fbpx Kúba - Ævintýraferð | Vita

Kúba - Ævintýraferð

á slóðir Che Guevara og Fídel Castro

Frestað um ár

Fyrirhuguð er ferð á sama tíma haustið 2021. Vinsamlega hafið samband til að fá nánari upplýsingar. Hægt er að senda okkur tölvupóst á info@vita.is eða hringja í síma 570-4444.

Hafa samband

Myndagallerí

Havana, Trinitad, Santiago, Playa Pesquero

20. október til 1. nóvember 
Frestum um ár. Fyrirhuguð er ferð á sama tíma haustið 2021

Fararstjóri: Stefán Ásgeir Guðmundsson

Ævintýraeyjan Kúba hefur lengi heillað gesti sem þangað koma og vilja upplifa allt það sem eyjan hefur upp á að bjóða, hvort sem það er tónlistin, vindlarnir, rommið, hvítar strendurnar eða einfaldlega hið þægilega og afslappaða andrúmsloft. Lengstum hefur heimsókn til Kúbu verið eins og að stíga aftur í tímann inn í vel varðveitt tímahylki en á síðustu árum hefur lífið á Kúbu hægt en örugglega færst í átt til nútímans. Fortíðina er þó enn að finna í húsabyggingum, sjarmerandi götumyndinni og misvel uppgerðum fornbílum. Á Kúbu er að finna suðupott ólíkra menningarheima þar sem gætir áhrifa bæði frá Afríku og frá Spáni og bera eyjaskeggjar þess glögglega merki. Heimsókn til Kúbu er bæði ógleymanleg og töfrum líkust.


kuba_1.jpg

Gist verður á fimm stöðum á Kúbu og eina nótt í Toronto, Kanada í þessari 13 daga ferð. Ferðin byrjar í höfuðborginni Havana þar sem gist verður í 3 nætur. Havana lætur engan ósnortin enda er borgin bæði mögnuð og lífleg. Í Havana er að finna einn fallegasta nýlenduborgarkjarnan í Ameríku. Hvergi er arkitektúr nýlendutímans svo ósvikinn og vel varðveittur eins og í Gömlu Havana og er sá hluti borgarinnar á heimsminjarskrá UNESCO. Á 4ja degi verður keyrt til Cienfuegos sem löngum hefur verið kölluð perla suðursins. Frá Cienfuegos verður svo farið í dagsferð til borgarinnar Trinidad sem einnig er að finna á heimsminjaskrá UNESCO fyrir einstakan arkitektúr. Þetta svæði eyjarinnar var eitt öflugasta sykurræktarhérað Kúbu áður fyrr með tilheyrandi þrælahaldi. Þá verður haldið til Camaguey með viðkomu í Santa Clara til að sjá minnismerki og safn byltingarhetjunnar Che Guevara. Frá Camaguey er svo haldið austur til borgarinnar Santiago sem er þekkt fyrir sitt líflega tónlistarlíf og fyrir að vera vagga byltingartilrauna Kúbu. Að lokum verður keyrt norður til Holguín, komið við á fæðingarstað byltingarleiðtogans Fidel Castro og svo afslöppun í 3 nætur í Playa Pesquero með sínum hvítu ströndum og ylvolga sjó.

Flugtímar

Dagur Flugnúmer Flogið frá Brottför Flogið til Dagur Koma
20.okt. FI    603 Keflavík 17:05 Toronto 20.okt. 18:55
20.okt. AC 1876 Toronto 20:00 Havana 21.okt. 23:30
 1.nóv. TS  447Q Holguin 11:35 Toronto 01.nóv. 15:30
 1.nóv. FI     602  Toronto 19:30 Keflavík 02.nóv. 06:10

Dagskrá og ferðatilhögun

Þriðjudagur 20. október.
Lagt af stað með Icelandair kl. 17:05 til Toronto og lent kl. 18:55. Ekið á hótel Sheraton Centre sem er í vel staðsett í miðborginni.
Gist um nóttina.


toronto_2.jpg

Miðvikudagur 21. október. Dagur í Toronto og kvöldflug til Havana
Tékkum út af hótelinu eftir morgunmat, geymum töskurnar og eigum frjálsan dag til að skoða okkur um í borginni.
Síðdegis er rútan út á flugvöll og flogið með Air Canada sem fer kl. 20:00.  Lending í Havana kl. 23:30 og þá er ekið á Iberostar Parque Central þar sem gist er í þrjár nætur.
Innifalið: "Continental" morgunverður.


