Hagnýtar upplýsingar

FLUG:

Flugtíminn er um fjórar og hálf klukkustund. Flogið með Icelandair.

Inn á heimasíðu Icelandair er m.a. hægt að innrita sig í flugið, bæði út og heim 24 klst. fyrir flug, bóka sig í sæti og setja inn upplýsingar svo hægt sé að safna Vildarpunktum fyrir flugið fyrir þá sem eru í Vildarklúbb Icelandair. Einnig er hægt að panta mat fyrirfram fyrir flugið, í síðasta lagi 24 klst fyrir brottför.

Í einstaka tilvikum er flogið með öðrum flugfélögum en þá er það tekið fram í bókunarvél. 

FARANGUR:

Icelandair: Leyfilegt er að taka með sér eina innritaða tösku ef flogið er á almennu farrými. Hún má að hámarki vega 23 kg og heildarumfang (lengd + breidd + hæð) má ekki vera meira en 158 cm, að meðtöldu handfangi og hjólum.
Hægt er að finna nánari upplýsingar um leyfilegan farangur á vefsíðu Icelandair. 

AKSTUR:

Hægt er að bóka akstur til og frá flugvelli og þarf að greiða fyrir það sérstaklega. Ath. gert er ráð fyrir að hver farþegi sem bókaður er í rútuferð til og frá flugvelli sé með 1  tösku, ef ferðast er með meiri farangur þarf að láta vita fyrirfram og jafnframt ath. hvort að sé pláss í farangursgeymslu rútunnar. 

Ekki er boðið upp á rútuferðir til og frá flugvelli til Alicante borgar en auðvelt er að taka leigubíl á milli þar sem einungis er um 10 mín akstur inn í borgina.

TÍMAMISMUNUR:

Á sumrin eru þeir tveimur klukkustundum á undan. 

GREIÐSLUKORT:

Lang flestar búðir og veitingastaðir taka öll helstu kredit- eða debetkort. Ekki er hægt að treysta því að hægt sé að greiða fyrir vöru eða þjónustu með kortum, en að sjálfsögðu er hægt að taka pening út úr hraðbönkum, hvort sem er út á kredit- eða debetkort.

ÖRYGGI:

Á flestum baðströndum gilda ákveðnar öryggisreglur því ekki eru alls staðar starfsmenn á öryggisvakt. Öryggisreglur eru þannig:

• Rauður fáni: Bannað er að fara í sjóinn. Getur varðað sektum.
• Gulur fáni: Aðgát skal höfð við böð.
• Grænn fáni: Ládeyða, gott baðveður

TRYGGINGAR:

Öllum ferðalöngum er ráðlagt að fara vel yfir sínar tryggingar áður en lagt er af stað í ferðalag og kaupa sérstaka ferðatryggingu sé hún ekki þegar innifalin í korti eða heimilistryggingu viðkomandi. Einnig er gott að hafa meðferðis tryggingaskírteini frá Tryggingastofnun ríkisins, komi eitthvað óvænt upp á.

FARARSTJÓRI:

Fararstjóri VITA er á Alicante svæðinu yfir sumartíma. Hún heitir Jóhanna G. Benediktsdóttir.  Jóhanna tekur á móti farþegum á flugvelli og hægt er að ná í hana í þjónustu/neyðarsíma á meðan á dvölinni stendur. Ath yfir vetrarmánuði er ekki fararstjóri á vegum VITA. 

APÓTEK:

Apótek bera nafnið Farmacia á spænsku og eru auðþekkt á stórum grænum krossi. Yfirleitt er auðvelt að nálgast lyf í apótekum við minni háttar kvillum. Það er alltaf eitthvað apótek opið allan sólarhringinn og hægt er að fá upplýsingar hjá læknum, leigubílstjórum eða í hótelmóttöku um hvaða apótek er með næturvakt hverju sinni.

