Las Camelias, Playa del Inglés

Íbúðir á Las Camelias hafa nýlega verið endurnýjaðar. Snyrtilegt, þægilegt og vistlegt íbúðahótel á frábærum stað á Ensku ströndinni. Eitt af vinsælustu hótelum VITA undanfarin ár.
Hér er myndband sem sýnir helstu breytingar. 

Las Camelias stendur við hina fjölförnu og líflegu Tirajana-breiðgötu þar sem stutt er í veitingastaði og verslanir allt í kring. Einnig eru aðeins 250 metrar í Maspalomas golfvöllinn.
Stutt er í Yumbo verslunarmiðstöðina.

Íbúðirnar eru ekki mjög stórar, en þó hlýlegar og vel búnar. Þær eru með einu svefnherbergi og rúma allt að þrjá fullorðna. Þær eru með flísalögðu gólfi, eldhúshorni með ísskáp, rafmagnshellum, eldhúsáhöldum, örbylgjuofni og kaffivél.
Verönd eða svalir fylgja íbúðum. Í sömu byggingu er hlaðborðsveitingastaður og lítil matvöruverslun.
Allar íbúðir eru með síma og sjónvarp. Baðherbergið eru með sturtu. Hægt er að leigja öryggishólf. Þráðlaust internet er einnig gegn gjaldi.
Gestir hafa aðgang að þvottavél í húsinu. 

Garðurinn er með ágætis sundlaug, sólhlífum og strandbekkjum. Ágætis hjólastólaaðgengi er á svæðinu og lyfta. Gestamóttakan er opin allan sólarhringinn. 

Ströndin er í rúmlega tíu mínútna göngufæri.

Las Camelias er fínt íbúðahótel á góðum stað með alla helstu aðstöðu.

Roque Nublo, Playa del Inglés

Roque Nublo er einfalt íbúðahótel sem er vel staðsett skammt hjá Yumbo verslunarkjarnanum. Einnig er stutt í alla þjónustu, verslanir og veitingastaði. Enska ströndin er í um 10 mínútna göngufjarlægð. Maspalomas sandöldurnar eru í um 1 km fjarlægð. 

Íbúðirnar hafa allar eldhúskrók með örbylgjuofn, brauðrist og kaffivél. Sjónvarp og þráðlaust net er að kostnaðarlausu. Hægt er að leiga öryggishólf gegn gjaldi. Allar íbúðir eru með svalir eða verönd.  

Garðurinn býður upp á ágætis sólbaðsaðstöðu og ein upphituð sundlaug. Einnig er minigolf á svæðinu.  

Á hótelinu er veitingastaður og bar. Gestamóttakan er opin allan sólarhringinn og þar er einnig smávöruverslun. 
Roque Nublo stendur við Tirajana götuna þar sem margir veitingastaðir og barir eru. Hótelið hefur átt miklum vinsældum að fagna á meðal Íslendinga undanfarin ár.

Á kvöldin getur tónlist frá börum borist inn í íbúðirnar.

Los Tilos, Playa del Inglés

Los Tilos er einfalt og þægilegt íbúðahótel á frábærum stað á Ensku ströndinni, beint á móti Yumbo-verslunarmiðstöðinni. Aðeins 10 mínútna gangur á ströndina.

Í hótelinu eru 118 íbúðir, 39 fermetrar að stærð, með einu svefnherbergi og svefnsófa í stofu, ætlaðar allt að fjórum einstaklingum. Íbúðirnar á jarðhæðinni eru með verönd og góðu aðgengi fyrir hjólastóla. Innréttingar eru einfaldar og í eldri kantinum en allar vistarverur er mjög þrifalegar og þægilegar. Flísar eru á gólfum. Í eldhúskrók er allt til alls, góður ísskápur, helluborð, örbylgjuofn, hraðsuðuketill og brauðrist auk allra nauðsynlegra eldhúsáhalda. Sjónvarp með gervihnattarásum, öryggishólf og þráðlaus nettenging eru gegn gjaldi. Á baðherbergjum er sturta. Alls staðar eru svalir, með útsýni yfir hótelgarðinn.
Íbúðir eru þrifnar 5 x í viku og skipt um handklæði 3 x í viku. 

Í hótelgarðinum eru tvær sundlaugar, önnur fyrir fullorðna og hin fyrir börnin, með ágætri sólbaðsaðstöðu í kring. Þar er einnig veitingastaður sem býður upp á létta rétti og að sjálfsögðu bar. 

Gestamóttakan er opin allan sólarhringinn og starfsfólkið er þekkt fyrir að leggja sig fram um að veita góða þjónustu. Farangursgeymsla er í móttökunni.

Los Tilos íbúðahótelið er stórgóður kostur fyrir þá sem kjósa einfalda gistingu á þægilegu og þrifalegu hóteli með góðri þjónustu. Hótelið er í hjarta Ensku strandarinnar, 10 mínútur frá ströndinni. Yumbo-verslunarmiðstöðin er beint á móti hótelinu og veitingastaðir, verslanir, kaffihús og barir allt um kring. Stutt er í alla afþreyingu, vatnasport, golf og fleira. 

Guinea apartments

Íbúðahótelið er staðsett  rétt hjá Kasbah í u.þ.b. 300 metra frá ströndinni og í um 15 mínútna göngufæri við Yumbo Centre.   Í næsta nágrenni eru bæði verslanir og veitingastaðir.

Einfaldar, bjartar, rúmgóðar og vel búnar íbúðir með einu og tveimur svefnherbergjum. Inn á öllum íbúðum er  sjónvarp, baðherbergi og eldhúsaðstaða þar sem má finna m.a. brauðrist, kaffivél, örbylgjuofn og ísskáp.  Gestamóttaka er opin allan sólarhringinn. Við hótelið er ágætur sundlaugargarður með góðri sólbaðsaðstöðu. 

Athugið að tröppur liggja upp í sundlaugargarðinn, en íbúðir á 2.hæð eru með aðgengi beint út í garð.

HD Parque Cristobal, Playa del Inglés

HD Parque Cristobal er sjarmerandi smáhýsagarður á frábærum stað á Ensku ströndinni. Aðstæður í garðinum eru góðar og gestir hafa aðgang að líkamsrækt og heilsulind. Stutt er í verslun, þjónustu og veitingahús. Tilvalið hótel fyrir fjölskyldufólk.

Gististaðurinn býður upp á smáhýsi sem mynda eins konar þorp í kringum sundlaugarsvæðið. Þau er öll með verönd og sólbekkjum og í boði eru ýmist smáhýsi með 1 svefnherbergi sem er 48,56 m2 og rúmar allt að 3 fullorðna eða tvo fullorðna og eitt barn eða með tveimur svefnherbergjum sem er 56,70 m2 og rúmar allt að fimm einstaklinga. Smáhýsin eru öll mjög vel búin með sjónvarpi, síma, loftkælingu og öryggishólfi (gegn gjaldi). Þarna er einnig eldhúskrókur þar sem er ísskápur, örbylgjuofn, kaffivél og brauðrist. Baðherbergi eru fullbúin en þar má finna hárþurrku og helstu baðvörur. Einnig eru í boði svokallaðar Kids Suites en þeim er ætlað fjölskyldum með börn, þeim fylgja leikföng, barnastólar, pelahitari og leikjatölva svo eitthvað sé nefnt. Einnig er hægt að bóka svokölluð "EMBLEM" smáhýsi. Þar er öryggishólfið frítt, baðsloppar, inniskór og lúxusbaðvörur, en þar má einnig finna expresso kaffivél, jógamottu, þráðlausa hátalara og minibar. 

Hægt er að sérpanta sérstök smáhýsi með aðstöðu fyrir fatlaða. Vinsamlega hafið samband við skrifstofuna ef óskað er eftir slíkum smáhýsum.

Í garðinum eru tvö sundlaugarsvæði með fjórum sundlaugum og því auðvelt fyrir alla að finna eitthvað við sitt hæfi. Tvær sundlauganna eru ætlaðar fullorðnum og við aðra þeirra er nuddpottur. Einnig eru tvær barnalaugar og í annarri eru litlar rennibrautir og vatnaleiksvæði. Boðið er upp á barnaklúbb og unglingaklúbb frá morgni til kvölds. Á daginn eru ýmislegar skemmtanir á vegum hótelsins í garðinum og á kvöldin er oft lifandi músík og skemmtanir fram eftir kvöldi.

Hótelið býður upp á ýmiskonar afþreyingu sem að gestir hafa aðgang að, t.d. falleg heilsulind, borðtennis, tennis, minigolf, blak, strandblak, fótbolta, körfubolta og fleira.   

Hægt er að velja um að vera án fæðis, aðeins með morgunmat, hálft fæði (morgunverður og kvöldverður) eða Allt innifalið. Matur er reiddur fram af hlaðborði,  á hverju kvöldi er mismunandi þema í matargerðinni. Hótelgestir sem eru án fæðis geta líka keypt morgunverð og einnig kvöldverð á  "a la Carte" veitingastaðnum þar sem þeir geta pantað sér borð á.  Snarl, kaffi og kökur fást þar yfir daginn. Á sundlaugarbarnum  í garðinum er hægt að fá sér svalandi drykki og létt snarl. 

Hótelið er staðsett á mjög góðum stað við Ensku ströndina og er ströndin í um 2 km fjarlægð. Hótelið er með skutlu á sínum vegum sem keyrir á milli hótels og strandar þrisvar sinnum á dag, gestum að kostnaðarlausu. Aqualand er í 6 km fjarlægð, Palmitos Park í 14 km fjarlægð og golfvöllurinn Maspalomas í 2 km fjarlægð. 

Tilvalið fjölskylduhótel þar sem að allir í fjölskyldunni finna eitthvað við sitt hæfi.

Ath: Óheimilt er að fá til sín gesti í hótelgarðinn á Parque Cristobal nema með því að kaupa dagpassa fyrir þá hjá gestamóttöku hótelsins. 

Cordial Green Golf, Maspalomas

Cordial Green Golf er skemmtilegur smáhýsagarður sem er aðeins steinsnar frá golfvellinum í Maspalomas. Húsin eru smekklega innréttuð og mjög heimilisleg. 

Val er um smáhýsi ýmist með einu eða tveimur svefnherbergjum. Öll húsin eru á tveimur hæðum, á neðri hæðinni er eldhúskrókur, en þar má m.a. finna brauðrist, örbylgjuofn, kaffivél og ketil. Í stofunni er lyfta í lofti, sjónvarp og svefnsófi þar sem einn getur sofið, á efri hæð er svefnaðstaða, þar er einnig lyfta í loftinu. Inn á öllum íbúðum er einnig öryggishólf gegn gjaldi, hárþurrka og þráðlaust net. Fyrir framan húsin er verönd þar sem eru borð og stólar. 

Einnig er boði svokölluð smáhýsi "plus" ýmist með einu eða tveimur svefnherbergjum. Þetta eru smáhýsi staðsett á góðum stað garðinum, en þessar íbúðir hafa alla verið teknar í gegn nýlega. 

