fbpx Sex landa sýn | Vita

Sex landa sýn

Frá Amsterdam til Rómar

Siglingin er uppseld

Hafa samband

Myndagallerí

Sex landa sýn. Frá Amsterdam til Rómar 

Celebrity Apex
Fararstjórar:  Svanhildur Davíðsdóttir og Karl Rafnsson

Amsterdam, Hollandi – Bordeaux, Frakklandi – Bilbao og La Coruna, Spáni – Portó og Lissabon, Portúgal - Sevilla, Spáni – Gíbraltar, Bretlandi - Cartagena, Spáni – Róm, Ítalíu.


celebrity_reflection_20.jpg

Stutt ferðalýsing

Flogið að morgni 9. September til Amsterdam, þar sem gist er í tvær nætur fyrir siglingu. Þann 11. september er siglt af stað með Celebrity Apex. Fyrsta stopp er Bordeaux í Frakklandi, þar er stoppað yfir nótt. Næst er  komið til Bilbao og síðan La Coruna á Spáni. Síðan er það Portúgal,  Portó og síðan Lissabon. Næsta dag er komið til Cadiz sem er hafnarborg við Sevilla, eftir að það er siglt um Gibraltasund inn í Miðjarðarhafið og komið til hafnar í Gíbraltar.  Siglt er norður með strönd Spánar og farið í land í Cartagena. Einn dagur á sjó áður en komið er til Civitavecchia á Ítalíu og ekið til Rómar þar sem síðustu þremur dögunum er eitt í þessari ferð.

Flugtafla

Flug Dagur Brottför kl. Koma  kl.
FI 500 9.september Keflavík 07:40 Amsterdam 12:55
KL1598 26. september Róm 10:20 Amsterdam 12:55
FI 501 26.september Amsterdam 14:10 Keflavík 15:25 

Siglingarleið

Dagur  Áfangastaður  Koma  Brottför
11. september Amsterdam, Hollandi    17:00
12. september Á siglingu    
13. september Bordeaux (La Rochelle), Frakklandi 17:00  
14. september Bordeaux (La Rochelle), Frakklandi   17:00
15. september Bilbao, Spáni 07:00 17:00
16.september La Coruna, Spáni  08:00 17:00
17. september Portó, Portúgal 08:00 17:00
18. september Lissabon, Portúgal  08:00 17:00
19. september Sevilla(Cadiz), Spáni  09:30 19:00
20. september Gibraltar, Bretland  07:00 17:00
21. september Cartagena,Spáni  09:00 18:00
22.september Á siglingu    
23. september Róm (Civitavecchia), Ítalíu  05:00  

 


celebrity_reflection_4000x1595.jpg

 

Skipið 
Celebrity Apex er nýjasta farþegaskip Celebrity Cruises, það annað í nýjum Edge-flokki skipafélagsins og fór í jómfrúarferð sína 2020. Þetta nýja skip mun breyta því hvernig við ímyndum okkur siglingar með farþegaskipum, meðal annars með nýju úrvali klefa sem standa gestum til boða.

Með Celebrity Apex eru mörkuð tímamót í því hvernig við nálgumst skipahönnun. Hvert einasta skref við hönnunina, frá fyrstu skissum upp í sýndarveruleika, var unnið í þrívídd. Hönnunin á skipinu er í algjörum sérklassa og á það bæði við um tveggja hæða klefana með sundlaugum á Edge-farrýminu þar sem útsýnið er ótakmarkað, og Töfrateppið (Magic Carpet) sem líkt og hangir utan á skipinu. Gestum býðst með þessu áður óþekkt upplifun af nálægðinni við hafið og viðkomustaðina og á það jafnt við um Edge-klefana með Infinite-veröndum og sundlaugaþilfarið þar sem útsýnið yfir hafið og viðkomustaðina er engu líkt.


amsterdam_almennt_1.jpg

Ferðatilhögun

Föstudagur 9.september  Keflavík  - Amsterdam
Flogið með Icelandair í morgunflugi til Amsterdam  frá Keflavík áætluð lending er kl. 12:55 rútan bíður eftir hópnum og ekið er á hótel Best Western Plus Plaza sem er í bænum Almere sem er stutt frá Amsterdam.  Eftir að hafa bókað inn á hótelið og fengið sér hressingu er gengið niður að síkinu og farið í kvöldsiglingu um síki  Amsterdam með víni og snakki.

