NYX Hotel Dublin Christchurch

NYX Hotel Dublin Christchurch sem áður hét Hard Rock Hotel í Dublin er glæsilegt hótel, staðsett miðsvæðis í Temple Bar hverfinu. Dvöl á hótelinu er upplifun og tónlist er einkennandi fyrir hótelið, hvar sem litið er.

Á hótelinu eru 120 herbergi sem skiptast í tveggja til þriggja manna herbergi og svítur. Herbergin eru rúmgóð, litrík og kósý með fallegum viðarhúsgögnum, listaverkum í tónlistarþema, góðum rúmum og teppum á gólfum. Í öllum herbergjum eru loftkæling, frítt internet, flatskjársjónvarp, lagalisti, skrifborð, kaffivél og svæði þar sem hægt er að setjast niður, slaka á og hlusta á tónlist. Baðherbergi eru snyrtileg, þau eru flísalögð og þar eru sturta, hárblásari og helstu snyrtivörur.

Á hótelinu er líflegur veitingastaður sem er opinn allan daginn og fram á kvöld. Þar er hægt er að panta sér morgunmat eða njóta kvöldverðar í skemmtilegu andrúmslofti. Einnig er hægt að panta mat upp á herbergið og njóta í afslappandi umhverfi. Á hótelinu er kaffihús og í anddyri hótelsins er bar þar sem plötusnúðar eða tónlistarmenn skapa kósý og upplífgandi setustofustemningu. Allt í kring um hótelið eru veitingarstaðir, barir og kaffihús með fjölbreytt úrval. Mikið líf er í grennd við hótelið og stutt að fara í partý en ef gestir nenna ekki út af herberginu sínu býður hótelið upp á fjölbreytta afþreyingu. Það er til dæmis hægt að taka jógatíma í sjónvarpinu, hlusta á geggjaða einstaklingsmiðaða lagalista í hljóðkerfi herbergisins, panta plötuspilara og plötur eða jafnvel Fender rafmagnsgítar og magnara með heyrnartólum upp á herbergi.

Hótelið er áhugaverður kostur fyrir fjölbreyttar tegundir ferðamanna en ekki síst fyrir þá sem elska tónlist. Staðsetningin er frábær, stutt í sögu- og menningartengda áfangastaði og margt af því helsta sem einkennir Dublin í göngufæri. Auðvelt er að komast í sporvagninn ef gestir hafa hug á að fara út fyrir svæðið.

Camden Court

Gott hótel sem er vel staðsett nálægt Stephen´s Green garðinum í göngufæri við miðbæinn.  Á hótelinu er heilsurækt og sundlaug, einnig veitingastaður, bar og krá þar sem hægt er að fá létta rétti. Miðbærinn er í 10 - 15 mín göngufjarlægð. Við hliðina á hótelinu er frábær írskur bar The bleeding horse, en þar er kjörið að setjast inn eftir bæjarrölt og fá sér einn Guinness.

Herbergin eru stór og vel búin með sjónvarpi, síma, internettengingu, hárþurrku, buxnapressu og bakka með hraðsuðukönnu, te og kaffi.
Sameiginleg aðstaða er fín og góðar seturstofur við gestamóttökuna. Hótel sem hentar mjög vel fyrir hópa.

The Morgan Hotel

Morgan hotel er nýtískulegt og mjög gott 4 stjörnu hótel, frábærlega vel staðsett á Temple Bar hverfi í hjarta Dublinar. 

Á hótelinu eru 61 herbergi, standard, de luxe herbergi og svítur. Á herbergjum hótelsins sem og á hótelinu öllu er blandað saman nokkrum „stílum“ úr arkitektasögunni þar sem lögð er áhersla á að gestir upplífi vellíðan og notalegheit.  Öll herbergi eru vel útbúin með öllum helstu þægindum s.s. flatskjá, geislaspilara, síma, internettengingu, öryggishólfi, kaffi/te setti, öryggishólfi og hárþurrku.  

Skemmtilegur bar er á hótelinu þar sem allt iðar af lífi þegar líður á kvöld, enda er hótelið staðsett í einum liflegasta hluta borgarinnar Temple Bar hverfi. Á hótelinu er  skemmtilegur tapas bar sem er opinn frá hádegi og fram á kvöld. Úrval veitingastaða og kráa má svo finna í næsta nágrenni. 

The Green Hotel

Gott fjögurra stjörnu hótel á allra besta stað í Dublin. Hótelið er í fallegri og sjarmerandi byggingu við Stephen´s Green almenningsgarðinn í hjarta borgarinnar. Örstutt er að göngu- og verslunargötunni Grafton Street. 

Flottur bar og góður veitingastaður með fallegu bókasafni.

Herbergi eru 90 og öll innréttuð í mismunandi litum.  Þau eru með síma, gervihnattasjónvarpi með flatskjá, nettengingu, öryggishólfi, síma, hárþurrku, te- og kaffisetti.

Travelodge Plus Dublin City Center

Travelodge PLUS Dublin City center er nýtt hótel í hjarta Dublin, opnar sumar 2021.
Rétt við Trinity háskólann, 10 mínútna gangur að Grafton stræti þar sem finna má allar helstu verslanir og veitingastaði og um 5 mínútna gangur að Temple Bar. 

Á hótelinu eru 393 herbergi og 173 svokölluð "SuperRooms". Herbergin eru nútímaleg og falleg í ljósum litum. Á öllum herbergjum eru góð rúm, sjónvarp, hárþurrka og frítt þráðlaust net. 
"Super" herbergin eru staðsett á hærri hæðum hótelsins og þar er einnig kaffi vél og hægt að velja á milli mismunandi kodda.

Sameiginleg aðstaða á hótelinu er mjög góð, þar er góður veitingastaður og bar. Nettengin er um allt hótelið og alls staðar hægt að finna USB tengi til að hlaða síma og tölvur. 
Sjálfsafgreiðsla í check in fyrir þá sem það kjósa.