Smáhýsagarðurinn er á rólegum stað miðsvæðis í Maspalomas, rúmum tveimur kílómetrum frá ströndinni. Lítil kjörbúð þar sem versla má allar helstu nauðsynjar er við gestamóttökuna en einnig er verslun í 500 metra fjarlægð í Faro II verslunarmiðstöðinni. Hægt er að velja um að vera án fæðis, með morgunmat eða hálft fæði (morgunmatur og kvöldmatur). Hjá þeim sem eru með fæði innifalið þá er matur reiddur fram af hlaðborði.

Garðurinn sem umlykur svæðið er stór og fallegur. Þarna eru tvær sundlaugar, ásamt barnalaug. Sólbekkir eru á víð og dreif víðs vegar um garðinn.  Þarna er einnig sundlaugabar þar sem hægt er að fá sér létt snarl og svala sér á köldum drykkjum.Góð aðstaða er fyrir barnafjölskyldur en þarna er bæði skemmtidagskrá yfir daginn og skemmtilegt barnaleiksvæði. Móttaka er opin allan sólarhringinn. Gestir hótelsins fá afslátt á golfvellinum Crodial Green Golf.  Á hótelinu er í boði skutlþjónusta til og frá ströndinni, nánari upplýsingar fást í móttöku. 

Green Golf er tilvalið fyrir fjölskylduna.

Turbo Club Apartments, Maspalomas

Turbo Club Apartments er huggulegt íbúðahótel á mjög góðum stað í Maspalomas. Ókeypis skutla á ströndina sem er í 3,5 km fjarlægð. Ókeypis almenningsbílastæði við hótelið. Veitingastaður, mínígolf og skemmtidagskrá á hótelinu og stutt í lífið og fjörið á Ensku ströndinni. Allt innifalið.

120 snyrtilegar 35 fermetra íbúðir sem voru gerðar upp árið 2016 eru í íbúðastamstæðunni, í ellefu tveggja hæða byggingum umkringdum görðum. Íbúðirnar rúma frá tveimur fullorðnum til tveggja fullorðinna og tveggja barna. Innréttingar eru smekklegar, í mildum litum og gráar flísar á gólfum.
Íbúðirnar eru búnar loftkælingu og flatskjársjónvarpi með gervihnattarásum. Alls staðar er lítill eldhúskrókur með hellum, ísskáp og helstu eldhúsáhöldum. Öryggishólf fæst gegn gjaldi. Á baðherbergjum er sturta, hárþurrka og handklæði.
Þrif eru þrisvar í viku. Við allar íbúðir eru svalir eða verönd með borði og stólum. Þráðlaus nettenging er gegn gjaldi á sameiginlegum svæðum.

Hlaðborðsveitingasalur er á hótelinu þar sem morgunverður, hádegis- og kvöldverður er borinn fram og kaffi og kökur um miðjan dag.

Í hótelgarðinum eru tvær sundlaugar, önnur upphituð yfir vetrartímann, auk sérlaugar fyrir börnin. Sundlaugarbarinn býður upp á svalandi drykki frá morgni og langt fram á kvöld. Sólbaðsaðstaða er til fyrirmyndar með sólbekkjum og sólhlífum. Leiksvæði er fyrir börnin og krakkaklúbbur. Starfsfólk sér um skemmtidagskrá sex daga vikunnar á útisviði en einnig er diskótek inni. Mínígolf og tennisvöllur.
Gestamóttakan opin frá kl. 8 til kl. 20, en húsvörður er á svæðinu á kvöldin og nóttunni. Kjörbúð, bílaleiga, mótorhjól- og reiðhjólaleiga er í hótelinu. Gestir hafa aðgang að þvottavélum og þurrkurum gegn gjaldi en einnig er hægt að panta þurrhreinsun.

Þægileg íbúðasamstæða á góðum stað í Maspalomas. Ókeypis skutla er á ströndina, sem er í 3,5 km fjarlægð, þrisvar á dag. Þeir sem leigja bíl njóta þess að ókeypis almenningsbílastæði eru alveg við hótelið. Stutt er iðandi mannlíf, verslanir og veitingastaði á Ensku ströndinni.

Club Maspalomas Suites and Spa

Club Maspalomas Suites and Spa er hugguleg íbúðasamstæða í rólegu hverfi sem heitir Campo International Maspalomas á Kanarí.

Einungis fyrir fullorðna.

Húsin henta vel fyrir einn, tvo eða þrjá fullorðna. Í hverju húsi er eitt svefnherbergi og flísalagt baðherbergi með sturtu. Hægt er að panta herbergi með svefnsófa. Allar íbúðir eru með loftkælingu og upphitun.
Stofan er með gæða húsgögnum og snjallsjónvarpi. Hverri íbúð fylgir verönd með garði og húsgögnum. Í íbúðunum er ókeypis internet tenging.

Á svæðinu eru tvær sundlaugar, önnur upphituð, og umhverfis þær er stór hellulagður pallur með ókeypis sólstólum og sólhlífum. Stóra sundlaugin er með braut til að synda. Fyrir ofan aðra sundlaugina er sólbaðsaðstaða. 

Hótelið hefur yfirbragð heilsuhótels þar sem auðvelt er að stunda líkamsrækt og heilsulindin er vel útbúin með hengirúmum, nuddi, gufubaði og ísgosbrunn.
Annars vegar er girnilegur hlaðborðsveitingastaður á svæðinu og hins vegar a la carte veitingahús. Einnig er bar við sundlaugarnar.
Móttakan er opin allan sólarhringinn.

Club Maspalomas Suites and Spa er fyrir alla sem vilja huga að heilsunni í rólegu umhverfi. Staðsetningin er aðeins frá miðsvæði Maspalomas en lítið mál að taka t.d. leigubíl. 

Eugenia Victoria & Spa, Playa del Inglés

Eugenia Victoria & Spa er snyrtilegt og vel staðsett hótel í miðbæ Ensku strandarinnar en ströndin er í um tíu mínútna göngufjarlægð. Stutt er að ganga í San Fernando, sem gjarnan er kallað „spænska hverfið.

Aðstaða á hótelinu er góð og gestir hafa aðgang að huggulegri og rúmgóðri heilsulind. Þar er til dæmis finnskt gufubað, nuddpottur, sundlaug með nuddstútum og hvíldarherbergi. Einnig er hægt að panta nudd og snyrtimeðferðir gegn gjaldi. Líkamsræktaraðstaða er á hótelinu. 

Herbergi hótelsins eru rúmgóð og rúma mest þrjá fullorðna (með aukarúmi). Hægt er að velja um hálft fæði eða allt innifalið (matur og drykkir).
Herbergin á 6. - 8. hæð eru vinsælust á þessu hóteli vegna staðsetningarinnar og býðst farþegum að bóka þessi herbergi gegn vægu aukagjaldi.

Sundlaugagarðurinn er skemmtilega hannaður með sundlaug og góðri sólbaðsaðstöðu.

Servatur Don Miguel, Playa del Inglés

Servatur Don Miguel er gott þriggja stjörnu hótel á Ensku ströndinni (áður Riu Don Miguel). Hótelið stendur við Tirajana breiðgötuna svo flest öll þjónusta og verslanir eru í göngufæri og er Yumbo Center sem margir Íslendingar þekkja stutt frá. Ströndin er í um 1,5 kílómetra fjarlægð frá hótelinu en hægt er að nýta sér fría skutlþjónustu hótelsins til og frá ströndinni. 

ATH. Hótelið er eingöngu fyrir 18 ára og eldri.

Á hótelinu er góð aðstaða en þarna er móttaka opin allan sólarhringinn og tveir veitingastaðir, annar er hlaðborðsveitingastaður og hinn "a la carte" og hægt er að sitja bæði inni og úti. Þarna má einnig finna velbúna líkamsræktaraðstöðu, setustofu, bar og tennisvöll svo eitthvað sé nefnt.  Garðurinn við hótelið er með stórri sundlaug ásamt borðtennis, biljarð og fótboltaspili. Í garðinum er einnig bar þar sem hægt er að svala þorstanum eða fá sér létta rétti. Þráðlaust internet er á öllu svæðinu og er frítt. 

Herbergin eru björt og notaleg og búin öllum helstu nauðsynjum, s.s. síma, sjónvarpi, öryggishólfi (gegn gjaldi) og loftkælingu, að ógleymdum fínum svölum. Val er um mismunandi herbergjatýpur og hægt að fá bæði herbergi  fyrir  1-3 einstaklinga og svítur sem eru rúmbetri. Hálft fæði er innifalið og er matur reiddur fram af hlaðborðsveitingastaðnum. 

Farþegar VITA hafa verið sérstaklega ánægðir með þjónustu og viðmót starfsfólksins á hótelinu og þykir andrúmsloftið þar einstaklega gott. 

Abora Continental, Playa del Inglés

Abora Continental er fallegt og reisulegt hótel á frábærum stað í miðbæ Playa del Inglés, eða á ensku ströndinni, vinsælustu ferðamannaströndinni á þessari sólríku eyju, Gran Canaria.

Á hótelinu eru rétt tæplega 400 herbergi sem skiptast í tveggja til þriggja manna herbergi og fjölskylduherbergi. Herbergin eru fallega og skemmtilega innréttuð með ljósum húsgögnum en litríkum veggjum og púðum inn á milli. Parket er á gólfum í herbergjunum. Flest herbergin eru með svalir eða verönd með útihúsgögnum. Baðherbergin eru snyrtileg og flísalögð en þar er sturta, hárþurrka og helstu snyrtivörur.

Þegar kemur að veitingum ættu allir að finna eitthvað við sitt hæfi því boðið er upp á morgunmat, hádegismat og kvöldmat á girnilegu hlaðborði þar sem fjöldinn allur er af valkostum til dæmis salöt, ávextir, kjöt, súpur o.s.frv. Nokkrum sinnum í viku eru þemakvöld á veitingastaðnum. Á hótelinu er líka snakkbar sem er opinn yfir daginn. Vinsamlega tilkynnið fæðuóþol eða ofnæmi við innritun á hótelið. 
Í sundlaugargarðinum er bar með skemmtilegu útisvæði þar sem er fullkomið að setjast niður með kaffi, kokteil eða svalandi drykk og njóta þess að vera í fríi. Einnig er bar í anddyri hótelsins.

Hótelgarðurinn er stór og hentar vel fyrir sóldýrkendur sem vilja helst flatmaga við sundlaugina allan daginn. Þar eru tvær sundlaugar og fjórir heitir pottar. Þeir sem vilja vera aðeins virkari í fríinu geta farið í ræktina á hótelinu, í vatnazumba eða aðra hreyfingu og svo hentar staðsetning hótelsins afar vel fyrir alls konar íþróttaiðkun, vatnaíþróttir og gönguferðir. Hótelið stærir sig af því að hugsa vel um börn Leiktæki eru fyrir börnin í garðinum og einnig borðtennisborð, billjarðborð og margt fleira til afþreyingar en krakkaklúbbur er á hótelinu fyrir börn á aldrinum 4-12 ára.
 