Amsterdam
Fáar evrópskar borgir búa yfir jafn einfaldri en um leið fágaðri fegurð og Amsterdam. Borgin er helst þekkt sem heimabær reiðhjólsins og er fræg fyrir hið nafntogaða Rauða hverfi en hún hefur upp á svo miklu meira að bjóða. Í Amsterdam færðu að uppgötva rólegan stað þar sem heimafólk upphefur gleðina sem felst í einfaldleikanum. Hér gefst tækifæri til að skoða borgina í rólegheitum og njóta þess að skoða allt það helsta í borginni. Listhneigðir sem ferðamenn munu elska að skoða verk eftir fræga listamenn eins og Van Gogh, Vermeer og Rembrant sem eru sýnd á fjölmörgum listasöfnum borgarinnar. Mikilvægur viðkomustaður er hið fræga Van Gogh safn en þar er gefin innsýn í tregafulla og ótrúlega sögu snillingsins. Það kemur kannski ekki á óvart að ein besta leiðin til að skoða borgina sé á reiðhjóli en það er mjög skemmtilegt að hjóla meðfram sýkjunum eða hjóla um borgina og leita að vindmyllum. Stoppaðu á kaffihúsi (sem þýðir eitthvað allt annað þarna um slóðir en þú átt að venjast) en þar færðu að kynnast einstakri menningu borgarinnar. Þú gætir líka eytt deginum í að rölta á milli gallería eða fara í skoðunarferð í ginverksmiðju. Það er svo sannarlega margt hægt að skoða og upplifa í Amsterdam. 


amsterdam_holland_2.jpg

Laugardagur 10. september Amsterdam
Eftir morgunverð er farið í hálfs dags ferð um Amsterdam. Ekið um Amsterdam vítt og breitt. Fallegar húsalengjurnar meðfram síkjunum og hallir við Dam torgið og margt fleira skoðað.


amsterdam_almennt_2.jpg

 

Sunnudagur 11. september. Amsterdam – Celebrity Apex
Undir hádegi er ekið niður að höfn og farið um borð í Celebrity Reflection sem heldur af stað í siglinguna kl.17:00. Farið um borð rétt eftir hádegi og fylgst með þegar skipið siglir frá Amsterdam. Um kvöldið bíður glæsilega máltíð og skemmtun.

Mánudagur 12. september. Á siglingu 
Fararstjóri fer í kynnisferð um skipið til að enginn missi af neinu. Njótið þess að skoða skipið og svo má t.d. leggjast á sólbekk við sundlaugina og smakka hina litskrúðugu og ljúffengu kokteila sem barþjónarnir blanda. Svo má fara í búðir, á málverkauppboð, eða kannski á matreiðslunámskeið, danskennslu eða sækja fyrirlestur. Matur og drykkur allan daginn, svo bíða 3ja rétta kvöldverðir og glæsilegar sýningar á kvöldin.


loire_tours_france.jpg

Þriðjudagur 13 og miðvikudagur 14. september. Bordeaug (La Rochelle) Frakkland 
La Rochelle er hafnarborg í Frakklandi og stendur við Biskajaflóa. Hún er höfuðstaður Charente-Maritime. Borgin er tengd við Réeyju um brú sem lokið var við að reisa árið 1988. Íbúafjöldi er tæp 80 þúsund. Falleg borg við sögulegt hafnarsvæði sem einkennist af turnum við innsliglinguna. Celebrity Apex liggur við bryggju yfir nótt og leggur ekki af stað fyrr en kl. 17:00 á miðvikudegi.

 


bilbao_guggenheim.jpg

Fimmtudagur 15.September  Bilbao, Spáni
Bilbao er fjölmennasta borg Baskalands og höfuðstaður Biskajahéraðs, á Norður-Spáni, skammt frá landamærum Frakklands.
Bilbao hefur umbreyst úr einskonar ljótum andarunga í fagran svan síðustu ár. Hún hefur fengið róttæka andlitslyftingu, gengið í gegnum mikla lýtaaðgerð þar sem borgarskipulag hefur verið bætt og ýmiskonar grunnvirki endurnýjuð. Þessar borgarbætur hafa verið drifkraftur endurreisnar og nýs lífs fyrir íbúa og gesti. Ferðaþjónusta hefur blómstrað hin síðari ár af þessum sökum. Í reynd má segja að ný Bilbao hafi þannig risið úr rústum iðnaðarkreppu níunda áratugar síðustu aldar og umbreyst í fallega og mannvæna borg. Þar ber hæst hið útlitsfagra Guggenheim-safn eftir Kanadamanninn Frank O. Gehry. En fleiri byggingarlistardjásn hafa orðið til. Ráðstefnu- og tónlistarhöllin Euskalduna er í þeim hópi. Einnig nýtt jarðlestakerfi sem breski arkitektinn Norman Foster hannaði. Santiago Calatrava, frægasti núlifandi arkitekt Spánverja, teiknaði nýja flugstöð við flugvöllinn skammt utan borgarinnar. Eftir hann er einnig Zubizuri – Hvíta brú – en hún bættist fyrir nokkrum árum við þær brýr sem liggja yfir Nervión-fljót í borginni. Á bökkum þess, skammt frá  Guggenheim og Hvítu brú, gnæfa og ný háhýsi eftir þá Arata Isozaki frá Japan og César Pelli frá Argentínu. Margt fleira er nýtt af nálinni eða uppgert og endurbætt.
Bilbao stendur í kvos meðal iðjagrænna hæða. Áðurnefnt Nervión-fljót rennur í gegnum hana. Í fljótinu gætir sjávarfalla og skipgengt er upp til borgarinnar. Fyrr á tíð var höfn þar en hún var færð til strandar.


