Hagnýtar upplýsingar

FLUG:

Flugtíminn er um fjórar og hálf klukkustund. 

FARANGUR

Leyfilegt er að taka með sér eina innritaða tösku ef flogið er á almennu farrými. Hún má að hámarki vega 23 kg og heildarumfang (lengd + breidd + hæð) má ekki vera meira en 158 cm, að meðtöldu handfangi og hjólum.
Sjá nánar á vefsíðu Icelandair.

TÍMAMISMUNUR:

Á sumrin er tímamismunurinn tvær klukkustundir, á undan. Á veturnar einni klukkustund á undan. 

GREIÐSLUKORT:

Lang flestar búðir og veitingastaðir taka öll helstu kreditkort. 

SIESTA

Margir fara í hádegisverðarhlé um miðjan daginn og loka flest þjónustufyrirtæki, skrifstofur og verslanir frá um það bil 13:30 til um það bil 16:30 eða í u.þ.b. 3 tíma.

TRYGGINGAR:

Öllum ferðalöngum er ráðlagt að fara vel yfir sínar tryggingar áður en lagt er af stað í ferðalag og kaupa sérstaka ferðatryggingu sé hún ekki þegar innifalin í korta- eða heimilistryggingu viðkomandi. Einnig er gott að hafa meðferðis tryggingaskírteini frá Tryggingastofnun ríkisins, komi eitthvað óvænt upp á.

APÓTEK:

Apótek bera nafnið Farmacia á spænsku og eru auðþekkt á stórum grænum krossi. Yfirleitt er auðvelt að nálgast lyf í apótekum við minni háttar kvillum. Sum apótek eru með næturopnun og hægt er að fá upplýsingar hjá læknum, leigubílstjórum eða í hótelmóttöku um hvaða apótek er með næturvakt hverju sinni. Annars eru þau opin til 20:00. 

LÆKNISÞJÓNUSTA

Ef grunur leikur á veikindum skal hiklaust leita til læknis. Sama á við ef slys verða. Á svæðinu eru læknastofur (Clínica) sem bjóða upp á læknisþjónustu allan sólarhringinn. Þar eru yfirleitt enskumælandi læknar sem geta komið í vitjun á gististaði ef þess er óskað. Einnig bendum við á að móttakan á hótelinu getur verið ykkur innan handar
Mikilvægt er að hafa vegabréf og tryggingarskjöl (bláa alþjóðlega tryggingarskírteinið frá TR E-111) meðferðis þegar læknisaðstoðar er leitað.

BANKAR:

Oftast opnir frá kl. 09:00 til 14:00 alla virka daga. Á laugardögum er stundum opið frá kl. 09:00 til 12:00. Hraðbankar eru víða og mælum við með að nota þá sem eru hjá bankaútibúum. Hægt er að taka út peninga í hraðbönkum, en athugið þá að hafa PIN númer kortsins við hendina. Þegar verslað er út á kredit- og debetkort í búðum er fólk stundum beðið um að sýna vegabréf til að staðfesta að þeir eigi kortið.

KRANAVATNIÐ:  

Bragðast ekki vel. Við mælum með að keyptar séu vatnsflöskur í matvöruverslunum til drykkjar og matargerðar.

MOSQUITOFLUGUR:  

Lifa hér og því er skynsamlegt að bera á sig svokölluð anti-mosquito krem eða úða þegar rökkva tekur (slík krem/úðar er hægt að kaupa í apótekum og í flestum matvöruverslunum). Við hvetjum ykkur til að leita hiklaust til læknis ef þið fátið slæmt bit.

ÞJÓRFÉ:

Það tíðkast að gefa 5-10% þjórfé fyrir góða þjónustu, og á það sérstaklega við um veitingastaði. Í leigubílum, á kaffihúsum og börum er stundum upphæðin rúnuð að næstu heilu tölu. Oftast er þjórfé skilið eftir á borðinu. Stundum er sérstakt þjónustugjald innifalið.

BÍLALEIGUBÍLAR

Rétt er að hafa í huga að væntanlegur ökumaður þarf að hafa gilt ökuskírteini og vegabréf til að geta tekið bíl á leigu. Við árekstur þarf alltaf að kalla til lögreglu og fylla út skýrslu, bæði fyrir bílaleiguna og leigutaka. Ath.  rafræn ökuskirteini gilda ekki á Spáni. 

ALMENNINGSVAGNAR

Ganga yfirleitt á 15 mínútna fresti. 

LEIGUBÍLAR

Eru þægilegasti ferðamátinn og þá er auðvelt að finna. Bílarnir eru vanalega hvítir að lit með gulu skilti og ljósi á þeim ef þeir eru lausir. Auðveldast er að veifa þeim út á götu eða láta gestamóttöku eða veitingastaði panta þá.
Allir leigubílar eiga að vera með gjaldmæli en þó taka þeir yfirleitt fast verð fyrir ákveðnar vegalengdir. Einnig er hægt að nota bæði Uber og Bolt. 

