fbpx Vor í Egyptalandi | Vita

Vor í Egyptalandi

Lifandi og spennandi

Ferðir
Flug
Báðar leiðir
Aðra leið

Myndagallerí

Vorferð til Egyptalands

Kairó -  Aswan - Abu Simbel – Luxor og Alexandría og sigling á Níl.
7. – 20.maí 2020
Fararstjóri: Sr. Þórhallur Heimisson

Að ferðast til Egyptalands er að halda á vit menningar sem teygir sig meira en 5000 ár aftur í tímann og er jafn fjölbreytt eins og landslagið og náttúran og umhverfið sem hana mótaði og mótar enn. Um leið er egypska menningin jafn lifandi og spennandi og margbreytileg í dag eins og hún hefur verið um aldir.
Hér er að finna Pýramídana, musteri Faraóana, Egypska safnið í Kaíró, dal konunganna í Luxor, ánna Níl, helgistaði múslíma, koptísku kirkjuna, ægifagra eyðimörkina og markaðina þar sem öllu ægir saman, en í Egyptalandi búa í dag um 100.000.000. Hér eru fornminjar á hverju götuhorni og undir hverjum steini. Frá Egyptalandi komu margar sögupersónur bæði Biblíunnar og Kóransins. Á meðan Evrópubúar lifðu í hellum, veiddu með steinöxum og vöfðu sig dýrafelldum til hita, blómstraði hin forna menning Egypta. Stórkostlegar hallir, musteri og hof voru reist guðunumm til dýrðar, til að viðhalda skipulagi heimsins og til að leiðbeina sálunum á leið til dauðraríkisins -  og myndletrið færði sögur og helgisagnir Egypta á papýrus.

Níl var virkjuð og áveituskurðir grafnir til að vökva frjósamt landið. Til landsins streymdi auður í árþúsundir. Á siglingu um Níl gefst ferðalang tækifæri til að upplifa leyndardóma landsins og til að skoða musterin í Edfu, Luxor og stórvirki Ramsesar II faraós við Abu Simbel – að ekki sé minnst á hinar rómversku menjar, en Júlíus Sesar lagði Egyptaland undir Róm og breytti því í matarkistu heimsveldisins um aldir. Hér var Gamla testamentið fyrst þýtt á grísku fyrir eitt elsta samfélag gyðinga í heiminum utan Ísrael. Hér er að finna kjarnaland hinnar kristnu menningar. Frá Al Qahira – Kaíró – Hinni sigursælu borg – ríktu kalífarnir yfir óendanlegu heimsveldi. Tyrkir, Frakkar, Bretar, Þjóðverjar, allir börðust þeir um Egyptaland og reyndu að ríkja yfir því.
Og þannig mætti lengi telja. En umfram allt er Egyptaland vafið dulúð náttúrunnar, ægifagurt, allt frá kóralrifum Rauða hafsins til óendanlegra tindrandi vídda eyðimerkurinnar þar sem tíbráin lyftir landinu og himinn og jörð verða eitt. 

Flugtímar:

Dagur Flugnúmer Brottför Kl. Koma Kl.
 7.maí BA 801 Keflavík 10:50 Heathrow 14:45
 7.maí BA 155 Heathrow 17:15 Cairo 23:15
20.maí BA 154 Cairo 08:00 Heathrow 12:10
20.maí FI 455 Heathrow 20:50 Keflavik 22:55

egyptaland_pyramidar.jpg

Miðvikudagur 7.maí. Keflavík - Kairó.
Reiknað með að fljúga frá Íslandi kl. 10:50, millilenda í London og lenda í Kaíró kl. 23:20.
Flugfélögin eru ekki komin með sína áætlun út, en byggt er á flugi frá 2019.
Egypskur leiðsögumaður tekur á móti hópnum og fylgir á hótelið. Gist er á hótel Conrad, sem er 5stjörnu hótel á bökkum Nílar.


egyptaland_nil_falukas.jpg

Fimmtudagur 8.maí. Kairó – Egypska safnið 
Eftir morgunverð á hótelinu förum við í skoðunarferð um Kairó. Kairó er höfuðborg Egyptalands og 15 stærsta borgarsvæði í heimi, með um 18.000.000 íbúa. Sú borg sem nú stendur var gerð að höfuborg undir veldi Fatamida, árið 969, en var það löngum fyrr einnig. Borgin varð snemma miðstöð kristninnar og hélt því allt til ársins 640 þegar múslímar lögðu hana undir sig. Enn er að finna stórt samfélag kristinna í Egyptalandi, um 8% íbúanna. Leiðin liggur einnig á Egypska safnið, í Múhameð Ali moskuna og á Khan el Khalili basarinn, sem er einn sá stærsti í Miðausturlöndum.
Innifalið: Morgun- og kvöldverður.