celebrity_reflection_5.jpg

Föstudagur 16. september. La Coruna, Spáni 
A Coruña er borg og sveitarfélag í sjálfstjórnarhéraðinu Galisíu á norður-Spáni. Borgin liggur við Ártabro-flóa og er mikilvæg höfn. Hún er sú næststærsta í héraðinu og telur um 245.000 íbúa. Borgin tilheyrir ennfremur samnefndri sýslu.
Borgin hefur upp á margt að bjóða þó hún sé ekki eins þekkt og Madríd eða Barcelóna. Borgin er þægileg yfirferðar. Hjólaferðir og fallegar strendur eru tákn um hversu lífið er einfalt og þægilegt. Menning og listir eru einnig miklar í þessum falda gimsteini sem borgin er og hægt að feta í fótspor Picasso á æskuheimili hans.  Eins og í öðrum Spönskum borgum er hæt að gleyma sér í drykkjum, tapas og eiga góða stund í La Coruna

Laugardagur 17. september Portó, Portúgal 
Portó er höfuðstaður norðurhluta Portúgal og er næststærsta borg landsins. Þegar kemur að vinsælum kennileitum í borginni má segja að hún einkennist af áhugaverðum samhljómi hins forna og hins nýja. Borgin er bæði höfuðborg og aðkomuleið til Norður-Portúgals en landið er bæði nefnt eftir borginni og sterkt heimsþekkt vín, púrtvín (e. port), tók einnig nafn sitt frá borginni. Landfræðileg staðsetning borgarinnar er stórkostleg en hún liggur við mynni árinnar Douro. Byggingarlist borgarinnar er í sérflokki þegar kemur að gæðum og sögulegur kjarni borgarinnar var settur á heimsminjaskrá UNESCO  árið 1996.

 


lissabon_lisbon_portugal_1.jpg

Sunnudagur 18 september. Lissabon, Portúgal
Sagt er að besta leiðin til að kynnast borginni sé að villast í gamla borgarhlutanum. Dásamlegt er að rölta um hin þröngu steinlögðu stræti. Ekki er verra að detta inn á Art Noveau kaffihúsin við Rossio og Praca do Commercio eða önnur þjóðsöguleg kaffihús og horfa í kring um sig á mannlífið. Skoða forna listmuni og nútímalist á söfnum á borð við Gulbenkian safnið, Nútímalistasafnið, Berardo hönnunarsafnið og öðrum víðfrægum söfnum. Hér úir og grúir af menningu, vilji maður það við hafa. Hér eru líka allskonar verslanir út um allt, verslunarmiðstöðvar og ótrúlegir flóamarkaðir og sérbúðir í bland við hátískuna.
Að nálgast Lissabon af hafi, eða sunnan yfir "25. apríl brúna" og upplifa hvernig borgin breiðir út faðminn móti komumanni, er mynd sem enginn getur gleymt sem upplifað hefur. Þá skilur maður gælunafnið sem hún fékk á öldinni sem leið - Hvíta perlan í suðri.
Íslenskir salt- og saltfisk- kaupmenn, sem þangað sóttu voru líka metnir sem þjóðhöfðingjar - mennirnir frá eyjunni norðlægu, þaðan sem besti saltfiskurinn kom - saltfiskurinn sem skyldi verða jólamáltíðin. Gilti þá einu hvað einvaldurinn og harðstjórinn Antonio de Oliveira Salazar lagði á þjóð sína af klöfum og harðræði.
Hann ákvað að "Bacalao Islandia" skyldi verða á borðum ríkra og fátækra á jólum.