Afþreying

Á Costa del Sol er svo sannarlega eitthvað fyrir alla. Gaman er að skoða Sohail kastala í Fuengirola, taka kapalvagn í gegnum Benalmadena, fara á markaði og leita að dýrgripum og ganga um stræti Malaga.

Museu Picasso

Áhugavert safn í Malaga en listmálarinn Pablo Picasso bjó í borginni fyrstu 10 ár ævi sinnar. Á safninu eru til sýnis fjölmörg verk, m.a. málverk, höggmyndir, skissur o.fl. sem fjölskylda Picasso gaf safninu. Safnið er staðsett í 200 metra fjarlægð frá fæðingarstað listamannsins. Í kjölfar heimsóknar á safnið er gaman að ganga um gamla bæinn og hafnarsvæðið í Malaga og jafnvel skella sér inn á góðan tapas bar. 

Dómkirkjan í Malaga

Annar spennandi viðkomustaður. Kirkjan var byggð á árunum 1528-1782 og bæði ytri og innri hönnun er í endurreisnarstíl. Í kirkjunni eru ýmis falleg listaverk sem unun er af að skoða. 

Nerja hellarnir eða Cueva de Nerja

Hellar sem ná yfir 5 kílómetra svæði en þeir eru eitt helsta aðdráttarafl Spánar og gríðarlega vinsælir. Reglulega eru haldnir tónleikar í einum af hellunum því hljómburðurinn í þeim er frábær.

Alcazaba

Hallarvirki sem er hluti af virki borgarinnar, ævaforn og áhugaverður staður og mjög vinsæll vegna sögu- og menningararfleifðar.

Auk allra hinna fjölmörgu áhugaverðu viðkomustaða sem eru á Costa del sol svæðinu er það umkringt spennandi borgum, þorpum og öðru sem tilvalið er að fara í dagsferðir og heimsækja.
Til að nefna nokkur eru Gíbraltar, höfði sem er undir stjórn Breta. Þar er spennandi að kíkja á apana sem eru frjálsir á svæðinu og ansi bíræfnir. Gaman er að gefa þeim hnetur eða álíka snarl. Ferðir yfir Gíbraltar til Marokkó eru líka í boði og fararstjóri getur veitt upplýsingar um þær. Þá er keyrt til Algeciras þar sem ferja er tekin til borgarinnar Tanger. Þar opnast nýr ævintýraheimur með áhugaverðum mat, mörkuðum og líflegu umhverfi.
Borgin Cordóba með sína fornu sögu- og menningarminjar er mjög áhugaverð. Bærinn Ronda er algjör gimsteinn í fallegu umhverfi. Hann er staðsettur í um 100 km frá höfuðborginni Malaga. Listamenn eins og Ernest Hemingway og Orson Welles dvöldu allmörg sumur í La Ciudad og fengu innblástur frá svæðinu.
Síðast en ekki síst er það borgin Granada þar sem meðal annars er hægt að skoða hina stórbrotnu Alhambra, gríðarmikla höll og virki sem varðveist hefur vel. Margir vilja meina að hún sé eitt af undrum veraldar. Innan Alhambra eru íburðarmiklar hallarbyggingar, virki og stórfenglegir garðar. Allt þetta var byggt á mörg hundruð ára tímabili. Í höllinni áttu íslamskir konungar aðsetur um aldir og lagði hver sitt af mörkum til að bæta og fegra. Höllin er langvinsælasti áfangastaður ferðamanna á Spáni. 

Fjölbreytt afþreying á svæðinu:

Sea Life

Notalegur og áhugaverður sjávardýragarður. Hann er ekki stór en þarna er að finna hákarla, otra, kolkrabba, sjóhesta og margt fleira. Einnig má snerta krossfiska og krabba. 

Aqualand Torremolinos

Á svæðinu er einnig vatnsleikjagarður, Aqualand, þar sem hægt er að kæla sig niður og skemmta sér ærlega.

Fun Beach Park

Skemmtilegur uppblásinn þrautabraut á La Rada ströndinni. Þar eru rennibrautir, hoppukastalar, klifursvæði, trampólín og fleira. Mjög skemmtilegt fyrir fólk á aldrinum 6-100 ára.

Sjórinn við Costa del sol strandlengjuna inniheldur mikið lífríki og þar búa fjölmargir höfrungar sem heppnir ferðamenn gætu séð, t.d. í bátsferðum, en þeir sem hafa áhuga á að skoða lifandi dýr hafa val um ýmsa dýragarða á svæðinu:

Bioparc

Dýragarður þar sem dýr og fuglar eru í náttúrulegu umhverfi. Þar er manngerður frumskógur og leiksvæði fyrir börnin.

Crocodile Park

Á Costa del sol eru einnig margir aðrir áhugaverðir dýragarðar, til dæmis krókódílagarður þar sem hægt er að skoða dýraríkið í náttúrulegu umhverfi. 

Butterfly Park of Benalmadena

Í Benalmadena er fiðrildagarður með yfir 1500 tegundir af fiðrildum!