egyptaland_1.jpg 

Föstudagur 9.maí. Pýramídarnir í Gísa, Memfis og Sakkara
Að loknun morgunverði er komið að einum af mörgum hápunktum ferðarinnar, Pýramídunum og Sfinxinum í Gísa.  Pýramídarnir standa á Gísa sléttunni um 13 kílómetrum frá miðborg Kairó. Þeirra frægastir eru Keops, Kefran og Mykerinos pýramídarnir. Þetta eru stærstu byggingar sem hafa verið reistar og stærstur þeirra og þekktastur er Keops pýramídinn, byggður um 2500 árum fyrir Krist, eða fyrir 4500 árum. Hann var eitt af sjö undrum veraldar til forna og það eina þeirra sem enn stendur. Sfinxinn stóri var reistur á svipuðum tíma, en hann er byggður úr sandsteini, með ljónslíkama og manshöfuð. Undir lok skoðanaferðarinnar lítum við inn á verkstæði sem framleiðir papýrus og ilmvötn að fornum sið. Eftir hádegisverð heimsækjum við hina fornu höfuðborg í Memfis sem er um 10 km fyrir sunnan Kairó. Þar skoðum við meðal annars Sakkara pýramídan sem þar stendur, eða Tröppupýramían. Þar er einnig að finna fjölmargar aðrar grafir og pýramída, en staðurinn var grafreitur Faraóanna í ein 3000 ár. Sakkara pýramídinn er elsta varðveitta bygging í heimi, reistur um 3000 fyrir Krist.
Innifalið: Morgun- og kvöldverður.


egyptaland_pyramidar.jpg

Sunnudagur 10.maí.   Kairó - Aswan
Ekið út á flugvöll og flogið til Aswan, sem stendur við Aswan stífluna, sem reist var  á árunum 1960 – 1970 til að ná stjórn á árlegum flóðum Nílar. Aswan er einn heitasti og þurrasti staður á jarðríki. Borgin sjálf er iðandi verslunarborg með mörkuðum og veitingahúsum og gefst hér einstakt tækifæri til að skoða líf heimamanna. Flugið tekur eina og hálfa klukkustund og er ekið frá flugvellinum að hótel Mövenpick Resort í Aswan þar sem gist verður í tvær nætur.
Innifalið: Morgunverður.


egyptaland_aswan_nil.jpg

Mánudagur 11.maí. Afslöppun í Aswan eða ferð til Abu Simbel
Slökun í Aswan, en einnig er hægt að kaupa sér ferð að musterissvæðinu við Abu Simbal með fararstjóranum. Slíka ferð þarf að greiða sérstaklega.Við Abu Simbal gefst tækifæri til að skoða hin ægifögru musteri Nefertiti drottningar og Ramsesar II sem fundust um 1813. Þá voru þau næstum alveg hulin sandi. Árið 1960 voru musterin flutt í heilu lagi og staðsett þar sem þau nú eru, til að bjarga þeim undan hækkandi vatni Nílar þegar Aswan stíflan var byggð.
Það var Ramses II sem lét byggja musterin um 1200 fyrir Krist.

Skoðunarferðin kostar 39.500 kr og þarf að bóka um leið og ferðina.
Innifalið í ferðinni er: Akstur til og frá flugvelli, flug milli Aswan og Abu Simbel, aðgangseyrir, staðarleiðsögumaður í Abu Simbel og íslensk fararstjórn.
Flugið tekur 45 mínútur, kvöldverður og gisting á hótel Mövenpick Resort í Aswan.
Innifalið: Morgun- og kvöldverður.