Hótelið hentar vel fyrir flestar tegundir ferðamanna, hvort sem þeir eru mjög virkir eða vilja bara slaka á. Stutt er í allt á Playa del Inglés en ljúft veðurfar gerir staðsetninguna frábæra fyrir þá sem vilja eiga eftirminnilegt frí á einstökum stað.

Abora Buenaventura, Playa del Inglés

Abora Buenaventura er gott hótel á frábærum stað á Ensku ströndinni, þar sem má finna iðandi mannlíf, fjölbreytt úrval veitingastaða og ýmsar verslanir. 

Hótelið hefur allt verið nýlega tekið í gegn og er núna fjögurra stjörnu hótel en var áður þriggja stjörnu. Þarna er mjög góð aðstaða og mikið um að vera fyrir hótelgesti, börn jafnt sem fullorðna. Herbergin eru rúmgóð og rúma tvo til þrjá fullorðna eða tvo fullorðna og tvö börn. Öll herbergin eru búin sjónvarpi, síma, loftkælingu, minibar, öryggishólfi og þráðlausu interneti. Hárþurrka er á baðherbergjum. Við öll herbergin eru svalir með húsgögnum, útsýni er ýmist yfir sundlaugargarðinn eða út á hafið. 

Veitingastaðirnir á hótelinu eru tveir, einn hlaðborðsveitingastaður og annar "a la carte". Í garðinum er annar veitingastaður þar sem hægt er að fá sér létt snarl og svalandi drykki.  Á hótelinu er í boði annað hvort að vera með hálft fæði innifalið eða allt innifalið og er sá matur reiddur fram af hlaðborðisveitingastaðnum, en þar er boðið upp á úrval kræsinga. 

Sundlaugargarðurinn er gróinn og þar eru tvær sundlaugar auk þess er barnasundlaug og leiksvæði bæði úti og inni fyrir börnin. Sólbaðsaðstaðan er góð með sólbekkjum og sólhlífum. Sundlaugarbarirnir eru tveir. Yfir daginn er stanslaust stuð, þar sem starfsfólk hefur ofan af fyrir hótelgestum með ýmiss konar afþreyingu. Á kvöldin er lifandi tónlist, plötusnúður eða karókí. Hægt er að leigja sundhandklæði gegn tryggingagjaldi. 

Á hótelinu er einnig að finna líkamsræktaraðstöðu, tennisvöll, billijarð og margt, margt fleira. Móttakan er opin allan sólarhringinn og er þráðlaust internet á öllu svæðinu.

Abora Buenaventura er þægilegt hótel á frábærum stað. Alls kyns afþreying er í boði yfir daginn fyrir alla aldurshópa, sem dæmi má nefna boltaíþróttir, blak og vatnspóló, köfun og tenniskennsla. Stutt er í líf og fjör í miðbænum og er ströndin í 15 mínútna göngufjarlægð. 

Caybeach Meloneras

Caybeach Meloneras er hugguleg og snyrtileg íbúðagisting og í 10 mínútna göngufjarlægð frá ströndinni á Meloneras svæðinu. Verslanir, kaffihús og veitingastaðir í stuttu göngufæri. Enska ströndin er í 10 mín keyrslufjarlægð frá hótelinu og eru tveir golfvellir í nágrenninu.

Eins herbergja íbúðirnar rúma allt að 2 fullorðna og 2 börn. Tveggja herbergja íbúðirnar eru á tveimur hæðum og rúma allt að 6 einstaklinga, mest 4 fullorðna.  Premium íbúðirnar eru allar á fyrstu hæð með verönd og garðhúsgögnum, þeim fylgir freyðivín og hnetur við komu, einnig fylgja Premium íbúðunum sund handklæði. Við standard íbúðirnar er annað hvort verönd eða svalir með borði og stólum. Innréttingar eru allar einfaldar og er loftkæling, sími, sjónvarp, rúmgóð stofa, og eldhús með hellum, ísskáp og öllum nauðsynlegum áhöldum til eldamennsku og er hárþurrka á baðherbergjum. Hægt er að leigja öryggishólf gegn gjaldi. Þráðlaust netsamband er svæðinu.

Morgunverður  og kvöldverður eru í boði af hlaðborði, þema er mismunandi eftir kvöldum.

Þrjár sundlaugar eru við hótelið, þar af ein ætluð börnum. Í sundlaugargarðinum eru sólbekkir og sólhlífar og þar er hægt að ná sér í snarl og allar gerðir ljúffengra drykkja á sundlaugarbarnum. Afþreyingu af ýmsu tagi er í boði fyrir börnin. Sérstakt leiksvæði er fyrir þau.

Heilsulind er á hótelinu með líkamsræktaraðstöðu, nuddpottum, gufubaði og þurrgufu. Þar er einnig hægt að panta nudd.
Gestamóttakan er opin allan sólarhringinn og þar er hraðbanki, bílaleiga, myntþvottahús og kjörbúð með öllum helstu nauðsynjum. 

Einföld og þægileg íbúðagisting á frábærum stað á Meloneras svæðinu. Ströndin og sandöldurnar í Maspalomas eru stutt frá. Stutt er í verslanir, veitingastaði, kaffihús og allar gerðir afþreyingar, þar á meðal golfvelli. Ekki skemmir fyrir að nóg er af léttri afþreyingu við hótelið, mínígolf, billjarð og margt fleira.

Lemon and Soul Hotel, Las Palmas

Vel staðsett þriggja stjörnu hótel í Las Palmas, aðeins steinsnar frá Las Canteras ströndinni og aðeins í 800 metra fjarlægð frá miðbænum. Allt um kring eru veitingastaðir og verslanir. 

Á hótelinu er móttaka opin allan sólarhringinn og upp á þakinu er sólbaðsaðstaða og jacuzzi.  Öll herbergin sem samtals eru 71 voru tekin í gegn árið 2019, öll eru þau búin þægindum eins og sjónvarpi,síma, loftkælingu, þráðlausu interneti og fullbúnu baðherbergi þar sem er sturta og hárþurrka. 

Í boði eru Standard herbergi sem eru með útsýni yfir götuna og Standard Economy herbergi, í báðum herbergja týpum geta verið allt að einn til tveir einstaklingar. 

Góður kostur fyrir þá sem vilja dvelja í höfuðborginni og njóta alls þess sem hún hefur uppá að bjóða

Ath. Fararstjórar VITA eru ekki staðsettir í Las Palmas en hægt er að nálgast þá í þjónustusíma. 

Cordial Mogan Valle

Cordial Mogan Valle er þriggja stjörnu íbúðahótel á góðum stað, í um 10 mínútna göngufjarlægð frá ströndinni en mun styttra frá verslunum og veitingastöðum. Puerto de Mogán höfnin er í um 1 km fjarlægð.

Allar vistarverur hótelsins eru smekklegar og er fjölbreytt afþreying í boði fyrir alla fjölskylduna. 
Hægt er að velja á milli tveggja tegunda af íbúðum, en þær eiga það sammerkt að vera með einu svefnherbergi og virkilega rúmgóðar og huggulegar. Minni íbúðirnar eru 52 fermetrar að stærð með 19 fermetra svölum. Stærri íbúðirnar eru 77 fermetrar með 28 fermetra svölum. Í íbúðunum er eldhúskrókur með öllum helstu eldhúsáhöldum, rafmagnskatli, örbylgjuofni og ísskáp. Fæði er ekki innifalið í gistingu en hægt er að fá morgunverð eða hálft fæði sé þess óskað. 

Sundlaugagarðurinn er stór og makindalegur og skartar meðal annars þremur sundlaugum, barnalaug, barnaleiksvæði, tennisvelli, heilsulind og aðstöðu til líkamsræktar. Einnig er hægt að dást að fjallaútsýni úr garðinum. Þá eru nokkrir barir og góður veitingastaður á hótelinu.
Verslunarmiðstöð með matvörumarkaði er í næsta nágrenni.

Möguleiki er að sérpanta íbúðir með aðstöðu fyrir fatlaða.

Green Field Hotel, Playa del Inglés

Green Field er einfalt og þægilegt íbúðahótel á líflegum stað á Ensku ströndinni, aðeins 5 mínútna gangur niður á strönd. Afþreying á hótelinu og veitingastaðir, verslanir og barir í götunum í kring.

Í hótelinu eru 324 stúdíó og íbúðir með einu svefnherbergi. Standard stúdíó eru 23 fermetrar og rúma tvo fullorðna, Superior stúdíó og íbúðir eru 33 fermetrar og rúma þrjá fullorðna eða tvo fullorðna og tvö börn. Íbúðirnar eru þannig ekki stórar. Innréttingar eru stílhreinar og fallegar, í millibrúnum við og hvítum og túrkisbláum lit. Parkett er á gólfum. Alls staðar eru svalir búnar húsgögnum.
Loftkæling og upphitun er alls staðar, sími og flatskjársjónvarp með gervihnattarásum. Í litlum eldhúskrók er helluborð, ísskápur, brauðrist, kaffivél og nauðsynleg eldhúsáhöld. Öryggishólf er gegn gjaldi. Þráðlaus nettenging er ókeypis. Á baðherbergjum er sturta, hárþurrka og handklæði.
 
Morgunverður er af hlaðborði í veitingasal og í hádeginu og á kvöldin svigna borðin undan heitum og köldum réttum, spænskum jafnt sem alþjóðlegum. Á setustofubarnum er lifandi tónlist flest kvöld. Starfsfólk sér um afþreyingu innan og utan dyra frá morgni til kvölds.

Í hótelgarðinum er góð sundlaug, nuddpottur og sérlaug fyrir börnin. Á sundlaugarbarnum fást hamborgarar, pitsur og snarl auk svalandi drykkja. Sólbaðsaðstaðan er hin fínasta með bekkjum og sólhlífum, bæði í kringum laugina en einnig á stórri verönd á 3. hæð. Nektarverönd er á 8. hæð.
Vinsamlega athugið að sundlaugargarður snýr í átt að umferðargötu en steyptur veggur er þar á milli.
Líkamsræktaraðstaðan er með nýjum tækjum, gufubaði og jóga- og teygjutímum á morgnana. Snyrtistofan býður fjölda meðferða og hægt er að panta nudd. 
Móttakan er opin allan sólarhringinn og þar er bíla- og reiðhjólaleiga auk þvottaþjónustu. Lítil kjörbúð er í hótelinu.

Green Field er á frábærum stað og góður kostur fyrir þá sem vilja geta slakað á en líka slett úr klaufunum í lífinu og fjörinu í miðbænum. Aðeins 400 metrar niður á strönd og nóg er af veitingastöðum, verslunum og afþreyingu af öllu tagi í léttri göngufjarlægð. Ókeypis bílastæði eru við hótelið. 