sevilla_almennt_3.jpg

Mánudagur 19. September Sevilla (Cadiz) Spáni
Celebrity Reflection kemur til Cadis sem er falleg lítil hafnarborg staðsett á suðvestur strönd Spánar sem gaman er að heimsækja í aðeins um klukkustundar akstri frá Sevilla.
Sevilla, höfuðborg Andalúsíu á Suður-Spáni, er þróttmikil og lifandi borg sem hefur upp á margt að bjóða, m.a. byggingarlist, frábæran mat og skemmtilegar hátíðir.
Vinsælasta hverfið fyrir ferðamenn er Santa Cruz, fegursta og mest heillandi hverfi borgarinnar. Þú getur þrætt þröngar steini lagðar götur milli kalksteinshúsa og tyllt þér niður fyrir utan bar, gætt þér á tapas og fylgst með heiminum líða hjá, eða rölt um aldagamla garða og tyllt sér á fallegan bekk.
Santa Cruz hverfið liggur að Calles Mateas Gago, Santa Maria La Blanca/ San José, Jardines de Murillo og Alcázar hverfunum. Það var áður hverfi gyðinga, og sumar kirkjanna voru áður bænahús gyðinga. Frá Patio de Banderas torgi er ógleymanlegt útsýni yfir dómkirkjuna í Sevilla.
Dómkirkjan er mikilfengleg á að líta og að rúmmáli stærsta kristna kirkja veraldar. Upp úr kirkjunni stendur bænaturninn Giralda, sem márar reistu á 12 öld, en hann státar af 25 kirkjuklukkum og óviðjafnanlegu útsýni yfir borgina, svo það er vel þess virði að leggja á sig gönguna upp í 90 metra háan turninn.


gibraltar_sigling_skemmtisigling_utsyni.jpg

Þriðjudagur 20. september. Gíbraltar, Bretlandi 
Þó að Gíbraltar sé aðeins lítill skagi við suðurenda Costa del Sol á Spáni hefur þessi útvörður breska heimsveldisins gegnt veigamiklu sögulegu hlutverki vegna klettsins fræga því að þaðan sést yfir tvö hafsvæði og tvær heimsálfur.


cartagena_spain_1.jpg

Miðvikudagur 21. september. Cartagena, Spáni
Hafnarborgin Cartagena liggur á suðausturströnd Spánar, umlukin fimm hæðum sem mynda náttúrulegt hafnarstæði. Cartagena, eða Nýja-Karþagó, var höfuðvígi Karþagómanna þegar þeir réðu lögum og lofum á Spáni fyrir Krist og nefndu þeir hana því eftir höfuðborg sinni. Sagan, allt aftur til fornaldar, drýpur því af hverju strái á hafnarsvæðinu. Borgin er umlukin múrum, virkisveggir umkringja höfnina og víða má sjá rómverskar rústir.
Það er heillandi og því gott að gefa sér góðan tíma til að rölta eftir þröngum götunum sem eru svo einkennandi fyrir gamla bæjarhlutann eða slaka bara á og setjast niður á einu af kaffihúsunum, börunum eða veitingastöðunum við sjávarsíðuna.


celebrity_reflection_6.jpg

Fimmtudagur 22. september. Á siglingu
Síðasta dagsins er notið á skipinu. Hvort sem kosið er að vera úti á dekki í sólinni og láta stjana við sig og skemmta af starfsfólki skipsins eða vera innandyra þar sem margt er um að vera, hvort sem er útsölur á göngugötunni, taka á því í ræktinni, láta stjana við sig í nuddi eða öðru í heilsulindinni. Einnig er hægt að njóta þess að vafra um skipið.


celebrity_constellation_rome_vatican_st_peters_basilica_1.jpg

Föstudagur 23. september. Róm ( Civitavecchia) Ítalíu
Komið til hafnar í Civitavecchia snemma morguns og þegar komið er frá borðið bíður rútan og ekur með hópinn inn til Rómar. Þegar komið er til Rómar er byrjað á því að skoða Vatíkansafnið sem hýsir stórkostlegustu verk klassíska tímans og endurreisnarinnar. Úr Vatíkansafninu er gengið í Sixtínsku kapelluna þar sem margrómuð verk endurreisnarinnar prýða veggina. Stórkostlegastar af þeim öllum eru loftmynd Michelangelos af sköpun heimsins og mynd hans af dómsdegi á gaflinum fyrir ofan altari páfa. Að skoða þessi verk er vart með orðum lýst. Þaðan er gengið í eina stærstu og fegurstu kirkju kristninnar, Péturskirkjuna, sem er helgasta kirkjan í kaþólskum sið og reist yfir gröf Péturs postula. Þá er ekið til hótels og tékkað inn. Gist er á Morgana hotel næstu 3 nætur.


