Best Tenerife, Playa de las Américas

Huggulegt hótel á frábærum stað, í hjarta Amerísku strandarinnar, aðeins 300 metra frá Las Vistas ströndinni. Heilsulind, hlaðborðsveitingastaður og krakkaklúbbur. Verslanir, veitingastaðir og iðandi mannlíf allt um kring.

Í hótelinu eru 399 snyrtileg herbergi, ætluð allt að tveimur fullorðnum og tveimur börnum. Tvö tvíbreið rúm eru í herbergjunum,þar sem tveir, þrír eða fjórir gista saman, en tveir geta gist í sama rúmi.  Innréttingar eru smekklegar, í millibrúnum við og björtum litum. Alls staðar er loftkæling og upphitun, flatskjársjónvarp með gervihnattarásum, sími, öryggishólf gegn gjaldi og ókeypis þráðlaus nettenging. Fyllt er á smábar gegn gjaldi. Á baðherbergjum er baðker eða sturta, hárþurrka og baðvörur. Fjölskylduherbergin eru á neðstu hæð. Senator-herbergin eru á efri hæðum hótelsins og þar eru innréttingar nútímalegri í ljósum við og litum. Þeim fylgir aðstaða til að laga te og kaffi, vatn á flöskum, baðsloppar og inniskór auk aðgangs að verönd með balíbeddum og nuddpottum. Við öll herbergi eru svalir búnar húsgögnum.

Hlaðborðsveitingastaðurinn er opinn á morgnana, í hádeginu og á kvöldin og þar má fylgjast með kokkunum að störfum. Auk sundlaugarbarsins er diskó og píanóbar þar sem ljúfir lifandi tónar hljóma á kvöldin.
Í hótelgarðinum eru tvær skemmtilegar sundlaugar, með sólbekkjum og sólhlífum í kring, og hægt er að ganga á brú yfir aðra þeirra. Önnur er hituð upp yfir kaldari mánuði. Sérlaug er fyrir börnin og dagskrá allan daginn sem endar á krakkadiskói seinnipartinn. Afþreyingardagskrá er einnig allan daginn fyrir þá eldri.

Heilsulindin er nútímaleg með lítilli laug með nuddi og vatnsfossum. Þar er gufubað og hvíldarhreiður og boðið upp á vatns- og hitameðferðir, handa-, fóta- og höfuðnudd, paranudd og aðrar nudd- og snyrtimeðferðir af öllu tagi. Líkamsræktaraðstaðan er ágæt.
Móttakan er opin allan sólarhringinn og þar er hraðbanki, bílaleiga, lítil kjörbúð og þvotta- og þurrhreinsiþjónusta.

Best Hotel er á hreint frábærum stað í iðandi mannlífinu í hjarta bæjarins. Afþreying á hótelinu fyrir alla fjölskylduna, bæði fjör og fullkomin slökun. Einungis 300 metrar á ströndina og veitingastaðir, verslanir, barir og afþreying af öllu tagi í götunum í kring.

Spring hotel Vulcano, Playa de las Américas

Spring hotel Vulcano er mjög gott 4 stjörnu hótel á besta stað í hjarta Amerísku strandarinnar. Við hótelið er stór gróðursæll garður með sundlaug, barnalaug og fjölda sólbekkja.

Ströndin er um 300 metra frá hótelinu og stutt er að göngugötum með verslunarhúsum og  sérverslunum.  Barir, veitingahús og kaffihús eru á hverju strái og hótelin Villa Cortes, La Siesta og Parque Santiago eru steinsnar frá hótel Vulcano.

Hótelið býður upp á skemmtidagskrá á hverjum degi. Sundleikfimi  og leikir í lauginni eru á daginn. Fjölbreyttar sýningar eru á kvöldin, einnig lifandi tónlist og dans. Við hótelið er tennisvöllur og einungis einn km. er á golfvöllinn Club de Golf las Américas.

Herbergi eru 365 talsins, mjög  rúmgóð og geta rúmað þrjá gesti.  Öll loftkæld,  með síma, sjónvarpi, smábar gegn gjaldi (1 eur á dag), öryggishólfi, hárþurrku og svölum eða verönd.
Hægt er að tryggja sér herbergi með svölum sem snúa yfir sundlaugargarðinn gegn auka greiðslu. Þar er öryggishólf án aukagjalds og  handklæði til að nota við sundlaugina.
,,UP" herbergi á Vulcano bjóða uppá meiri þjónustu eins og aðstoð með töskur uppá herbergi, aðgangur í heilsulind, aðgangur á þakverönd með þægilegri aðstöðu, drykkjum og snarli. Herbergin eru betri með baðslopp og inniskóm, gjöf við komu og Nespresso kaffivél (hylkin ekki innifalin). 
Einnig er nettenging og öryggishólf innifalin sem er gegn gjaldi annars. 
​Ef gist er 7 nætur eða lengur er einnig einn kvöldverður og 30 min nudd. 

Í aðal veitingasal hótelsins er matur borinn fram á hlaðborði, eins og gjarnan tíðkast á Spáni og á það bæði við um morgun- og kvöldverð.  Á hótelinu er einnig pianóbar og snakkbar við sundlaugina.

Hótel Vulcano er einstaklega góður kostur á sanngjörnu verði og hafa gestir verið hæstánægðir þar í gegnum tíðina.

***Vinsamlegast athugið að líkamsræktin og spa-ið er lokað á Vulcano til 31. júlí vegna viðgerða, hótelgestir geta nýtt sér í staðinn bæði líkamsrækt og heilsulind hótel Bitacora sem er í næsta nágrenni ***