havana_kuba-dreamstime_bilar3.jpg

Fimmtudagur 22. október. Havana
Skoðunarferð um helstu kennileiti Havana, höfuðborg Kúbu. Fyrst förum við á byltingartorgið, pólitískt hjarta borgarinnar, þar sem Fidel Castró hefur haldið sínar frægu löngu ræður. Að því loknu heimsækjum við Byltingasafnið og fræðumst meira um skæruliðahreyfingu Castrós og byltingarsöguna. Þá höldum við í gamla bæjarhlutann, en hann er á heimsminjaskrá UNESCO. Glæsilegar götumyndir nýlendutíma Spánverja blasa hvarvetna við og verður gengið þar um stræti og torg.
Við skoðum t.a.m. dómkirkjutorgið, stjórnarráðstorgið og Obispo-göngugötuna.
Innifalið: Morgunverður og aðgangur að Byltingarsafni.


kuba_3.jpg

Föstudagur 23. október. Vindlaverksmiðja og á slóðir Hemingway   
Byrjað verður að heimsækja vindlaverksmiðju og fylgst með framleiðslunni þar. Þá ökum við til San Francisco de Paula, í útjaðri höfuðborgarinnar þar sem Hemingway bjó á fjórða og fimmta áratugnum. Fallegur garður með sundlaug er umhverfis húsið sem ber nafnið Finca Vigía. Ekki er leyfilegt að fara inn í húsið, heldur er gestum boðið að skoða það í gegnum opna glugga. Frá húsinu höldum við til sjávarþorpsins Cojímar, þaðan sem Hemingway fór oft á sjóstangaveiðar. Þar bjó Gregorio Fuentes, bátsmaður rithöfundarins, en Hemingway byggði persónu sína á honum í verki sínu Gamli maðurinn og hafið. Á leiðinni til baka stoppum við austan megin við Havanaflóa hjá Kriststyttu þaðan sem er glæsilegt útsýni yfir Gömlu Havana og höfnina.
Kvöldverður á veitingastað í Havana.
Innifalið: Morgun- og kvöldverður. Aðgangur að vindlaverksmiðju og safni. 

Laugardagur 24. október. Svínaflói og Cienfuegos
Við kveðjum nú Havana og höldum austur til Cienfuegos með viðkomu á Playa Girón á suðurströnd Kúbu. Á Playa Girón, eða Svínaflóa, átti sér stað misheppnuð innrás árið 1961 sem hafði mikilvæg áhrif á stefnu byltingarinnar. Innrás kúbverskra útlaga og CIA-liða var þar hrundið aftur af Fidel Castro og félögum. Í Playa Girón er lítið safn sem þessari sögu er gerð ágætis skil. Komið síðdegis til Cienfuegos. Kvöldverður og gisting á hótel Jagua by Melia í tvær nætur.
Innifalið: Morgun-, hádegis og kvöldverður. Aðgangur að safni.


kuba_cienfuegos.jpg

Sunnudagur 25. október. Minnismerki Che Guevara í Santa Clara
Eftir morgunverð er ekið norður til borgarinnar Santa Clara, þar sem við heimsækjum minnismerki og safn byltingarhetjunnar Che Guevara. Þessi frægi og gullfallegi argentínumaður var ráðinn upphaflega sem læknir í skæruliðahóp Fidel Castro en varð einskonar íkon og táknmynd byltingarinnar. Mörgum árum eftir að hann var drepinn í Bolívíu, voru jarðneskar leifar hans sendar til Kúbu og þeim komið fyrir í Santa Clara. Frá minnismerkinu liggur leið í miðbæ Santa Clara, þar sem okkur gefst tími til að rölta um og skoða Teatro la Caridad, glæsilegt leikhús frá 19. öld. Hádegisverður í Santa Clara áður en haldið er aftur til baka til Cienfuegos.
Innifalið: Morgun-, hádegis og kvöldverður. Aðgangur að safni og leikhúsi.


kuba_santa_clara.jpg

Mánudagur 26. október. UNESCO-borgin Trinidad
Dagurinn er helgaður borginni Trinidad sem er á heimsminjaskrá UNESCO og héraðinu þar í kring. Aksturinn þangað tekur um 90 mín suður fyrir Escambray-fjallgarðinn. Við byrjum að heimsækja eitt helsta sykurræktarhérað landsins og fræðumst þar um framleiðslu og þrælahald nýlendutímans. Þá er ekið til Trinidad en þessi 70 þúsund manna borg er eins og stórt útisafn bygginga frá 18 og 19 öld. Barokk-kirkjur, aðalsheimili sykurbaróna og steinlagðar götur bjóða gesti velkomna aftur í fortíðina.
Við skoðum m.a. lítið safn sem tengist sögu staðarins og kirkju heilagrar þrenningar við aðaltorgið. Hádegisverður í Trinidad áður en haldið er áfram austur til borgarinnar Camaguey.
Gist á Gran Hotel Camaguey um nóttina.
Innifalið: Morgun-, hádegis og  kvöldverður. Aðgangur að safni.


