakkanum undir sólhlífum eða við borð úti í lauginni sjálfri. Ein laugin er ferskvatnslaug og þrjár vatnsrennibrautir eru fyrir börn hærri en 1,3 m. Einnig er busl laug fyrir þau yngstu. Starfsfólk krakkaklúbbsins sér til þess að yngstu gestirnir hafi ávallt nóg fyrir stafni.

Heilsulindin er af bestu gerð með upphitaðri innilaug, nuddpotti, gufubaði, hvíldarhreiðri, líkamsræktaraðstöðu og nudd- og líkamsmeðferðum af ýmsu tagi. Í boði eru á jóga-, Pilates-, Zumba og styrktar/þrek tímar. 

Gestamóttakan er að sjálfsögðu opin allan sólarhringinn og þar er m.a. minjagripaverslun, hjólaleiga og þvotta- og þurrhreinsiþjónusta.

Euphoria Resort er splunkunýtt hótel með beinu aðgengi að ströndinni í Kolymbari, þar sem hótelgestum bjóðast ókeypis afnot af sólbaðsaðstöðu með sólbekkjum. Hér er allt til alls, slökun, afþreying og endurnæring. Þess má geta að strætó sem gengur til Chania stoppar stutt frá hótelinu.

Vinsamlega athugið að ferðamannaskattur á Krít er ekki innifalinn í gistiverði. Hann greiðist beint á hótel og er 3 EUR á mann á nótt. 

Galini Palace, Kolymbari

CHC Galini Palace er glænýtt og glæsilegt hótel staðsett í Kolymbari sem er í um 25 mínútna akstursfjarlægð frá miðbæ Chania.  Miðbær Platanias er í um 15 mínútna akstursfjarlægð.

Hótelið opnaði árið 2021 og býður upp á mjög góða aðstöðu.
Sundlaug, barnalaug, veitingastaður, bar, sundlaugarbar, leiksvæði fyrir börn, heilsulind og líkamsræktarsalur svo eitthvað sé nefnt.

Herbergin eru innréttuð í ljósum litum og eru búin öllum helstu þægindum, svo sem loftkælingu, litlum ísskáp, Wi-Fi, öryggishólfi, sjónvarpi, síma og rúmgóðum baðherbergjum.

Frítt Wi-Fi er á öllu hótelinu.

„Allt innifalið“ felur í sér morgun- hádegis- og kvöldverð og drykki til kl. 23 á kvöldin.  Morgun- og kvöldverður eru bornir fram á hlaðborði á aðalveitingastað hótelsins, hádegisverður á veitingastað við sundlaugina.
Kolymbari er rólegt þorp við ströndina en þar er að finna bæði verslanir og veitingastaði.  Ágætar almennings samgöngur eru frá Kolymbari til Platanias og Chania.

Creta Princess, Maleme

Creta Princess hótelið er staðsett við Maleme ströndina sem er í u.þ.b. 10 mín akstri frá Platanias. Hótelið er með sinn eigin vatnsgarð sem inniheldur fimm vatnsrennibrautir og þrjár sundlaugar. Hentar mjög vel fyrir fjölskyldur.

Á hótelinu eru 418 herbergi sem rúma mest 3 fullorðna eða 2 fullorðna og 2 börn. Í öllum herbergjum er öryggishólf, hraðsuðuketill fyrir te og kaffi, ísskápur, hárþurrka og sjónvarp. Frí internet tenging er á öllum herbergjum og loftkæling er í herbergjum frá 15. júní til 15. september. Svalir eru á öllum herbergjum.

Mikil afþreying er á hótelinu. Má þar nefna stóran vatnsgarð sem er með þrjár sundlaugar, fimm vatnsrennibrautir, risaá og svartholsgöng. Einnig er góð sólbaðsaðstaða með bekkjum og sólhlífum og frí handklæði til að nota á sólbekkjunum annaðhvort við sundlaugina eða á ströndinni. Á hótelinu eru einnig tveir tennisvellir, fótboltavöllur, körfuboltavöllur, mini golf, billiard og leikvöllur fyrir yngri börnin svo eitthvað sé nefnt. Einnig er krakkaklúbbur fyrir börn 4-12 ára og skemmtidagskrá fyrir börnin.

Gestir hafa aðgang að glæsilegri líkamsræktaraðstöðu og heilsulind og lítilli verslun með helstu nauðsynjum.

Á hótelinu eru tveir veitingastaðir, lobby bar og sundlaugarbar og disco klúbbur þar sem hægt er að njóta flottra drykkja frameftir kvöldi. Haldin eru sérstök grísk kvöld með lifandi dansi sem skemmtilegt er að upplifa.

Kato Stalos Mare, Stalos

Kato Stalos Mare er afar einfalt en hreint og snyrtilegt íbúðahótel við ströndina í Stalos, u.þ.b. 7 km frá Chania.  Nóg er af veitingastöðum og verslunum allt í kring.

Í hótelinu eru 26 íbúðir m/1 svefnherbergi og stúdíóíbúðir.  Í öllum vistaverum er að finna eldhús og baðherbergi, svalir eða verönd, ísskáp, kaffivél og brauðrist.

Veitingastaður hótelsins er á ströndinni og býður upp á ekta Krítverskan mat úr ferskasta hráefninu hverju sinni.  Vinalegt andrúmsloft og góður matur.