Arguineguín Park by Servatur

Arguineguín Park er glæsilegt íbúðahótel á yndislegum, rólegum stað í hlíðum Argueineguín á hinni sólríku suðvesturströnd Gran Canaria. 10 mínútna gangur á ströndina.

Í samstæðunni eru 263 rúmgóðar tveggja og þriggja herbergja íbúðir í fjórtán fimm hæða byggingum. Hægt er að velja um fimm gerðir af íbúðum, 65 til 135 fermetrar að stærð, sem rúma frá þremur fullorðnum og allt að sjö fullorðnum og tveimur börnum. Innréttingar eru nútímalegar og einstaklega smekklegar, í ljósum litum. Parket eða flísar á gólfum.
Allar íbúðirnar eru vel útbúnar, með fullbúinni eldhúsinnréttingu, eldhúsborði og stólum, ofni, örbylgjuofni, helluborði, kaffivél, uppþvottavél, ísskáp og öllum nauðsynlegum áhöldum. Loftkæling og upphitun er í öllum íbúðum, flatskjársjónvarp með gervihnattarásum og ókeypis þráðlaus nettenging. Á baðherbergjum er stór sturta, hárþurrka og baðvörur.
Rúmgóðar svalir eða verönd búin húsgögnum erum við allar íbúðirnar. Útsýni yfir hafið er frá flestum íbúðum.

Veitingastaðurin er í hótelinu sem býður upp á úrval spænskra rétta af matseðli í hádeginu og á kvöldin.

Hótelgarðurinn er glæsilegur, með tveimur sundlaugum auk barnalaugar og allt um kring er sólbaðsaðstaða með bekkjum, sólhlífum og balíbeddum. Á sundlaugarbarnum eru í boði léttir réttir af ýmsum gerðum auk svalandi drykkja.

Glæsileg íbúðasamstæða á rólegum stað, 10 mínútna gang frá Las Marañuelas-ströndinni á suðvesturhluta Gran Canaria. Stutt frá eru bæirnir Anfi del Mar og Patalavaca þar sem verslanir, barir og veitingastaðir eru á hverju strái. 

Abora Catarina by Lopesan Hotels, Playa del Inglés

Abora Catarina er fjölskylduhótel með öllu inniföldu á miðri Ensku ströndinni (Playa del Inglés) á Gran Canaria, skammt frá hinum tilkomumiklu Maspalomas-sandöldum sem teljast meðal helstu náttúruundra Spánar. Hótelið fékk nýverið yfirhalningu og er stefnan að bjóða uppá skemmtilega og fjölskylduvæna stemningu. Einnig er boðið uppá svæði einungis fyrir fullorðna sem er með öllu inniföldu. 

Á hótelinu eru flottar sundlaugar, skemmtidagskrá bæði inni og úti og barnadagskrá fyrir mismunandi aldurshópa. Markmiðið er að upplifunin sé bæði skemmtileg en einnig afslöppuð.

Á hótelinu eru um 410 rúmgóð herbergi. Í hverju herbergi eru tvö rúm (eða tvöfalt rúm) og svefnsófi. Baðherbergi eru með sturtu. Hárþurrka er á öllum herbergjum. Herbergin eru með gervihnattasjónvarp, síma, smábar, öryggishólfi (gegn gjaldi), loftkælingu (á sumrin) og þráðlausu netsambandi. 

Á aðalveitingastaðnum á hótelinu er lagt upp með fjölbreytta rétti á hlaðborði kvölds og morgna. Einnig er sérstakt svæði fyrir börnin og ,,food court". Á því svæði er hægt að fá ítalskan mat, þar er hamborgarastaður og heilsuhorn. Hægt er að kaupa hálft fæði – morgunverð og kvöldverð.

Fimm sundlaugar eru við hótelið og er ein þeirra barnalaug sem er upphituð á veturna. Við sundlaugarbarinn er einnig verönd og svo er bar við gestamóttökuna.
Hægt er að fá alls kyns drykki á þeim báðum, ýmsa ávaxtasafa og kokteila. Einnig fást svokallaðir ,,premium drinks" á góðu verði. 

Í Gestamóttöku og á barnum er frítt þráðlaust net.

Ekki skortir afþreyingu. Hægt er að nýta líkamsræktina og skrá sig í tíma eða fara í vatnsleikfimi. Einnig geta hótelstarfsmenn mælt með afþreyingu í nágrenninu. 
Hægt er að fá barnapössun (gegn gjaldi).

Strætó gengur niður á strönd og á Lopesan Meloneras-golfvöllinn. 

Abora Catarina er hannað til að mæta þörfum flestra og bjóða uppá einstaklega fjölbreytta þjónustu. Stemningin á að vera létt og skemmtileg og hönnun og andrúmsloft samkvæmt því. 
Hver og einn á að geta fundið eitthvað við sitt hæfi og garðurinn er algjört ævintýraland með pálmatrjám og fallegum gróðri.

Labranda Marieta, Playa del Inglés

Labranda Marieta er mjög gott hótel, 150 metra frá sjónum á Ensku ströndinni. Aðeins ætlað fullorðnum.

Veitingastaðir og heilsulind á hótelinu og fjöldi veitingastaða og verslana í nokkurra mínútna göngufjarlægð. Almenningssamgöngur rétt við hótelið.

Í hótelinu eru 192 tveggja manna herbergi. Innréttingar eru stílhreinar, herbergin í ljósum og notalegum litum. Flísar eru á gólfum. Alls staðar er loftkæling, 43 tommu flatskjár með gervihnattarásum, háhraða nettenging, sími og smábar. Öryggishólf er gegn gjaldi. Á baðherbergjum er sturta, hárþurrka og baðvörur. Við öll herbergi eru svalir búnar húsgögnum, sum með sjávarsýn.

Á aðalveitingastaðnum La Cascada er hlaðborð með innlendum og alþjóðlegum réttum. Hægt er að fylgjast með kokkunum leika listir sínar og þema er mismunandi í matargerðinni eftir kvöldum. Hægt er að sitja bæði inni og undir beru lofti. Á þakverönd er barinn Zeus þar sem boðið er upp á ljúffenga drykki og létta rétti auk útsýnis til allra átta.

Í hótelgarðinum eru þrjár laugar með sólbaðsaðstöðu og sérstöku VIP svæði. Þar er einnig Coco Loco barinn þar sem hægt er að gæða sér á kökum, kaffi og svalandi drykkjum. Afþreying er í boði yfir daginn og lifandi tónlist á kvöldin.
Heilsulind er í hótelinu með nuddpottum, gufubaði, þurrgufu og flotsvæði og heitum bekkjum, og boðið er upp á úrval nudd- og líkamsmeðferða. Líkamsræktaraðstaðan er ágæt og hægt er að fara í jóga og tai chi.
Gestamóttakan er opin allan sólarhringinn og þar er bílaleiga og þurrhreinsun.

Hótelið er aðeins ætlað fullorðnum og því gefst hér bæði fullkomið tækifæri til að slaka á hlaða batteríin eða sletta ærlega úr klaufunum í iðandi mannlífinu á Ensku ströndinni. Stutt á ströndina og verslunarmiðstöðvar í léttu göngufæri.

Labranda Bronze Playa, Playa del Inglés

Labranda Bronze Playa er mjög gott hótel rétt við sjóinn á Ensku ströndinni. Veitingastaðir og verslanir í götunum í kring og stutt í alla afþreyingu. Almenningssamgöngur stutt frá hótelinu.

Í hótelinu eru 178 fallega innréttuð 36 fermetra herbergi sem rúma allt að þremur fullorðnum eða tvo fullorðna og tvö börn. Innréttingar eru í millibrúnum við og ljósum litum. Flísar eru á gólfum. Alls staðar eru svalir eða verönd búin húsgögnum.

Loftkæling og upphitun er alls staðar, sími, 39 tommu flatskjársjónvarp með USB-tengi og gervihnattarásum, smábar, hraðsuðuketill og öryggishólf. Þráðlaus nettenging er gestum að kostnaðarlausu. Á baðherbergjum er sturta, hárþurrka og baðvörur.

Á Cactus Lounge er morgunverður, hádegis- og kvöldverður af hlaðborði og hægt er að fylgjast með kokkunum að störfum. Ferskt pasta og nýbakaðar pitsur eru í boði og hægt er að panta glútenlausa rétti. Kökur og kruðerí, samlokur og snarl fæst yfir daginn. Barirnir eru þrír, kokteilbarinn Strelitzia og Palm Beach eru opnir á kvöldin og fram yfir miðnætti og Coconut við sundlaugina er opinn til kl. 18.

Í hótelgarðinum er fullorðinslaug, barnalaug og nuddpottur. Allt um kring eru sólbekkir og sólhlífar. Hægt er að fá baðhandklæði við laugina. Dagskrá er yfir daginn meðal annars með jóga og vatnaleikfimi og á kvöldin eru sýningar, lifandi tónlist og bingó. Gestir geta nýtt sér líkamsræktaraðstöðuna á systurhótelinu Labranda Marieta rétt hjá.
Móttakan er opin allan sólarhringinn og þar er þvotta- og þurrhreinsiþjónusta.

Labranda Bronze Playa er á frábærum stað stutt frá ströndinni og ekki er langt í lífið og fjörið í miðbænum með alla sína bari, veitingahús og verslanir. Almenningssamgöngur stoppa stutt frá hótelinu.

Servatur Waikiki, Playa del Inglés

Servatur Waikiki er fínasta hótelsamstæða á frábærum stað í hjarta Ensku strandarinnar. Nokkurra mínútna gangur í miðbæinn. Ókeypis skutla á ströndina sem er í 1,5 km fjarlægð. Góð aðstaða fyrir fjölskyldufólk.

Í samstæðunni eru 513 herbergi í fimm sjö hæða, hringlaga byggingum. Herbergin eru 25 fermetrar, Standard eða Superior, og ætluð allt að þremur einstaklingum. Innréttingar eru snyrtilegar, í ljósum og líflegum litum. Flísar eru á gólfum. Góðar svalir eru búnar húsgögnum.

Alls staðar er loftkæling og upphitun, sími, sjónvarp með gervihnattarásum, öryggishólf og ókeypis þráðlaus nettenging. Á baðherbergjum er sturta, hárþurrka, snyrtispegill og baðvörur. Á Superior herbergjum er aðstaða til að laga kaffi og te, stærra sjónvarp, baðsloppar og inniskór.

Morgunverður, hádegis- og kvöldverður er af hlaðborði með réttum frá öllum heimshornum, en hægt er að velja um að vera með morgunmat, hálft fæði eða allt innifalið. Hægt er að fylgjast með kokkunum að störfum. Nokkrir barir eru í hótelinu. 
Sundlaugin er stór og sólbekkir og sólhlífar um allan hótelgarðinn. Við sundlaugina er bar þar sem mikið úrval fæst af léttum réttum og svalandi drykkjum. Krakkaklúbbur er starfræktur og sérsvæði er fyrir börnin, busllaug með vatnsrennibrautum og ævintýragarði. Tölvuleikja- og bíóherbergi er fyrir eldri börn. Dagskrá er einnig fyrir fullorðna með zumba-tímum og vatnasporti, og skemmtunum og lifandi tónlist á kvöldin.
Líkamsræktaraðstaðan er með nýjum tækjum og útsýni yfir laugina.

