Hagnýtar upplýsingar

Flugvöllur: 

Flugvöllurinn er Rome Airport Fiumicino (FCO).

Flug: 

Flugið tekur u.þ.b. 4 1/2 klukkustund.

Farangur: 

Leyfilegt er að taka með sér 1 tösku sem vegur að hámarki 23 kg og er mest 158cm á lengd, ef flogið er á almennu farrými. 
Hægt er að finna nánari upplýsingar um leyfilegan farangur á vefsíðu Icelandair. 

Gistináttaskattur: 

Við vekjum athygli á gistináttaskatti sem borgaryfirvöld í róm innheimta af ferðamönnum. Hann er 5-7 evrur á mann á nótt, misjafnt eftir hótelum. Skattur þessi greiðist beint til hótelsins við brottför. 

Tímamismunur: 

Frá 26. október til 30. mars er Róm einum tíma á undan, en frá 30. mars til 25. október eru Róm tveimur tímum á undan

Greiðslukort: 

Lang flestar búðir og veitingastaðir taka öll helstu kreditkort. Ekki er hægt að treysta því að hægt sé að greiða fyrir vöru eða þjónustu með debetkorti, en að sjálfsögðu er hægt að taka pening út úr hraðbönkum, hvort sem er út á kredit- eða debetkort. Nota þarf PIN-númer á allar greiðsluvélar. Þetta á við bæði um verslanir og veitingastaði.

Samgöngur: 

Umferðin er talsverð og hröð svo farið varlega, en oftast sýna ökumenn fótgangandi tillitssemi. 
Það eru þrjár jarðlestabrautir (metro) í Róm, linea A, B og C.  Miðar í samgöngutæki eru seldir í sjálfsölum á lestarstöðvum og í tóbaksvörubúðum, “Tabacchi.” Miðar eru stimplaðir við innganginn fyrir neðanjarðarlestarnar en sé ferðast með strætó er miðinn stimplaður þegar komið er inn í vagninn. Neðanjarðarbrautirnar ganga á 7-10 mín. fresti frá 5.30 til 23.30 (á laugardögum til 0.30). Strætisvagnar ganga frá 5.30 til 24.00 og næturvagnar á hálftíma fresti  frá 0.30 til 5.30. Merktir með uglu.

Verðlag:

Verðlag á Ítalíu hefur hækkað talsvert síðustu ár. Á hótelum er svipað verðlag og hér heima. Öll þjónusta, þ.á.m. matur, drykkur, hreinsun o.fl., getur verið dýr. Hafa ber í huga að barir og aðrir veitingastaðir á aðaltorgum eru nær alltaf dýrari en í hliðargötum. Einnig er tvenns konar verðlag í gangi á börum.  Ódýrara ef menn standa við barinn og drekka hvort sem er bjór eða kaffi, en hærra verð ef setið er til borðs. Munurinn er þó kannski ekki slíkur að maður spái í það í stuttri dvöl í borginni

Vatn:

Ávallt skal drekka flöskuvatn en kranavatn er í góðu lagi til tannburstunar og þvotta.

Þjórfé:

Það er ekki nauðsynlegt að skilja eftir þjórfé en þó er það oft gert.  Á veitingahúsum er miðað við ca 5% af heildarreikningi. 10% er ofrausn. Á börum eru skilin eftir u.þ.b. 20 cent, -fer eftir neyslu og fjölda og hvort setið var við borð. Mörg veitingahús hafa bætt þjónustu –servizio- inn á reikninginn. Skoðið því reikninginn vel áður en farið er að gefa þjórfé. Auðvitað fer þetta eftir því hvort menn eru sáttir við þjónustuna og matinn. Í leigubílum er algengt að bæta 5% við upphæðina. Töskuburðarmenn fá um 50 cent fyrir hverja tösku.

Aðgát skal höfð:

Mikill erill er í Rómarborg svo gætið vel verðmæta. Veski hefur maður alls ekki í rassvösum og óvarlegt er að hafa fjármuni og kreditkort á sama stað. Notið innanklæðaveski! Þegar gengið er á gangstéttum er tryggara að vera ekki með veski/töskur á öxlinni götumegin (“töskuhrifsarar!”).  Varað er sérstaklega við vasaþjófum en þekktir vinnustaðir vasaþjófa eru t.d. markaðir, torg og almenn samgöngutæki.