celebrity_constellation_europe_trevi_fountain_rome.jpg

Róm
Fáar borgir vekja aðra eins aðdáun og heilla jafn mikið og Rómarborg þar sem fortíð og nútíð renna saman á einstakan máta.
Borgin eilífa hefur hún verið kölluð og ber nafn með rentu. Rómaborg hefur um aldir verið sögusvið keisara, páfa og pílagríma sem lagt hafa leið sína til borgarinnar í gegnum aldirnar. Engin borg stenst samanburð við Róm þegar kemur að sögufrægum stöðum og byggingum. Hér er Péturskirkjan, Vatíkanið, Sixtínska kapellan með stórkostlegum málverkum eftir Michelangelo og aðra listamenn, Rómartorgið eða Foro Romano, Kólósseum, Panþeon og Navónutorg.
Hér skópu frægustu meistarar endurreisnarinnar og barrokktímans sín fegurstu verk sem gera borgina að risavöxnu listasafni. Róm er líka borg hinna glæsilegu gosbrunna og er Trevíbrunnurinn líklega þekktastur eftir að Fellini notaði hann í atriði í mynd sinni Hið ljúfa líf, La Dolce Vita.
Í Rómarborg er meira að skoða en í nokkurri annarri borg í heiminum og aðeins er hægt að krafla í yfirborðið á fáum dögum. Helsti kostur borgarinnar er þó að stutt er á milli allra áhugaverðu staðanna en það er þægilegt að ganga í Róm og alls staðar eru garðar og torg til að hvíla lúin bein.
Róm er líka ein af háborgum tískunnar og engir eru Ítölum fremri þegar kemur að hönnun og tísku. Það er gaman að versla í Róm, hvort sem er í verslunum heimsfrægra hönnuða, eða í freistandi sérverslunum við Spænsku tröppurnar eða á hinum líflega flóamarkaði, Porta Portese.

 


celebrity_constellation_colosseum_rome_1.jpg

Laugardagur 24. september. Róm
Skoðunarferð: Hálfs dags ferð að skoða Kólosseum og Forum Romanum.
Ekið er að voldugasta hringleikhúsi heims, Kólosseum. Það er í senn tákn borgarinnar en einnig þess tíma þegar þrælar og kristnir menn þurftu að berjast fyrir lífi sínu meðan æstur múgurinn hrópaði á meira blóð. Bygging Kólosseum hófst rúmlega 70 e. kr. en talið er að féð til byggingarinnar hafi komið úr ránsfeng úr musteri gyðinga í Jerúsalem. Þegar mannvirkið er skoðað undrast maður tækni og listfengi Rómverja fyrir tvö þúsund árum. Frá Kólosseum er gengið út á gamla rómverska torgið, Forum Romanum, þar sem fornminjarnar eru skoðaðar, en þetta er eitt stærsta fornleifasafn heims og allt utanhúss. Þaðan er gengið upp á Kapitolhæð þar sem m.a. ráðhús Rómar stendur í dag. Ekið til baka á hótelið, en þeir sem vilja geta verið eftir í bænum og farið heim á eigin vegum.


celebrity_constellation_rome_vittorio_emanuele_monument_2.jpg

Sunnudagur 25. september. Róm
Tökum daginn rólega. Ekki er skipulögð skoðunarferð.


celebrity_reflection_19.jpg

Mánudagur 26. september. Heimferð
Tékkað út af hótelinu og ekið út á flugvöll.  Flogið með KLM til Amsterdam og síðan áfram til Keflavíkur. Brottför frá Róm er áætluð kl. 10:20 og eftir stopp í Amsterdam er lent í Keflavík kl. 15:25

Sjá nánari ferðalýsingu
  • Hagnýtar upplýsingar

  • Verð og innifalið

Gististaðir

Kort

Sjá alla gististaði
  • Veðrið

  • Flugtími

    Kef AMS

    4 klst

    Morgunflug

  • Gjaldmiðill

    Evra

    Gengi

Sjá Kortasýn Sjá gististaði

Við notum vefkökur (e.cookies) t.d. til að greina umferð um vefinn og til að bæta upplifun notanda á síðunni. Með því að halda áfram að vafra um síðuna samþykkir þú vefkökuskilmála VITA

Nánari upplýsingar um vefkökunotkun