MaiTai-heilsustofan er aðeins ætluð fullorðnum og þar er hægt að slaka á í friði og ró í heitum potti, hvíldarhreiðri eða nuddi. Góð verönd er með sólbaðsaðstöðu með balíbeddum og sólbekkjum.
Móttakan er opin allan sólarhringinn og þar er þvotta- og þurrhreinsiþjónusta en einnig hafa gestir aðgang að þvottavélum og þurrkurum gegn gjaldi.

Gott hótel á frábærum stað í hjarta Ensku strandarinnar. Í nokkurra mínútna göngufjarlægð er miðbærinn með sitt iðandi mannlíf og afþreyingu. 1,5 km eru niður á strönd en ókeypis skutla flytur gesti hótelsins þangað. Á hótelinu er næg afþreying fyrir börn og fullorðna en líka rými til slökunar.

Barbacan Sol, Playa del Inglés

Barbacan Sol er mjög skemmtilegt og vel viðhaldið íbúðahótel hefur verið mikið sótt af íslenskum sólardýrkendum um langt skeið.

Hótelið er staðsett miðsvæðis, rétt hjá Ensku ströndinni. Það er þekkt fyrir heimilislegt andrúmsloft og góða þjónustu. Yumbo verslunarmiðstöðin er í um 200 m fjarlægð og gyllta ströndin er í um 1 km fjarlægð. 

Á hótelinu eru bæði íbúðir og smáhýsi. Íbúðirnar eru með einu eða tveimur svefnherbergjum. Allar íbúðirnar eru með vel búnu eldhúsi og rúmgóðum svölum.
Vegna lögunar og legu hótelsins er mjög misjafnt hversu mikil sól skín á svalir herbergjanna, einhverjar svalir eru með sól allan daginn en aðrar fá ekki sól.
Smáhýsin eru aðeins stærri en íbúðirnar, öll með tveim svefnherbergjum og tveim baðherbergjum. Þau dreifast um garðinn við hótelið, við hvert smáhýsi er verönd og eins er sólbaðsaðstaða ( með sólbekkjum) á þaki húsanna.
Hægt er að velja um að vera án fæðis á sumrin, bæta við morgunverði eða hálfu fæði. Á veturna er morgunverður innifalinn. Einnig er hægt að bæta við hálfu fæði ( morgunverði og kvöldverði).
Barbacan Sol er með hlaðborðsveitingastað, a la carte veitingastað, sundlaugarbar og huggulega setustofu með verönd sem er opin á kvöldin líka. 

Garðurinn er mjög skemmtilega hannaður með sundlaug, barnalaug og heitum pottum. Á hótelinu er skemmtidagskrá yfir daginn og mjög góð aðstaða er til ýmis konar íþróttaiðkunar, meðal annars minigolf og strandblak.

Golfvöllurinn á Maspalomas er rétt hjá og einnig Cita Shopping Center. Barbacan Sol er vel staðsett og gott hótel.

Gran Canaria Princess, Playa del Inglés

Gott fjögurra stjörnu hótel staðsett á góðum stað á Ensku ströndinni, þar sem finna má veitingastaði og iðandi mannlíf hvert sem litið er.  Ströndin er aðeins í 10 mínútna göngufjarlægð. Hótelið er eingöngu ætlað 16 ára og eldri. 

Á hótelinu er mjög góð aðstaða og má þar nefna tvær sundlaugar með góðri sólbaðsaðstöðu allt um kring, en fallegur og gróðursæll garður umlykur sundlaugargarðinn. Þrír barir eru á hótelinu, ýmist úti eða inni. Hálft fæði, allt innifalið og allt innifalið plús (meira úrval áfengra drykkja) er í boði á hótelinu. Maturinn er reiddur fram af hlaðborði þar sem hægt er að fylgjast með kokkunum að störfum.  Á daginn er einnig annar valkostur fyrir hótelgesti, veitingastaðurinn Bohío sem býður upp á létta rétti eins og hamborgara, pylsur, samlokur, pizzur o.fl., ásamt réttum af matseðli (a la carte). Hann er eingöngu opinn á daginn og val um að sitja ýmist úti eða inni. 

Skemmtidagskrá er í boði á hótelinu og mikið úrval afþreyingu eins og  billiard og borðtennis svo eitthvað sé nefnt.  Hárgreiðslustofa og snyrtistofa eru einnig á svæðinu, ásamt  líkamsræktaraðstöðu, tyrknesku baði, sauna, nuddpottum og svæði þar sem áhersla er lögð á slökun, kyrrð og ró.  Móttakan er opin allan sólarhringinn, þráðlaust internet á að vera á öllum svæðum hótelsins og herbergjaþjónusta er í boði fyrir þá sem vilja. 

Herbergin eru fallega innréttuð, þau eru öll með sjónvarpi, síma, öryggishólfi, te- eða kaffivél, loftkælingu. Svalir eru með borði og stólum. Baðherbergin eru ýmist með sturtu eða baðkari, hárþurrku og helstu baðvörum.  

Góður kostur fyrir þá sem vilja dvelja á Ensku ströndinni þar sem stutt er til allra átta. Frábær aðstaða til að njóta. 

Barceló Margaritas Royal Level, Playa del Inglés

Barceló Margaritas hótelið var allt enduruppgert árið 2022. Hótelið er vel staðsett á ensku ströndinni og býður upp á tvær útisundlaugar barnasundlaug, líkamsræktarstöð og Crossfit undir berum himni með einkaþjálfara. Boðið er uppá skemmtidagskrá á daginn og á kvöldin. Einnig er í boði ókeypis strætó til Maspalomas- og Playa del Inglés strandanna. Maspalomas golfvöllurinn er 2,2 km frá hótelinu og Playa del Ingles ströndin er í 1,9 km fjarlægð.

Á hótelinu eru samtals 322 herbergi, bæði hjónaherbergi og fjölskylduherbergi, innréttuð með einföldum en fallegum innréttingum. Öll gistirýmin eru með loftkælingu og gervihnattasjónvarpi.

Hótelið er með hlaðborðsveitingastað sem framreiðir alþjóðlegan mat. Hægt er að velja um hálft fæði eða allt innifalið ef gist er í tvíbýli, tvíbýli Deluxe eða í fjölskylduherbergi.
Hálft fæði innifelur morgunverð og kvöldverð.
Allt innifalið innifelur morgunverð, hádegisverð og kvöldverð af hlaðborði, alla drykki á opnunartíma og snakk.

Ef gist er í Junior svítu eða svítu eru þær staðsettar á svokölluðu Royal Level svæði hótelsins. Þar fá gestir aðgengi að sérstöku Royal Level Lounge svæði, aðgengi að sérstöku sólbaðs og sundlaugarsvæði, aðgengi að öðrum nýrri matsal sem er eingöngu fyrir þá sem gista á Royal Level svæðinu, kaffiaðstaða er á svítunum og náttsloppar og inniskór. Þeir sem gista á Royal Level svæðinu geta valið um hálft fæði eða allt innifalið. Athugið að Royal Level svæðið er eingöngu fyrir fullorðna eða 16 ára og eldri.

Bex Holiday Homes, Las Palmas

Gott íbúðarhótel staðsett á frábærum stað í Las Palmas höfuðborg Gran Canaria. Í næsta nágrenni eru úrval verslanna og veitingastaða og er ströndin aðeins í nokkurra mínútna fjarlægð. Á móti er hótelið Design Plus Bex og geta gestir nýtt sér aðstöðuna þar en á hótelinu er líkamsræktaraðstaða, bar, veitingasalur og útibar er uppá þaki hótelsins,ásamt sólbaðsaðstöðu og sturtum. 

Á Bex Holiday Homes eru 24 íbúðir ýmist með einu eða tveimur svefnherbergjum, allar eru þær fallega hannaðar og búnar helstu þægindum eins og fullbúnu og glæsilegu eldhúsi, ásamt baðherbergi þar sem eru helstu snyrtivörur. Hægt er velja að vera án fæðis eða með morgunmat innifalinn, en morgunverðarsalur er á hótelinu beint á móti Design Plus Bex. 

Ath. Það eru hvorki þrif né lín eða handklæðaskipti innifalin, en hægt er að panta gegn aukagjaldi þá þjónustu beint til hótelsins þegar út er komið.  

Þetta er spennandi nýr valkostur fyrir þá sem vilja vera útaf fyrir sig og dvelja í Las Palmas. Fararstjórar VITA eru ekki í Las Palmas en hægt er að nálgast þá í þjónustusíma. 

Design Plus Bex Hotel, Las Palmas

Fallega og nútímalega hannað fjögurra stjörnu "boutique" hótel staðsett á frábærum stað í Las Palmas höfuðborg Gran Canaria. 

Hótelið hefur allt verið nýlega tekið í gegn og má þar m.a. finna móttöku sem er opin allan sólarhringinn, líkamsræktaraðstöðu, bar og veitingastað þar sem reiddur er fram morgunverður. Upp á þaki hótelsins er glæsilegur bar og er þar hægt að gæða sér á gómsætum réttum og svala þorstanum með ljúffengum drykkjum á meðan horft er yfir borgina. Þarna er einnig sólbaðsaðstaða og sturtur. 

Herbergin eru öll fallega hönnuð og hægt er að velja um deluxe herbergi eða superior. Öll eru þau með sjónvarpi, síma, minibar, loftkælingu og öryggishólfi. Baðherbergi eru með sturtu, hárþurrku og helstu snyrtivörum. 

Góður kostur fyrir þá sem vilja vera í Las Palmas en þar má finna iðandi mannlíf, fallegar byggingar og þröng stræti, ásamt úrvali verslana og veitingastaða. Falleg og skemmtileg strönd er í Las Palmas en hún heitir Las Canteras og er aðeins í 3 mín. göngufjarlægð frá  hótelinu. 

Ath.Fararstjórar VITA eru ekki í Las Palmas en hægt er að nálgast þá í þjónustusíma. 

Faro, a Lopesan Collection hotel, Maspalomas

Faro, a Lopesan Collection hotel er glæsilegt hótel á frábærum stað í Maspalomas. Nokkur skref eru niður á ströndina og útsýnið yfir sandöldurnar og hafið er óviðjafnanlegt. Hótelið er ætlað fullorðnum.

Í hótelinu eru 182 rúmgóð og fallega hönnuð herbergi sem skiptast í deluxe  og superior herbergi, ásamt junior svítum sem rúma tvo til þrjá fullorðna. Einnig er hægt að sérpanta herbergi í ,,dbl deluxe" flokknum með hjólastólaaðgengi. Öll herbergin hafa verið tekin í gegn og hafa að geyma nútímaþægindi eins og loftkælingu, sjónvarp, síma, minibar, öryggishólf, ketill og Nespresso kaffivél. Hárþurrka, baðsloppar og baðvörur eru inná baðherbergjum.  Við öll herbergi eru svalir búnar húsgögnum. 