egyptaland_abu_simbel.jpg

Þriðjudagur 12.maí. Soonesta Moon Goddess, Aswan, stíflan og Philea eyja.
Tékkað útaf hótel Mövenpick og þá til tími er kominn til að stíga um borð í H/M Sonesta Moon Goddess sem er kl. 11:00. Við komum okkur vel fyrir í káetunum, skoðum farkostinn og borðum hádegisverð um borð.
Sigling á Níl, lengsta fljóti í heimi, er ein dásamleg til að skoða leyndardóma Egyptalands sem allstaðar eru örskotsferð frá árbakkanum. Um leið er sjálf siglingin einstök upplifun sem erfitt er að koma í orð.
Eftir hádegi er farin skoðunarferð upp að Aswan stíflunni miklu. Sjálf stíflan er gríðarlegt mannvirki, 4000 m löng, 980 m breið og 111 metra há. Stífluvatnið sem kennt er við Nasser forseta færði stóran hluta neðri Núbíu undir vatn og 120.000 manns voru fluttir frá heimkynnum sínum vegna þessara framkvæmda. Núbía var hið forna meningarríki sem stóð milli Egyptalands og Súdan.
Næst skoðum við Ísis musterið á Philea eyju, en það er frá því um 200 fyrir Krist. Þar er að finna Philae einsteinunginn með egypskum híróglýfum, eða myndleri, og grískum texta, sem varð til þess, ásamt Rosettu steininum svokallaða, að hægt var að þýða hið forna táknmál Egypta.
Siglum með feluccha seglbátum og m.a. er komið við á Fílaeyjunni þar sem er að finna forn musteri, meðal annars leyfar af elstu pýramídum Egyptalands frá því um 3000 fyrir Krist.
Njótum dagsins  og andrúmsloftsins í þessum hluta Egyptalands
Kvöldverður og gisting um borð í skipinu.
Innifalið: Morgun- hádegis og kvöldverður.


sonesta_sigling_egyptaland_5.jpg

Miðvikudagur 13. maí. Edfu og Kom Ombo
Eftir morgunverð er haldið í land við Edfu sem er um 60.000 manna borg á bökkum Nílar. Þar nærri er musteri Hórusar, sólarguðsins. Þangað er ferðinni heitið og ferðast er á hestvögnum. Hórus var sonur Ósírisar og Ísisar, æðstu guða Egypta til forna, og frá honum eru komin verndaraugun sem finna má sem skartgripi um allt austanvert Miðjarðarhaf. Byrjað var að reisa musterið um 230 fyrir Krist eftir að hinir grísku Ptolomear tóku völd í Egyptalandi og því var ekki lokið fyrr en á valdatíma Kleópötru. Er þetta eitt best varðveitta musteri Egyptalands. Það stendur eins og mörg önnur á rústum eldri mustera. Á svæðinu hafa fundist leyfar pýramída sem eru 5000 ára gamlir og enginn veit til hvers voru reistir. Deginum lýkur með kvöldverði um borð í skipinu og við siglum um nóttina áleiðis til Luxor.
Innifalið: Morgun- hádegis og kvöldverður.


sonesta_sigling_egyptaland_6.jpg

Fimmtudagur 14. maí.  Karnak og Luxor 
Við vöknum í Luxor og eftir hádegisverð ökum við að hinum frægu musterum í Lúxor og Karnak. Í Karnak er að finna einstakt svæði mustera og einsteinunga sem voru helguð Faraóunum, fornkonungum Egypta, og hinni svokölluðu Thebísku þrenningu. Háguðir hennar voru Amun, kona hans Mu og sonur þeirra Mut. Amun var sólguðinn, tilbeðinn sem Amun-Ra, Mu var gyðja jarðarinnar og Mut, tunglguðinn. Dýrð Karnak var sem mest á öldunum frá því um 1500 f.kr og fram undir 1200 f.kr. Musterissvæðið þekur um 2 ferkílómetra. Frægasta musterið er musteri Amun-Ra. Lúxor musterið er byggt af faraóunum Amenhotep og Ramses II sem voru uppi um 1400-1200 fyrir Krist. Líklegast er Ramses II sá sem Móses og gyðingar glímdu við forðum daga. Þær byggingar sem Amenhotep og Ramses II byggðu eru reistar á mun eldri grunni og haldið var áfram að byggja við musterissvæðið allt fram á daga Rómverja. Lúxor og Karnak tengjast með hinni svokölluðu “Breiðgötu Sfinxana”. Heimsókn til Lúxor og Karnak er eins og að ferðast í tímavél þúsundir ára aftur í tímann.
Eftir skoðunarferðir dagsins höldum við aftur um borð í skipið og borðum þar kvöldverð. 
Skipið liggur við festar í Luxor of við gistum um borð.
Innifalið: Morgun- hádegis og kvöldverður.