Tryggingar: 

Öllum ferðalöngum er ráðlagt að fara vel yfir sínar tryggingar áður en lagt er af stað í ferðalag og kaupa sérstaka ferðatryggingu sé hún ekki þegar innifalin í korti eða heimilistryggingu viðkomandi. Einnig er gott að hafa meðferðis tryggingaskírteini frá Tryggingastofnun ríkisins, komi eitthvað óvænt upp á.

Vekjum athygli á skatti sem borgaryfirvöld í Róm innheimta af ferðamönnum. Þetta eru €6 Evrur á mann á nótt og greiðist beint til hótels við brottför.

Verslun og þjónusta

Verslanir

Nú er tækifærið til að versla töskur og skó en Ítalir eru algjörlega sér á báti í úrvali á fylgihlutum.

Opnunartími er virka daga frá kl: 9.00 - 13.00, sumar búðir opna aftur kl. 15.30 og aðrar kl. 16:00 og loka síðan kl. 19:30 eða 20:00.
Í miðbænum eru þó flestar búðir opnar allan daginn og sumar til kl. 21:00. Í Trastevere eru líka búðir opnar fram eftir kvöldi. Á laugardögum er opið fram til 20 og í miðborginni eru flestar búðir opnar á sunnudögum. Einnig eru verslanir oft lokaðar fram að hádegi á mánudögum. Flestar verslanir taka við kreditkortum. Prútta má á mörkuðum.

Frægur flóamarkaður á sunnudagsmorgnum í Róm er á via Portuense, via Ettore Rolli, piazza og via Ippolito Nievo. Gott er að hafa augun á vasaþjófum á svæðinu.  
Ath! Tax-free ávisanir eru ekki gefnar út af verslunum nema verslað sé fyrir meir en 155 evrur.

Hvar á að versla?

Þú finnur 4000 fm H&M verslun í miðbænum á via del corso. Einnig er stór verslun við Piazza vittorio Emanuel (rétt hjá Termini) sem er ítölsk verslun svipuð og H&M.
Vía del Governo Vecchio er einkar skemmtileg gata fyrir þá tískuglöðu. Þar eru búðir fullar af fatnaði eftir unga tískuhönnuði.  Hátísku er að finna á götunum sem liggja þvert á og samhliða Via Condotti og Via del Babuino. Verðið er ríflegt en gæðin eftir því.  

Í Via Gesu e Maria (hliðargötu  frá Via del Corso) er II Discount dell’Alta Moda, sem er verslun sem býður upp á eldri árganga af hátískuvörum á lágu verði (afsláttabúðir taka ekki kreditkort).  

Þeir sem eru í leit að íþróttafatnaði  koma við  í versluninni Cisalf Largo Brindisi við San Giovanni neðanjarðarstöðina.
Via del Corso og Via Nazionale eru góðar verslunargötur ásamt Via Appia Nuova gata þar sem hægt er að gera góða kaup á öllum almennum fatnaði.
Á Via Cola di Rienzo er einnig hægt að versla allt milli himins og jarðar á góðu verði.  

Má svo geta þess að Ítalía er gósenland fyrir lestrarhesta og er Feltrinelli International, Via V.E.Orlando 84 sögð stærsta enska bókabúðin á Ítalíu og selur bæði nýjar og notaðar bækur. 

Engar „kringlur“ (malls) eru í miðborg Rómar, en í úthverfi fyrir sunnan borgina er Centro Commerciale Eurome í Via Cristoforo Colombo 714 þar sem er m.a. H&M-verslun.  Aðrar stórverslanir í úthverfunum heita m.a. Galleria Porta Di Roma og Roma Est.

Eins og að ofan greinir er helsta verslunarhverfið í borginni út frá –Via del Corso- en sú gata nær frá Piazza Venezia og út á Piazza del Popolo.
Verðið spannar allan skalann en hægt er að gera kjarakaup, einkum í skófatnaði.

Skoðunarferðir

Í Róm bjóðum við upp á skemmtilegar skoðunarferðir um Róm í samvinnu við Rómarrölt.
Ferðirnar eru valkvæðar og má bóka í bókunarvélinni sem hluta af pakkanum. 

Miðbæjarrölt, hjarta Rómar

Miðbæjarröltið hentar vel til að kynnast borginni, við skoðum stórbrotna og hrífandi staði og fræðumst um sögu þeirra og uppruna. Meðal annars Spænsku tröppurnar, Trevi gosbrunninn, Pantheon hofið að utan, Navona torgið og endum ferðina á Campo de' Fiori torginu. Þar er að finna fullt af skemmtilegum veitingastöðum og fjölskrúðugt mannlíf. 