kuba_trinidad.jpg

Þriðjudagur 27. október. Ekið til Santiago með viðkomu hjá Meyjunni í Cobre
Ekið snemma austur til Santiago-borgar þar sem gefur að líta fallega náttúru og hæsta fjallgarðs Kúbu, Sierra Maestra. Mikil misskipting, efnahags- og pólitískur óstöðugleiki einkenndu austurhluta eyjunnar fyrir 1959. La gente del Oriente, eða Austurbúar, hafa jafnan haft forystu í byltingartilraunum landsins í gegnum árin, m.a. í sjálfstæðisstríðinu gegn Spánverjum. Í þessum róstursama pólitíska hluta fæddist líka Fidel Castro. Þar hóf hann baráttu sína og dvaldi ásamt félögum í Sierra Maestra í skæruhernaði gegn einræðisherranum Fulgencio Batista. Áður en komið er til Santiago stoppum við í þorpinu Cobre og heimsækjum Meyjuna – verndara Kúbu. Eftir byltingu féll kaþólska kirkjan í ónáð og byltingin sjálf varð einskonar staðgengill opinberra trúarbragða. Meyjan í Cobre hefur þó alltaf verið í hávegum höfð og skartar sínu fínasta í kirkju bæjarins.
Kvölverður og gisting á hótel Melia Santiago.
Innifalið: Morgun-, hádegis og  kvöldverður. Aðgangur að kirkju/safni.


kuba_santiago_1.jpg

Miðvikudagur 28. október. Santiago-borg
Skoðunarferð um helstu kennileiti Santiago. Við byrjum á að heimsækja Moncada-virkið sem markaði upphaf byltingar Fidel Castro árið 1953. Í miðbænum skoðum við hús fyrsta landstjóra Kúbu, Diego Velázques, megintorg borgarinnar, áður en við höldum út að hafnarminni Santiago þar sem spænskt nýlenduvirki heilags Péturs stendur. Eftir hádegismat verður komið við í kirkjugarðinum Santa Ifigenia þar sem jarneskar leifar Fidel Castro og sjálfstæðishetjunnar José Martí eru að finna. 
Kvöldverður á veitingastað og aftur gist á hótel Melia Santiago.
Innifalið: Morgun-, hádegis- og kvöldverður. Aðgangur að söfnum.

kuba_santiago_2.jpg

Fimmtudagur 29. október. Holguin, Biran og Playa Pesquero
Eftir morgunverð er ekið norður í átt að Holguin með viðkomu í Birán sem er fæðingarstaður Castro bræðra. Í Holguin munum við borða hádegismat ásamt því að fá frían tíma til að rölta um miðbæinn. Þá er haldið áfram norður að ströndinni Playa Pesquero. Þar er gist í þrjár nætur á hóteli í þægilegu umhverfi. Glæsileg strönd liggur við hótelið og auðvelt að vaða langt í sjó fram.
Gist á hótel Iberostar Holguin í þrjár nætur með öllu inniföldu.
Innifalið: Morgun-, hádegis- og kvöldverður og "allt innifalið" á  Iberostar Holguin.  Aðgangur að safni.


iberostar_holguin2.jpg

Föstudagur 30. október og laugardagur 31.október
Frjálsir dagar  til að njóta lífsins í Playa Pesquero.

Sunnudagur 1. nóvember 
Farið frá hóteli á flugvöll í Holguin. Brottför til  kl. 11:35 og lent í Toronto kl. 15:30.  Kvöldflug frá Toronto og lent í Keflavík kl. 06:10 á mánudagsmorgni 2.nóvember.

Sjá nánar í ferðalýsingu

Frestað um ár

Fyrirhuguð er ferð á sama tíma haustið 2021. Vinsamlega hafið samband til að fá nánari upplýsingar. Hægt er að senda okkur tölvupóst á info@vita.is eða hringja í síma 570-4444.

Hafa samband
  • Hagnýtar upplýsingar

  • Verð og innifalið

Gististaðir

Sjá alla gististaði
  • Veðrið

  • Flugtími

    Kef VRA

    Eftirmiðdagsflug

  • Gjaldmiðill

    $

    Dollar

    Gengi

Sjá Kortasýn Sjá gististaði

Við notum vefkökur (e.cookies) t.d. til að greina umferð um vefinn og til að bæta upplifun notanda á síðunni. Með því að halda áfram að vafra um síðuna samþykkir þú vefkökuskilmála VITA

Nánari upplýsingar um vefkökunotkun