egyptaland_luxor.jpg

Föstudagur 15.maí. Luxor – Dalur Konunganna 
Að loknum morgunverði um borð höldum við yfir á Vestur bakka Nílar við Lúxor. Vestur bakki Lúxor var einn helsti grafreitur faraóanna allt frá því um 2100 fyrir Krist, en það voru faraóar Nýja ríkisins svokallaða, um 1500 – 1000 fyrir Krist, sem gerðu hinn einangraða dal við fjallið Al Qurn, eða Hornið, að sínum hinnsta dvalarstað. Þaðan kemur hið fræga nafn hans “Dalur konunganna”.  Í dalnum er að finna 63 stórkostleg konungleg grafhýsi frá tímum Nýja ríkisins. Þar á meðal er hin frægu grafhýsi faraóanna Tutankhamun, Set I. og Ramsesar VI. Við munum einnig skoða grafhýsi Hatshepsut við Deir el-Bahir, en það er eitt glæstasta grafhýsi Egyptalands hins forna.  Hatshepsut var kona sem ríkti sem faraó um 1480-1460 fyrir Krist. 
Kvöldverður um borð í skipinu.
Innifalið: Morgun- hádegis og kvöldverður.


egyptaland_dalur konunganna_hof.jpg

Laugardagur 16.maí. Luxor – Kairó – Alexandria.
Frá Luxor er flogið tilbaka til Kaíró og ekið frá flugvellinum til Alexandriu, hinnar fornu höfuðborgar Egyptalands, þar sem við skoðum menjar frá tímum Rómverja, meðal annars súlu Pompeiusar og katakomburnar. Alexandría er önnur stærsta borg Egyptalands og er hafnarborg landsins. Hún var höfuborg í ein þúsund ár. Þar var að finna tvö af undrum veraldar, bókasafnið í Alexandríu og vitann mikla við hafnarmynnið. Alexandría var einnig háborg kristninnar um 600 ára skeið og þar var að finna eitt stærsta samfélag gyðinga utan Jerúsalem. Þar er einnig að finna stórkostlegar hvítar strandlengjur og iðandi mannlif. Hádegisverður á veitingastað í Alexandriu, kvöldverður og gisting á hótel Hilton Corniche í Alexandriu.
Innifalið: Morgun- hádegis og kvöldverður.

egyptaland_alexandria_1.jpg 

Sunnudagur 17.maí. Alexandria.
Deginum er varið í að heimsækja bókasafnið í Alexandríu og El Montazah höllina. Bókasafnið forna var endurborið árið 2002 þegar núverandi bókasafns bygging var tekin í notkun. Bókasafnið er einstök bygging sem hýsir fjölmörg söfn, listasmiðjur, vísindastofur. Margt er þar í boði og hægt að upplifa söguna og listina á lifandi og einstakan hátt. Við heimsækjum einnig El Montazah höllina, en hún var byggð yfir konungsfjölskylduna árið 1892. Garðar hallarinnar eru opnir almenningi. Höllin sem er byggð í tyrkneskum og feneyskum stíl hýsir mikið safn dýrgripa konungsins og sýnir vel ríkidæmi hans
Kvöldverður og gisting í Alexandríu. 
Innifalið: Morgun- hádegis og kvöldverður.


egyptaland_alexandria_2.jpg

Mánudagur 18.maí.  Alexandria - Kairó
Ekið aftur Kairó og m.a. farið á Khan El Khalili markaðinn. Hádegisverður í ferðinni. Gist á hótel Holiday Inn City Star sem er við verslunarmiðstöðina "City Stars Shopping Mall" og er í hverfinu Heliopolis.
Kvöldið frjálst.
Innifalið: Morgun- og hádegisverður.

Þriðjudagur 19.maí. 
Frídagur í Kairó og aftur gist á hótel Holiday Inn City Star.
Innifalið: Morgun- og kvöldverður.

Miðvikudagur 20.maí.
Að loknum morgunverði kveðjum við, höldum á flugvöllinn og fljúgum heim.
Flogið er kl. 08:00, millilent í London og komið heim til Íslands kl. 22:55.

Sjá nánari ferðalýsingu
Ferðir
Flug
Báðar leiðir
Aðra leið
  • Hagnýtar upplýsingar

  • Verð og innifalið

  • Veðrið

  • Flugtími

    Kef CAI

    10

    Morgunflug

  • Gjaldmiðill

    EGP

    Egypskt pund

    Gengi

Sjá Kortasýn Sjá gististaði

Við notum vefkökur (e.cookies) t.d. til að greina umferð um vefinn og til að bæta upplifun notanda á síðunni. Með því að halda áfram að vafra um síðuna samþykkir þú vefkökuskilmála VITA

Nánari upplýsingar um vefkökunotkun