Matargerðin á hótelinu er rómuð og mikið úrval af gómsætum réttum. Morgunverður er reiddur fram af hlaðborði og á kvöldin svigna borðin undan kræsingum, jafnt þjóðlegum sem alþjóðlegum. Á kvöldin er ekki amalegt að slaka á og njóta gullfallegs útsýnisins með svalandi drykk við hönd og njóta lifandi tónlistar, taka jafnvel nokkur spor. 

Í hótelgarðinum er sundlaug og fínasta sólbaðsaðstaða með sólbekkjum og sólhlífum. Á þakveröndinni er  glæsileg sólbaðsaðstaða, 2 sundlaugar og útsýni til allra átta. 

Líkamsræktaraðstaða er í hótelinu, auk hárgreiðslustofu, verslana og þvottaþjónustu. Móttakan er opin allan sólarhringinn og starfsfólk aðstoðar við bílaleigu og gjaldeyrisskipti. Þráðlaust internet er á öllum svæðum hótelsins. Faro hótelið er við suðurenda Las Palomas-strandarinnar, rétt við vitann sem hótelið dregur nafn sitt af. Þeir sem kjósa frekar ströndina geta baðað sig í söltum sjónum og notið þess að finna sandinn á milli tánna á ströndinni sem er alveg við hótelið. Nóg er af annarri afþreyingu í nágrenninu, vatnasport, köfun, hestaferðir, tennis og ekki má gleyma golfvöllunum en hótelgestir fá afslátt á tveimur þeirra. 

Maspalomas Princess

Maspalomas Princess er mjög gott og fjölskylduvænt hótel á rólegum stað í hjarta Maspalomas á Kanarí, stutt frá sandöldunum frægu og Maspalomas golfvellinum. Strætó stoppar fyrir utan hótelið og því tekur aðeins nokkrar mínútur að komast í iðandi mannlífið.

Hótelið er fjögurra stjörnu og var allt tekið í gegn árið 2019 og er aðstaðan hin glæsilegasta, sem dæmi má nefna frábæran sundlaugagarð með sérsvæði fyrir yngstu börnin þar sem má finna skemmtilegar vatnsrennibrautir, leiksvæði og barnaklúbb. Er því eitthvað um að vera allan daginn. Á kvöldin er svo mini disco. Fyrir þá sem vilja slappa af er sérstakt svæði aðeins ætlað fullorðnum, en þar er sundlaug og sólbaðsaðstaða svo eitthvað sé nefnt og áhersla lögð á rólegheit og afslappandi andrúmsloft.  Tilbúin strönd er einnig í garðinum og má einnig finna við eina sundlaugina, þar er hægt að fara í sólbað á sólbekkjum sem liggja á hvítum sandi rétt eins og um væri að ræða fallega sandströnd. Allt um kring í sundlaugargarðinum er fínasta sólbaðsaðstaða með sólbekkjum og sólhlífum. Nokkrar brýr liggja yfir laugarnar sem tengja svæðin saman. Þar á milli eru eyjur þar sem m.a. er snarlbar o.fl.

Hótelið er með 389 herbergi á fjórum hæðum.  Hægt er að velja um mismunandi herbergjatýpur eftir því sem hentar hverjum og einum. Fyrir stærri fjölskyldur er hægt að fá samtengd herbergi sem rúma allt að fjóra fullorðna og tvö börn. Öll eru herbergin rúmgóð og vel búin nútímaþægindum eins og sjónvarpi, síma, loftkælingu, litlum ísskápi, þráðlausu interneti og öryggishólfi. Baðherbergi eru ýmist með baðkari eða sturtu og helstu baðvörum (hárnæring, sjampó og sturtusápa). 

Allt innifalið er í boði á hótelinu og eru veitingastaðirnir samtals fimm, ásamt fimm börum. Þar má m.a. finna ítalskan og asískan veitingastað, snarlbari og  hlaðborðsveitingastað þar sem bornir eru fram bæði þjóðlegir og alþjóðlegir réttir. Hægt er að panta gegn aukagjaldi "Allt innifalið Plús" en það er eingöngu í boði fyrir 18.ára og eldri og felur í sér meira úrval af áfengum drykkjum. Starfsfólk sér um afþreyingu frá morgni til kvölds og er m.a. hægt að stunda vatnsleikfimi, körfubolta, fótbolta, strandblak, borðtennis og tefla á risa taflborði. Líkamsræktaraðstöðuna geta gestir nýtt sér að kostnaðarlausu. Lítil heilsulind er einnig á hótelinu þar sem hægt er að panta gegn gjaldi í ýmsar snyrtimeðferðir. 

Maspalomas Princess er mjög gott hótel í hjarta Maspalomas. Frábær valkostur fyrir fjölskyldur og þá sem vilja hafa það gott í fríinu sínu. 

Lopesan Costa Meloneras Resort & Spa

Lopesan Costa Meloneras er fimm stjörnu glæsihótel á besta stað í Meloneras sem er heill heimur út af fyrir sig. Á hótelinu eru ótal afþreyingarmöguleikar, stærðarinnar sundlaugagarður og afar falleg heilsulind. 

Hótelið opnaði nýlega aftur, eftir miklar endurbætur og býður upp á afar glæsilega aðstöðu hvort sem það eru herbergin sjálf eða aðstaðan, sem dæmi má nefna stóran sundlaugagarð sem er einstaklega glæsilegur, með fjórum sundlaugum, nuddpottum og meira að segja lítilli manngerðri strönd. 

Öll herbergi eru rúmgóð og afar vel búin öllum nútímaþægindum, eins og sjónvarpi, síma, öryggishólfi, loftkælingu, minibar svo eitthvað sé nefnt. Inn á baðherbergjum má finna hárþurrku og helstu snyrtivörur. 

Fjölbreytt skemmtidagskrá er fyrir alla aldurshópa og á kvöldin er boðið upp á lifandi tónlist og skemmtun. Á hótelinu eru auk þess sex veitingastaðir þar sem hægt er að finna úrval gómsætra rétta og ekki nokkur vafi að allir ættu að finna eitthvað við sitt hæfi. Þarna eru einnig nokkrar sérvöruverslanir, keilusalur, barir bæði úti og inni og skemmtistaður, hárgreiðslustofa, minigolf og fleira. Að ógleymdri fullkominni heilsulind þar sem hægt er að stunda fjölbreytta líkamsrækt eða einfaldlega láta dekra við sig.

Lopesan Costa Meloneras býður upp á sannkallaða lúxusgistingu og veitir öllum þeim sem dvelja þar ógleymanlega upplifun. Ströndin er staðsett rétt hjá hótelinu og er þar skemmtileg strandgata með fjölbreyttu úrvali veitingastaða og verslanna allt um kring, að ógleymdu óviðjafnanlegu útsýni yfir hafið. 

Mogan Princess & Beach Club

Mogan Princess & Beach Club er gott hótel á fallegum stað í hlíðum Taurito-dalsins. Fallegt útsýni er yfir Atlantshafið og Puerto de Mogán. Ókeypis skutla er í boði nokkrum sinnum á dag niður á Taurito-ströndina og þar er strandklúbbur á vegum hótelsins.

Þetta hótel er með allt innifalið. Hægt er að panta gegn aukagjaldi  allt innifalið Plús en það er eingöngu í boði fyrir 18.ára og eldri, þá er í boði meira úrval af áfengum drykkjum. 

Í hótelinu eru 212 rúmgóðar vistarverur. Hægt er að velja um tveggja manna herbergi og fjölskylduherbergi og svítur sem rúma allt að þrjá fullorðna og barn. Innréttingar eru klassískar og smekklegar, í ljósum litum. Flísar eru á gólfum. Alls staðar er loftkæling og upphitun, flatskjársjónvarp með gervihnattarásum og smábar. Öryggishólf og straujárn eru gegn gjaldi. Á baðherbergjum er baðker og sturta, hárþurrka og ókeypis baðvörur. Við öll herbergin er verönd eða svalir búnar húsgögnum, með útsýni yfir hafið.
Ókeypis þráðlaus nettenging er við gestamóttökuna og á aðalsundlaugarsvæðinu.

Morgun-, hádegis- og kvöldverður  borinn fram á hlaðborðsveitingastaðnum Princess. Snarl og drykkir af ýmsu tagi eru í boði á La Choza og það sama má segja um Beach Club, klúbbinn sem hótelið rekur við ströndina.  A diskóbarnum er skemmtilegt að fá sér ljúfan drykk eða dilla sér við tónlist en starfsfólk sér um skemmtiatriði öll kvöld. 

Sundlaugarnar eru þrjár, á aðalveröndinni er stór sundlaug, sem er hituð upp yfir vetrarmánuðina, og sérlaug fyrir börnin. Þriðja laugin er útsýnislaug sem aðeins er opin fullorðnum. Starfsfólk sér um að hafa ofan af fyrir yngri jafnt sem eldri gestum yfir daginn með leikfimi og leikjum.Móttakan er opin allan sólarhringinn og þar er m.a. þvotta- og þurrhreinsiþjónusta, bílaleiga og lítil kjörbúð með helstu nauðsynjum. 

Mogan Princess er á fallegum stað í Taurito-dalnum. Ókeypis skutla er nokkrum sinnum á dag niður á sandströndina og einu sinni á dag til þorpsins Puerto de Mogán. Athugið að þar sem hótelið er byggt utan í fjallshlíð getur þurft að ganga nokkurn spöl innan hótelsins sjálfs og nokkuð er um tröppur þó að lyftur séu þar líka.

Cordial Mogan Playa

Cordial Mogan Playa er einkar fallegt fjögurra stjörnu hótel sem er með suðrænu yfirbragði, staðsett steinsnar frá ströndinni. Aðstaðan á hótelinu er framúrskarandi góð og stendur gestum til boða ótal möguleikar á íþróttaiðkun og meðferðum til að bæta vellíðan. 

Herbergin eru fyrsta flokks og sérstaklega vel búin. Hægt er að velja á milli þess að hafa hálft fæði innifalið í gistingu eða eingöngu morgunmat. Á hótelinu eru nokkrir veitingastaðir, hver öðrum betri.

Garðurinn er stór og fallegur með frábærri sólbaðsaðstöðu sem og möguleikum á hverskyns afþreyingu. Í garðinum eru tvær stórar sundlaugar, barnalaug, og barnaleiksvæði. Hótelgestir geta tekið handklæði af herbergjum og notað í garðinum og á ströndinni gegn tryggingu. Þá er glæsilegur tennisvöllur á hótelinu, skvassvöllur og meira að segja keilubraut. Þá er að sjálfsögðu glæsileg heilsulind og góð almenn aðstaða til líkamsræktar.

