Hagnýtar upplýsingar

Ferðamannaskattur

Ferðamannaskatturinn í Val di Fiemme er ekki innifalinn í verði ferðarinnar. Hann greiðist á hóteli við brottför. Skatturinn er 2,5 Evrur á mann á nótt.
Gildir aðeins fyrir 14 ára og eldri. 

Flug:

Í leiguflugi er flogið til Verona á Ítalíu og tekur flugið um 4 klst.
Hver farþegi má hafa með eitt par af skíðaútbúnaði til og frá Verona, mest 10 kg. Skíðaútbúnaður má vera taska með skíðum eða bretti og skóm. 
Ferðataska má vera 20 kg og svo almennur handfarangur skv. reglum Icelandair. 

Í áætlunarflugi er flogið til München og tekur flugið 3 1/2 klst.
Bóka þarf og greiða 3.800 kr. fyrir flutning á skíðum í áætlunarflug og sömu reglur um farangur gilda. 
​Farþegar sem fljúga til München og heim í leiguflugi frá Verona fá flutning á skíðum aðra leið.
Skíðin er hægt að bóka um leið og ferðina og velja eins og aukaþjónustu eins og t.d. akstur til og frá flugvelli.

Akstur við komu: 

Fararstjórar VITA eru á flugvellinum í Verona og aðstoða farþega sem hafa keypt akstur við að finna sína rútu/bíl. Fararstjóri er staðsettur í Selva og er með þjónustusíma sem farþegar í Val di Fiemme geta hringt í vanti þá aðstoð og/eða upplýsingar. Annars er bent á starfsfólk í gestamótttöku hótelanna. Ferðin tekur um þrjár klst. og er stoppað einu sinni á leiðinni svo fólk geti farið á snyrtingar og fengið sér hressingu. Athugið að ekki er leyfilegt að vera með opin drykkjarföng eða mat í rútunum.

Hótelin:

Við komu á hótel þarf að afhenda vegabréf og er því skilað síðar sama kvöld eða daginn eftir. Við komu í matsal fyrsta kvöldið er rétt að bíða eftir þjóni eða yfirþjóni og er fólki þá vísað  til borðs sem það hefur síðan út vikuna.  Drykkjarföng getur fólk geymt milli daga. Morgunverður stendur frá kl. 7:30 eða 8:00 til kl. 9:00 eða 10:00 (aðeins mismunandi milli hótela).  Kvöldverður er frá kl. 18:30 eða 19:30 til kl. 21:00 eða 21:30. 
Mismunandi er hvenær heilsuaðstaða hótela er opin, en yfirleitt opnar hún um kl. 16:00 og er opin til kl. 18:30 til 19:30. Aðgangur barna yngri en 14-15 ára er yfirleitt bundin því að þau séu í fylgd foreldra og þess gætt að ekki er um leiksvæði að ræða. Einstaka hótel leyfa ekki börn  á heilsusvæðinu. 
Allir gestir eru hvattir til að nota öryggishólf á herbergjum. Yfirleitt er ekki minibar á herbergjum en víðast hvar er hægt að fá einn slíkan sé þess óskað. Mörg hótelanna hafa kæliskápa í herbergjum.  Kranavatnið á hótelunum er gott og öllum er óhætt að drekka það. 
 

Heilsulind: 

Yfirleitt bjóða ítölsku skíðahótelin upp á heilsulind. Ætlast er til að fólk sitji á handklæðum í sána klefanum og hafi hugfast að heilsulindin er fyrst og fremst hvíldarsvæði en ekki leikvöllur barna. Á sumum hótelum er aldurstakmark í heilsulindina sem miðast við 14 ára aldur.

Skíðapassar:

Hér má sjá verð á skíðapössum.

