Hagnýtar upplýsingar

Flugvöllur: 

LIssabon (LIS)

Flug: 

Flogið með Icelandair í beinu og tekur flugið liðlega 4 klst.

Farangur: 

Leyfilegt er að taka með eina 23 kg tösku á mann og handfarangur skv. reglum Icelandair.

Akstur: 

Við bjóðum upp á akstur til og frá Lissabon flugvelli. 
Við komu til Lissabon: Farþegar finna "Meeting Point" í komusal, til vinsti eftir að komið er út úr töskusal, og þar verður skilti með nafni eins farþega í bókuninni. Starfsmaður mun vísa farþegum á bílinn. 
Við brottför frá Lissabon: Á brottfarardegi eru farþegar sóttir á hótelið sitt 3 tímum fyrir brottför. 

Tímamismunur: 

Frá 26. október til 30. mars er Lissabon á sama tíma og Ísland, en frá 27. mars til 30. október er klukkan í Lissabon einum tíma á undan klukkunni á Íslandi.

Gistináttagjald "City Tax"

Er 2 Evrur á mann á dag og greiðist beint á hótelin í lok dvalar.

Greiðslukort: 

Lang flestar búðir og veitingastaðir taka öll helstu kreditkort. Ekki er hægt að treysta því að hægt sé að greiða fyrir vöru eða þjónustu með debetkorti, en að sjálfsögðu er hægt að taka pening út úr hraðbönkum, hvort sem er út á kredit- eða debetkort. Nota þarf PIN-númer á allar greiðsluvélar. Þetta á við bæði um verslanir og veitingastaði.

Samgöngur: 

Fyrir þá sem ekki vilja ganga eru leigubílar á hverju strái. Einnig er hægt að nota sporvagna og jarðlestir.

Vatn:

Ávallt skal drekka flöskuvatn en kranavatn er í góðu lagi til tannburstunar og þvotta.

Þjórfé:

Það er ekki nauðsynlegt að skilja eftir þjórfé en þó er það oft gert. Á veitingastöðum: Ca 5% af heildarreikningi. 10% er ofrausn.

Tryggingar: 

Öllum ferðalöngum er ráðlagt að fara vel yfir sínar tryggingar áður en lagt er af stað í ferðalag og kaupa sérstaka ferðatryggingu sé hún ekki þegar innifalin 

Verslun og afþreying

Lissabon er borgin fyrir þig.

Markaðir: 

Feira da Ladra: Eða "Þjófamarkaðurinn" er skrautlegur flóamarkaður á Campo de Santa Clara rétt við kirkju heilags Vincents. Sjálfsagt að taka frægasta sporvagn Lissabon, nr. 28, þangað uppeftir. Opinn á laugardögum frá ca 06.00 til 16.00. 

Mercado da Ribeira: Einn af 10-12 innimörkuðum í Lissabon, rétt hjá járnbrautarstöðinni  Cais do Sodré við Tejo-ána. Aðallega matvörumarkaður, opinn föstudaga og laugardaga ca 08.00 til 14.00 og 15.00 til 19.00, en á sunnudögum eru seldir þar listmunir, bækur o.fl. á 1. hæð.

Á flestum mörkuðum eru greiðslukort ekki samþykkt og borga þarf með reiðufé. Sjálfsagt að prútta verð niður um ca 50%. Á mörkuðum er einnig nauðsynlegt að vera á varðbergi gagnvart vasaþjófum. 

Verslunarmiðstöðvar:

El Corte Inglés: (Praça de Espagna/Spánartorg) Opið frá 10.00-23.30 föstudaga og laugardaga.

Amoreiras: (Avenida Engenheiro Duarte Pacheco, Amoreiras) Opið frá 10.00 – 23.00 alla daga. Elsta „kringla“ borgarinnar. Var opnuð um miðjan 9. áratug síðustu aldar.

Centro Colombo: (Avenida Lucíada, Benfica) Opið frá 10.00 – 24.00 alla daga. Risakringla!

Skemmtigarðar: 

Parque das Nações: Garður fyrir börn á öllum aldri á Heimssýningarsvæðinu 1998. Portúgalir eru stoltastir af Oceanário, sjávardýrasafninu. Á brautarstöðinni við garðinn, Estacao do Oriente, er listaverk eftir Erró. Hentugast að fara með leigubíl eða jarðlest.

Casadefado: Talað er um "fado" sem ,Seiðmagnaða portúgalska þjóðlagatónlist og eru staðir "Casa" í Lissabon sem bjóða upp á slíka tónlist. Mikil aðsókn er á þessa staði svo það er vissara að biðja hótelið að bóka borð fyrir sig á e-h af neðangreindum stöðum

Senhor Vinho: (Rua do Meio á Lapa)

A Severa: (Rua das Gáveas 51)

Adega Machado: í Bairro Alto þar sem flestir fado-staðirnir eru.