Suites & Villas by Dunas, Maspalomas

Suites & Villas by Dunas er glæsilegt og fjölskylduvænt íbúðahótel á góðum stað í Maspalomas nálægt golfvellinum og þjóðgarðinum. Nærumhverfi hótelsins er rólegt en stutt er í fjörið við ströndina fyrir þá sem vilja það.

Á hótelinu eru eins til tveggja herbergja svítur, fjölskyldusvítur og villur sem henta ólíkum hópum ferðamanna. Í þeim er allt sem þarf til að njóta frísins í sólinni; loftkæling, frítt internet, flatskjársjónvarp með gervihnattastöðvum og lítill ísskápur, verönd með útihúsgögnum og útsýni yfir garðinn. Í villunum eru auk þess eldhús með örbylgjuofni. Hönnun hótelsins er einstök þarna um slóðir því það er í lágreistum byggingum sem staðsettar eru í gríðarstórum og fallegum hótelgarði.

Hægt er að kaupa hálft fæði eða allt innifalið. Morgunmatur er borinn fram á girnilegu hlaðborði á veitingastað þar sem einnig er boðið upp á hádegis- og kvöldverð. Á morgnana eru bæði kaldir og heitir réttir í boði. Réttirnir eru að mestu alþjóðlegir en notað er gott hráefni og ferskt sjávarfang frá svæðinu. Á daginn er snarlstaður opinn við sundlaugina þar sem hægt er að ná sér í gos og bjór til að kæla sig niður í sólinni og svo er bar í anddyri hótelsins. Einnig er rekið kaffihús á hótelinu þar sem hægt er að fá kaffi, kökur og kokteila en það er sjálfstætt og því eru réttirnir þar ekki innifaldir í verðinu.

Í hótelgarðinum er góð aðstaða til sólbaðsiðkunar, þrjár sundlaugar sem eru upphitaðar á veturna og heitur pottur. Umhverfi garðsins er náttúrulegt, með pálmatrjám og fallegum plöntum. Góð aðstaða er fyrir börn á hótelinu. Í garðinum er vatnsleikjasvæði og skemmtilegt leiksvæði, þar er starfræktur krakkaklúbbur og haldnar eru skemmtanir fyrir börn. Á hótelinu er svo líkamsræktarstöð, upplýstur tennisvöllur og hægt að panta ýmsar dekurmeðferðir, til dæmis nudd og húðmeðferðir.

Dunas: Hotel Suites & Villas hentar sérstaklega vel fyrir pör, fjölskyldur og golfara sem vilja rólegan og friðsamlegan stað til að slaka á og hafa opið svæði í kringum sig.

Maspalomas Resort by Dunas

Dunas, Maspalomas Resort eru frábær smáhýsi og svítur á fallegum og rólegum stað í Maspalomas. Golfið er í göngufjarlægð, einnig þjóðgarðurinn og stutt á ströndina fyrir þá sem elska að slaka á við sjávarsíðuna.

  
Á hótelinu eru smáhýsi (e. bungalows) sem eru eins til þriggja herbergja fyrir allt að 7 manns. Einnig er hægt að bóka comfort smáhýsi sem taka 3 gesti.
Smáhýsin eru með öllu því sem þarf til að eiga gott og afslappandi frí í sólinni. Þar er frítt internet, eldunaraðstaða, stofa með flatskjársjónvarpi og baðherbergi. Hönnunin er klassísk og stílhrein, veggir eru ljósmálaðir og flísar eru á gólfum. Verönd með útihúsgögnum er við smáhýsin svo gestir geta notið sólarinnar án þess að fara frá húsinu.

Gestir á hótelinu eru með fæði innifalið. Morgunmatur er framreiddur af hlaðborði með fjölbreyttum réttum, bæði köldum og heitum. Á sama veitingastað er einnig hægt að fá hádegis- og kvöldverð. Að mestu leyti er boðið upp á fjölbreytta alþjóðlega rétti með mismunandi þema frá degi til dags út frá ferskasta hráefni og sjávarfangi hverju sinni. Yfir daginn er hægt að fá sér léttar veitingar við sundlaugina á snarlbarnum en annar bar er í anddyri hótelsins. Einnig er hægt að skella sér á kaffihús á hótelinu og panta kaffi, kökur eða jafnvel kokteila en reksturinn á kaffihúsinu er sjálfstæður og því eru réttirnir þar ekki innifaldir í verðinu.

Hótelið deilir hótelgarði og aðstöðu með Hotel Dunas: Suites & villas svo gestir geta notið alls þess sem er í boði í þessum gríðarstóra og fallega hótelgarði sem er að mörgu leyti einstakur fyrir Maspalomas. Í hótelgarðinum er nóg af plássi til að njóta sólarinnar, fjórar góðar sundlaugar en þar af eru tvær sérstaklega fyrir börn, tennisvellir og vatnsleikjasvæði og annað leiksvæði fyrir börnin. Allt þetta er staðsett í fallegu og gróðursælu umhverfi. Á hótelinu er líkamsræktaraðstaða svo það er engin ástæða til að sleppa ræktinni í fríinu. Hægt er að bóka nudd og aðrar meðferðir til að slaka enn betur á og svo er ýmis afþreying í boði á hótelinu, meðal annars skemmtikraftar og diskótek.

Hotel Maspalomas Resort er frábær valkostur fyrir alla ferðahópa sem koma til Maspalomas, hvort sem sóst er í golfið, gönguferðir, sólina eða fjölskyldufjör.

H10, Playa Meloneras Palace

H10, Playa Meloneras Palace er stórglæsilegt hótel sem notið hefur fádæma vinsælda hjá Íslendingum undanfarin ár. Hótelið er staðsett við ströndina í Meloneras og er búið öllum þeim þægindum sem hugurinn girnist. Óhætt er að fullyrða að gæði og þjónusta séu höfð í hávegum á öllum vígstöðvum hótelsins.

Hægt er að velja um hálft fæði eða "allt innifalið" með gistingunni.   Tveir veitingastaðir eru á hótelinu Tamadaba, sem býður upp á morgun-, hádegis- og kvöldverðarhlaðborð, er sá veitingastaður sem er "innifalinn" í gistingunni  og A la carte veitingastaðurinn Gaudí.  Gestir hótelsins fá 20% afslátt af veitingum á Gaudí.

Herbergin eru mjög nýtískuleg og bera það með sér að hugsað hefur verið fyrir hverju smáatriði. Þau eru auk þess afar vel útbúin, með öryggishólfi, gervihnattarsjónvarpi, síma og loftkælingu - svo eitthvað sé nefnt.

Garðurinn er glæsilegur, með tveimur sundlaugum og barnalaug og frábærri sólbaðsaðstöðu. Auk þessa er fjölbreytta afþreyingu að finna á hótelinu, hvort sem gestir horfa í því sambandi til íþróttaiðkunar eða skemmtunar. Þá er golf-völlur í stutt frá hótelinu.

Þá er að sjálfsögðu fullbúin heilsulind er á hótelinu sem gestir hafa aðgang að. Þar er tilvalið að láta dekra við sig í þægilegu umhverfi auk þess sem hægt er að kaupa ýmiskonar slökunar- og vellíðunarmeðferðir gegn gjaldi.

Lopesan Baobab resort, Meloneras

Óviðjafnanlegt fimm stjörnu lúxushótel á Meloneras svæðinu. Hótelið er hluti af Lopesan-hótelkeðjunni sem einnig rekur lúxushótelin Villa del Conde og Costa Meloneras á Kanarí sem margir Íslendingar hafa átt góð kynni við. Gisting á Baobab er einfaldlega upplifun út af fyrir sig og er VITA stolt af því að geta boðið viðskiptavinum upp á þetta einstaka hótel.

Hönnun hótelsins er í Afríkönskum stíl og ber umhverfið og vistarverur þess greinileg merki. Þessi sérstaka hönnun skapar virkilega hlýlegt og sjarmerandi umhverfi sem hentar sérstaklega vel til afslöppunar og endurnæringar á líkama og sál.

Herbergi hótelsins eru glæsileg og fallega innréttuð. Hönnun þeirra er nútímaleg en jafnframt undir sterkum afrískum áhrifum. Herbergin eru innréttuð í mildum brúnum lit sem skapar sérstakt andrúmsloft og á að skapa vellíðan hjá gestum. Herbergjunum fylgja meðal annars svalir eða verönd, loftkæling, hárþurrka, sími, flatskjár, öryggishólf gegn gjaldi, mini bar og internet aðgangur (gegn gjaldi).

Hótelið hefur sérstaklega gott aðgengi fyrir fatlaða, auk þess sem 20 herbergi hótelsins eru sérstaklega hönnuð fyrir fatlaða. Á þeim eru stærri dyr, meira gólfpláss og húsgögn sem eru sérstaklega valin með tilliti til fatlaðra.

Sérpanta þarf herbergi með aðgengi fyrir fatlaða - vinsamlega hafið samband við skrifstofu VITA sé óskað eftir því.

Hægt er að velja á milli þess að fá hálft fæði eða eingöngu morgunverð með gistingunni. Á hótelinu eru þrír veitingastaðir og er úrvalið afar fjölbreytt. Í boði eru klassískir og alþjóðlegir réttir en einnig sérhannaðir og framandi réttir sem eiga rætur sínar að rekja til Afríku. Allir ættu því að geta fundið eitthvað við sitt hæfi.

Garðurinn er sérlega glæsilegur. Í honum má finna gerviströnd og hvorki fleiri né færri en átta upphitaðar sundlaugar. Iðandi á rennur um garðinn þar sem hægt að fljóta um á kút og láta sig dreyma. Börnum er gert sérstaklega hátt undir höfð. Fyrir þau hefur verið skapaður sérstakur heimur, Panchi World, þar sem að möguleikinn á því að láta sér leiðast er einfaldlega ekki fyrir hendi. Sundlaugagarðurinn er í raun veröld út af fyrir sig þar sem gestir eru alltaf að uppgötva eitthvað nýtt.

Fyrir þá sem vilja spila golf er Baobab tilvalinn kostur. Tveir golfvellir eru í innan við þriggja kílómetra fjarlægð og ef pantað er með fyrirvara mun hótelið sjá fyrir flutningi golfvöllinn - án endurgjalds.

Lopesan Villa del Conde Resort & Corallium Thalasso, Meloneras

Lopesan Villa del Conde er fimm stjörnu lúxushótel sem stendur við strandgötuna í Meloneras. Á Villa Del Conte er allur aðbúnaður framúrskarandi góður og má með sanni segja að allt sé til alls. Villa Del Conte er fyrir vandláta sólardýrkendur sem vilja aðeins það besta.

Hótelið hefur allt sem ferðamenn geta búist við að fá á fimm stjörnu hóteli, vistarverur eru sannarlega á heimsmælikvarða og hugsað er fyrir hverju smáatriði. Herbergin eru rúmgóð og einkar smekkleg.