Gott að hafa í huga þegar farið er í fjallið:

Muna skal að hafa með varaáburð og sólarvörn. Það taka ekki allir veitingastaðir í fjöllunum við greiðslukortum og því gott að hafa reiðufé með í för. Skylda er fyrir alla 14 ára og yngri að hafa skíðahjálma. Að sjálfsögðu er mælt með því að allir noti hjálm. Góð sólgleraugu og skíðagleraugu eru nauðsynleg. Skíðagrímu er gott af hafa ef spáð er köldu veðri.  Aldrei skal stöðva undir blindhæð. Muna skal að skíða með aðgát og hafa í huga að sá sem er neðar í brekkunni á alltaf réttinn. Ekki drekka kranavatn á veitingastöðum eða lyftustöðvum í fjallinu. Ráðlagt er að vera alltaf með símanúmer fararstjóra í farsímanum - ef eitthvað skyldi bera útaf.

Skíðaleiga og Skíðaskóli:

Ef áhugi er á skíðakennslu til að skerpa á kunnáttunni eða leigja útbúnað er hægt að lesa sér til um framboðið hér. Farþegar VITA í Val di Fiemme eru á Pampeago skíðasvæðinu. 

Skíðabúnaður:

Það eykur ánægju ykkar að hafa skíðabúnaðinn í góðu lagi og rétt stilltan, það er misskilningur að það sé verra að hafa vel áborin skíði, það er mun auðveldara að skíða ef þau renna vel. Boðið er upp á að brýna kanta og bræða undir skíði í mörgum verslunum í Pampeago. Það er góð venja að þurrka skíðaskóna á hverju kvöldi. Þar sem góð aðstaða er á hótelum er nóg að setja skóna á þurrkstandinn, þar sem það er ekki fyrir hendi getur verið nauðsynlegt að taka innri skóinn og þurrka hann upp á herbergi.
Þegar stoppað er í fjallinu í hádeginu og kaffitímum er mikilvægt að ganga vel og snyrtilega frá skíðunum, láta þau ekki liggja eftir í snjónum heldur setja þau í skíðastatífin. Gott getur verið að víxla skíðunum við ferðafélagann svo þau verði ekki tekin í misgripum.

Tímamismunur: 

Ítalía er einni klukkustund á undan Íslandi á veturna og tveimur tímum á undan á sumrin.

Tryggingar

Frá og með 1.janúar 2022 er skylda að allir skíðamenn hafi ábyrgðartryggingu í fjallinu, ef þeir valda slysi á öðrum. Mikilvægt er því að hafa samband við ykkar tryggingar til að kanna hvort slík ábyrgðartrygging sé innifalin. Ef hún er innifalin þarf að fá staðfestingu á henni, sem gæti þurft að framvísa í fjallinu og því mikilvægt að hafa hana við hendi. Einnig er hægt að kaupa ábyrgðartryggingu þegar komið er út og kostar hún 3-4 evrur fyrir hvern dag í fjallinu og þarf að virkja hana við skíðapassann.  Við ráðleggjum einnig að allir hafi meðferðis evrópska tryggingakortið eða staðfestingu frá tryggingarfélagi varðandi ferða- og slysatryggingar. 

***Við bendum á að gott er að vera búin að kynna sér tryggingarskilmála hjá ykkar tryggingarfélagi og fá ráðleggingar hjá fagmönnum hvað hentar best. Þar sem reglur og skilmálar geta verið mjög misjafnir og jafnvel þörf á að kaupa viðbótartryggingu í einhverjum tilfellum. Mikilvægt er að vera með góðar tryggingar. 

Greiðslukort og hraðbankar:

Hraðbankar eru mjög víða og lang flestir þjónustuaðilar og verslanir á Ítalíu taka öll helstu kreditkort. Ekki er hægt að treysta því að hægt sé að greiða fyrir vöru eða þjónustu með debetkorti, en að sjálfsögðu er hægt að taka pening út úr hraðbönkum, hvort sem er út á kredit- eða debetkort.

Allir skíðafarþegar VITA fá 20% afslátt hjá Everest ferða- og útvistaverslun ef keyptur er skíðabúnaður eða skíðafatnaður, með því að framvísa staðfestingu á skíðabókun frá VITA fyrir veturinn 2022-2023. Verslunin er staðsett í Skeifan 6, 108 Reykjavík