Aventinorölt, leyndar perlur

Aventino hæðin er eitt af hornum Rómarborgar sem engin má missa af. Byrjum ferðina á að skoða kirkju Heilags Valentínusar og gin sannleikans (La bocca della veritá).  Göngum upp að Rósagarðinum þar sem er ótrúlegt útsýni yfir forna kappreiðarleikvanginn Circus Maximus og handan hans til Keisarahallanna fornu á Palatinum. Skoðum svo Appelsínugarðinn sem býður uppá stórkostlegt útsýni yfir borgina. Þar er einnig að finna perlu Aventino hæðar, Santa Sabina kirkjuna sem reist var 422-432 eftir Krist. Heimsækjum Norræna listamanna setrið í Róm sem var stofnað 1860. Kíkjum í gegnum frægasta skráargat borgarinnar og sjáum hvaða leyndardóm það felur. Göngum svo niður í Testaccio-hverfið, rólegt og hefðbundið rómverskt hverfi, þar sem Monte Testaccio, fjall úr brotnum leirkerum frá tíma Rómverja, stendur í miðju hverfisins. Að lokum heimsækjum við hinn líflega Testaccio-markað, þar sem hægt er að njóta ítalskra matarupplifana og stemningar.

Keisararölt, hin forna Róm

Byrjum á að sjá hvar Júlíus Sesar var myrtur og heimsækjum gyðingahverfið. Förum upp á Capitol hæðina, á torgið sem Michelangelo hannaði, þar sem við sjáum yfir Foro Romano. Göngum Via dei Fori Imperiali þar sem við sjáum yfir gömlu keisaratorgin, Foro di Augusto, Foro di Cesare og Foro Traiano og endum á að skoða Colosseum hringleikhúsið að utan og Sigurboga Konstantínusar mikla. Þessi ferð hentar vel til að kynnast sögu fornu Rómar og Colosseum og er svo tilvalið að fara á eigin vegum inn í Colosseum. 

Markaðsrölt, Porta Portese

Sögulegi Porta Portese markaðurinn er staðsettur í hinu heillandi Trastevere hverfi og er sá frægasti og stærsti í borginni og með þeim stærstu í Evrópu. Heimsókn á markaðinn er sannur sunnudagssiður fyrir Rómverja. Hann býður upp á fjölbreytt úrval, allt frá fatnaði (nýjum og gömlum, notuðum og vintage) og fylgihlutum til fornmuna. Vintage muni, nútímalist, málverk, bækur, skartgripir, úr, húsgögn, vínyl og geisladiskar, raftæki og margt fleira.

Porta Portese markaðurinn er sannkölluð paradís fyrir þá sem elska verslun og vintage.

Hildur Hinriksdóttir, hönnuður mun leiða ykkur um markaðinn og gefa ykkur góð ráð hvernig og hvar er hægt að gera góð kaup, einnig mun hún kynna  ykkur fyrir hluta markaðarins sem heimamenn þekkja vel, en fer oft framhjá þeim er heimsækja hann í fyrsta sinn. Við heimsækjum Roberto sem hefur verið að selja á markaðnum á hverjum sunnudegi s.l. 40 ár. 

Mælum með að mæta í góðum skóm og með reiðufé (helst i smáum seðlum)

Trastevererölt, matur, menning og mannlíf

Trastevere hverfið sem er ákaflega líflegt og skemmtilegt. Veitingastaðir og kaffibarir á hverju horni og götulíf fjörlegt. Skoðum tvær helstu kirkjur hverfisinns  Santa Maria di Trastevere og Santa Cecilia. Þræðum þröng stræti og kynnumst kynngimagnaðri stemmingu Trastevere hverfisins og margrómuðu veitingastöðum þess.  

Þessi ferð er kjörin til að kynnast matarmenningu Rómverja, heimsækjum þrjá rótgróna staði hverfisins þar sem við fáum að smakka rómverska hrísgrjónabollu með ragúsósu og mozarella osti, síðan fáum við okkur drykk á hverfisbarnum og komum svo við í lítilli súkkulaðiverksmiðju (lokuð í júlí og ágúst). 

Vatikanrölt, Péturskirkjan

Við skoðum Péturstorgið og Péturskirkjuna, stærstu og mikilvægustu kaþólsku kirkju í heimi, sem er staðsett í Vatíkanríkinu og var byggð ofan á gröf Péturs Postula. Kynnumst sögu frumkristninnar og sögu Vatíkansríkisins.

Á sunnudögum gefst tækifæri á að sjá Páfann þegar hann flytur ávarp á Péturstorginu, L'Angelus della domenica.