Hótelgarðurinn er fallegur og hýsir m.a. fimm sundlaugar , strönd, barnalaug, heilsulind, mini-golf, fimm veitingastaði og bari. Allstaðar er þjónustan fyrsta flokks. Villa Del Conte er frábært hótel sem veldur engum vonbrigðum.

ATH. Möguleiki er að sérpanta herbergi með aðstöðu fyrir fatlaða.

Paradisus Gran Canaria, San Agustin

Paradisus Gran Canaria er nýtt 5 stjörnu lúxushótel með öllu inniföldu við San Agustín ströndina. Hótelið opnaði í mars 2023 og er á frábærum stað aðeins 200 metra frá strönd

Á hótelinu eru samtals 297 herbergi, Öll með kaffivél fyrir hylki, fríum minibar og náttsloppum

Á hótelinu er boðið upp mikla afþreyingu svo hér þarf engum að leiðast, meðal þess sem í boði er er heilsulind, líkamsrækt, 6 sundlaugar, veitingastaðir og barir. Heilsulind hótelsins býður upp á fjöldan allan af heilsu- og snyrtimeðferðum og hægt er að fara í Tyrkneskt bað, nudd eða sauna gegn auka gjaldi. Veitingastaðir hótelsins eru 8 talsins og bjóða ýmist upp á hlaðborð eða a-la-carte rétti. Snarlbar er við sundlaugina og bar er í anddyri hótelsins sem er opinn allan sólarhringinn, ekki má svo gleyma Grand Café barnum sem er mjög skemmtilegur. Á kvöldin er svo ýmis konar afþreying s.s. lifandi tónlist, þema-kvöldverðir og bíó svo eitthvað sé nefnt. Talsverð afþreying er einnig í boði fyrir börn frá 5 ára aldri s.s. leiki, föndur, þematíma og íþróttastarfsemi. Einnig er heilmikið um að vera fyrir unglinga s.s. leiki á ströndinni, ýmsa vatnaleiki og bíó á kvöldin.

Bungalows Vistaflor, Maspalomas

Vistaflor er skemmtilegur smáhýsagarður sem samanstendur af 210 smáhýsum, öll húsin eru á tveimur hæðum og eru smekklega innréttuð og mjög heimilisleg. 

Val er um smáhýsi ýmist með einu eða tveimur svefnherbergjum. Á neðri hæð húsanna er eldhúskrókur, stofa með svefnsófa og úti verönd með borði og stólum, á efri hæð er svefnaðstaða með svölum og baðherbergi. Í öllum húsunum er öryggishólf gegn gjaldi, hárþurrka, þráðlaust net og loftkæling. 

Smáhýsagarðurinn er á rólegum stað miðsvæðis í Maspalomas. Lítil kjörbúð er á svæðinu þar sem versla má allar helstu nauðsynjar en einnig er verslun í 350 metra fjarlægð. Hægt er að velja um að vera aðeins með morgunmat eða hálft fæði (morgunmatur og kvöldmatur) eða í öllu innföldu.

Garðurinn sem umlykur svæðið er stór og fallegur. Þarna eru tvær sundlaugar en önnur laugin er barnalaug sem er upphituð, sundlaugarnar eru opnar frá kl.10 á morgnana til kl. 18 síðdegis. Sólbekkir eru á víð og dreif víðs vegar um garðinn.  Góð aðstaða er fyrir barnafjölskyldur en þarna er bæði skemmtidagskrá yfir daginn og barnaleiksvæði. Móttaka er opin allan sólarhringinn. Á hótelinu er í boði frí skutlþjónusta tvisvar á dag til og frá Maspalomas ströndinni. Frá hótelinu til Maspalomas strandarinnar er farið klukkan 09:50 og 11:45 og til baka frá ströndinni kl. 15:30 og 16:30.

Vistaflor er tilvalið fyrir fjölskylduna.

Lemon and Soul Hotel, Las Palmas

Vel staðsett þriggja stjörnu hótel í Las Palmas, aðeins steinsnar frá Las Canteras ströndinni og aðeins í 800 metra fjarlægð frá miðbænum. Allt um kring eru veitingastaðir og verslanir. 

Á hótelinu er móttaka opin allan sólarhringinn og upp á þakinu er sólbaðsaðstaða og jacuzzi.  Öll herbergin sem samtals eru 71 voru tekin í gegn árið 2019, öll eru þau búin þægindum eins og sjónvarpi,síma, loftkælingu, þráðlausu interneti og fullbúnu baðherbergi þar sem er sturta og hárþurrka. 

Í boði eru Standard herbergi sem eru með útsýni yfir götuna og Standard Economy herbergi, í báðum herbergja týpum geta verið allt að einn til tveir einstaklingar. 

Góður kostur fyrir þá sem vilja dvelja í höfuðborginni og njóta alls þess sem hún hefur uppá að bjóða

Ath. Fararstjórar VITA eru ekki staðsettir í Las Palmas en hægt er að nálgast þá í þjónustusíma. 

Jardin Del Atlantico, Playa del Inglés

Suitehotel Playa del Inglés

HL Suitehotel er glæsilegt hótel, frábærlega staðsett í hjarta Ensku strandarinnar, aðeins 200 metra frá sjónum. Aðeins ætlað 18 ára og eldri. Verslanir og veitingastaðir í götunum í kring og korters gangur í Yumbo-verslunarmiðstöðina.

Í hótelinu eru 260 rúmgóð og björt herbergi og svítur sem ætluð eru einum eða tveimur fullorðnum. Innréttingar eru stílhreinar og nútímalegar, í ljósum við og dempuðum litum. Öll nútímaþægindi eru að sjálfsögðu til staðar, stillanleg loftkæling og upphitun, sími, flatskjársjónvarp með gervihnattarásum, smábar og aðstaða til að laga te og kaffi. Öryggishólf er gegn gjaldi en þráðlaus nettenging er að kostnaðarlausu. Á baðherbergjum er sturta, hárþurrka og baðvörur.

Í veitingasal er boðið upp á kalda og heita rétti af og hægt er að fylgjast með kokkunum laða fram það besta úr fersku hráefni úr nærsveitum. Setustofubar er opinn allan daginn og við sundlaugina er einnig snarl- og drykkjabar. Á þakveröndinni er bar með frábæru útsýni, nuddpottar og sólbaðsaðstaða með sérsvæði fyrir þá sem kjósa að njóta sólarinnar naktir.

Tvær sundlaugar eru við hótelið, önnur upphituð. Allt um kring er sólbaðsaðstaða með bekkjum og sólhlífum. Skemmtidagskrá með lifandi tónlist er í boði flest kvöld vikunnar.
Líkamsræktaraðstaðan er á efstu hæð og ekki ónýtt að gleyma sér yfir útsýninu á meðan haldið er í formið á hlaupabrettinu. Svo er bara að njóta þess að slaka á í innisundlauginni, gufubaði eða nuddi í heilsulindinni og láta stjana við sig í einhverri af þeim fjölmörgu snyrti- og nuddmeðferðum sem í boði eru.

Gestamóttakan er opin allan sólarhringinn og þar er bílaleiga og þvotta- og þurrhreinsiþjónusta.

Flott hótel, aðeins 200 metra frá strönd, þar sem hægt er að leggjast í sandinn eða stunda vatnasport af ýmsu tagi.

Bull Vital Suites & Spa Boutique hotel, Playa del Inglés

Vital Suites er gott hótel á frábærum stað á ensku ströndinni á Kanarí. Útsýni er yfir golfvöllinn í Maspalomas. Einnig er fallegt útsýni yfir sandöldurnar og vitann. Stór innisundlaug og heilsulind. Nokkurra mínútna gangur í miðbæinn á Ensku ströndinni, Yumbo-verslunarmiðstöðina og korter niður á strönd.

Í hótelinu eru 56 herberg, um 60 fermetrar að stærð, ætlaðar allt að þremur fullorðnum. Innréttingar eru nútímalegar og stílhreinar, í hvítum og ljósum litum. Flísar eru á gólfum. Alls staðar er loftkæling, smábar, sími, tvö flatskjársjónvörp með gervihnattarásum, þráðlaus nettenging, vaskur, hraðsuðuketill, örbylgjuofn og leirtau. Öryggishólf er gegn gjaldi. Á baðherbergjum er baðker og sturta, hárþurrka, baðsloppar og baðvörur. 

Morgunverður er borinn fram á veitingastaðnum Panorama í sundlaugargarðinum, með útsýni yfir Maspalomas-golfvöllinn og sandöldurnar. Frá hádegi og fram á kvöld eru miðjarðarhafsréttir í boði af matseðli auk sérvaldra víntegunda. Eldhúsið er opið frá 13 til 18 en barinn er opinn fram á kvöld.
Í hótelgarðinum er góð sundlaug með fallegri brú og sérlaug fyrir börnin.

Það sem gerir þetta þægilega hótel enn betra en ella er heilsulindin sem er af bestu gerð. Innilaugin er 500 fermetrar með 34°C saltvatni, nuddtúðum og fossum. Boðið er upp á gufuböð og þurrgufu, leirböð, ilmolíugufuböð og nudd-, líkams- og snyrtimeðferðir af öllum gerðum. Þar er einnig líkamsræktaraðstaða. Hægt er að panta einkaþjálfara, sjúkraþjálfara og sjúkranuddara.
Móttakan er opin allan sólarhringinn og þar er þvotta-, þurrhreinsi- og strauþjónusta, farangursgeymsla og hjólaleiga.

Vital Suites henta öllum þeim sem vilja næra líkama og sál, á rólegu svæði, með golfvöllinn á aðra hönd og Ensku ströndina á hina. Stórgóð heilsulind þar sem  boðið er upp fjölda meðferða. Tíu mínútna gangur í Yumbo-verslunarmiðstöðina, korter niður á strönd og allra handa afþreying á láði og legi allt um kring.

Hl Rondo, enska ströndin

Hotel Cristina by Tigotan, Las Palmas

Bungalows Cordial Sandy Golf, Maspalomas

Cordial Sandy Golf eru smáhýsi sem eru staðsett beint á móti Green Golf og eru þau einnig stutt frá Maspalomas golfvellinum. Hótelið er vel útbúið. Húsin eru björt og rúmgóð m.a. með eldhúskrók, ísskáp, brauðrist og kaffivél. 

Það er viftuspaði inn í herbergjum en ekki loftkæling. 

Greiða þarf fyrir afnot af sjónvarpi. Garðurinn er nokkuð stór og skartar góðri sólbaðsaðstöðu, sundlaug, barnalaug og barnaleiksvæði.
Nettenging er við sundlaug. 

Systurhótelið Green Golf er beint á móti en þar má finna litla kjörbúð. Gestir Sandy Golf geta notað þjónustu Green Golf kjósi þeir svo.
Þar er hægt að kaupa morgunmat og hálft fæði. 
Fara þarf niður á strönd eða í miðbæinn eftir verslun og veitingastöðum. 

Sundlaugarbarinn á Sandy Golf er opinn frá 11-18 en barinn á Green Golf lengur.