Holiday World Riwo, Benalmadena

Riwo Hotel er glæsilegt og spennandi hótel sem er hluti af Holiday World hótelsvæðinu í Benalmadena. Ævintýralegt umhverfi og frábær kostur fyrir fjölskyldufríið í sólinni.

Á hótelinu eru 148 svítur sem eiga það sameiginlegt að vera rúmgóðar, bjartar og snyrtilegar. Hægt er að fá svítur sem henta ólíkum ferðamönnum; meðal annars svítu með helstu nútímatækni eða með risaeðluþema. Hönnun hótelsins er annars undir léttum innblæstri frá frumskóginum. Veggir eru ljósmálaðir, á gólfum eru ljósar marmaraflísar og náttúruleg birta lýsir upp rýmin. Í öllum svítum eru loftkæling, internet, sjónvarp, lítið eldhús með ísskáp og því helsta sem þarf til léttrar matargerðar, öryggishólf, setustofa og skrifborð. Svalir eru með útihúsgögnum og útsýni til sjávar. Baðherbergin eru flísalögð og þar eru baðkar með sturtu, hárþurrka og helstu snyrtivörur.

Á hótelinu er frábær veitingastaður þar sem boðið er upp á girnilega og fjölbreytta rétti af hlaðborði. Þar eru oft haldin þemakvöld með mismunandi réttum í boði. Einnig er bar á hótelinu og snarlbar með ljúffenga drykki og létta rétti. Lítil verslun er á hótelinu og svo er hægt að panta veitingar upp á herbergið.

Hótelgarðurinn er skemmtilega hannaður og mætir þörfum ólíkra gesta. Gott svæði til sólbaðsiðkunar og flott sundlaug fyrir börn og fullorðna. Þar sem hótelið er hluti af Holiday World hótelkeðjunni er öll aðstaða hinna fjögurra hótelanna í boði fyrir gesti og frítt skutl á milli. Einnig er hægt að fá skutl í „klúbbinn“ eða Beach club en þar er sundlaug með nuddi, öldulaug, rennibrautir, sjóræningjaskip og skemmtidagskrá fyrir börn og fullorðna, bæði yfir daginn og yfir kvöldið. Líkamsræktaraðstaða er á hótelinu og heilsulind með innisundlaug. Í heilsulindinni er hægt að slaka á í fjölbreyttu dekri eða panta snyrti- og heilsumeðferðir.

Hótelkeðjan Holiday World hentar einstaklega vel þeim sem langar til að samræma gott frí í sól og slökun og jafnframt stunda íþróttir. Sérstök líkamsræktarstöð er á staðnum sem er ætluð öllum hótelum innan keðjunnar en þar gefst hótelgestum kostur (gegn aukagjaldi ) að fara í alla vegna skipulagt íþróttastarf t.d crossfit, fótbolta eða einkaþjálfun og margt fleira.

Á hótelinu sjálfu er einnig fjölbreytt afþreying fyrir alla aldurshópa og þar ættu því allir að finna eitthvað við sitt hæfi. Skemmtanir fyrir alla fjölskylduna eru settar upp á kvöldin og á daginn er krakkaklúbbur starfræktur á hótelinu en þar starfar frábært fólk við að halda uppi skemmtidagskrá fyrir börnin, meðal annars er hægt að læra um ræktun, umhirðu plantna og sjálfbærni. Á hótelinu er leiksvæði með rennibrautum og boltaleikjum, míní-golfvöllur, leikjasalur, keilusalur, skot- og bogfimisvæði og ýmislegt annað skemmtilegt. Þvottaaðstaða er til staðar á hótelinu. Starfsfólkið í gestamóttökunni er vingjarnlegt og alltaf boðið og búið að hjálpa gestum að gera fríið eins dásamlegt og eftirminnilegt og það getur orðið. Hótelið er staðsett aðeins út úr en auðvelt er að nálgast leigubíla og lestastöðin er í u.þ.b. 10-15 mínútna göngufjarlægð.