LÆKNISÞJÓNUSTA

Ef grunur leikur á veikindum skal hiklaust leita til læknis. Sama á við ef slys verða. Á svæðinu eru læknastofur (Clínica) sem bjóða upp á læknisþjónustu allan sólarhringinn. Þar eru yfirleitt enskumælandi læknar sem geta komið í vitjun á gististaði ef þess er óskað. Einnig bendum við á að móttakan á hótelinu getur verið ykkur innan handar.
Þjónustuaðilar munu að sjálfsögðu aðstoða við læknasamskipti ef þess er óskað. Mikilvægt er að hafa vegabréf og tryggingarskjöl (bláa alþjóðlega tryggingarskírteinið frá TR E-111) meðferðis þegar læknisaðstoðar er leitað.

BANKAR:

Opnir frá kl. 09:00 til 14:00 alla virka daga. Á laugardögum er opið frá kl. 09:00 til 12:00. Hraðbankar eru víða og mælum við með að nota þá sem eru hjá bankaútibúum. Hægt er að taka út peninga í hraðbönkum, en athugið þá að hafa PIN númer kortsins við hendina. Þegar verslað er út á kredit- og debetkort í búðum er fólk stundum beðið um að sýna vegabréf til að staðfesta að þeir eigi kortið.

KRANAVATNIÐ:  

Er drykkjarhæft en það bragðast ekki vel. Við mælum með að keyptar séu vatnsflöskur í matvöruverslunum til drykkjar og matargerðar.

MOSQUITOFLUGUR:  

Lifa hér og því er skynsamlegt að bera á sig svokölluð anti-mosquito krem eða úða þegar rökkva tekur (slík krem/úðar er hægt að kaupa í apótekum og í flestum matvöruverslunum). Við hvetjum ykkur til að leita hiklaust til læknis ef þið fátið slæmt bit.

ÞJÓRFÉ:

Það tíðkast að gefa  5-10% þjórfé fyrir góða þjónustu, og á það sérstaklega við um veitingastaði.. 

BÍLALEIGUBÍLAR

Best er að hafa samband við þjónustuaðila okkar um leigu á bílaleigubil. Rétt er að hafa í huga að væntanlegur ökumaður þarf að hafa gilt ökuskírteini og vegabréf til að geta tekið bíl á leigu. Við árekstur þarf alltaf að kalla til lögreglu og fylla út skýrslu, bæði fyrir bílaleiguna og leigutaka. Ath stafrænökuskirteini  eru ekki gild á Spáni. 

ALMENNINGSVAGNAR

Ganga yfirleitt á 15-40 mínútna fresti og heitir strætisvagnafyrirtækið Autobuses Ifach. 

LEIGUBÍLAR

Eru þægilegasti ferðamátinn og þá er auðvelt að finna. Bílarnir eru hvítir að lit og það logar grænt ljós á þeim ef þeir eru lausir. Auðveldast er að veifa þeim út á götu eða láta gestamóttöku eða veitingastaði panta þá. Allir leigubílar eiga að vera með gjaldmæli en þó taka þeir yfirleitt fast verð fyrir ákveðnar vegalengdir.

Verslun og þjónusta

VERSLUN;

Mikið úrval er af verslunum og eru þær almennt opnar frá kl. 09:00 – 24:00.
Verslunarmiðstöðin Centro Comercial Plaza Mar 2 er í 10 mín aksturs fjarlægð frá miðbæ Alicante, hún er opin alla daga frá kl. 09:00-22:30 nema sunnudaga frá kl. 11:00-22:00.
Verslunarmiðstöðin Centro Comercial Gran Vía þar sem m.a. er Primark er í u.þ.b. 15 mín aksturs fjarlægð frá miðbænum, hún er opin alla daga frá kl. 09:00-01:00 eftir miðnætti nema á sunnudögum þá opnar hún kl. 12:00 á hádegi og er opin til kl. 01:00 eftir miðnætti.
Einnig eru outlet verslanir "The Outlet Stores Alicante" í um 20 mín aksturs fjarlægð frá miðbænum.

MARKAÐIR:

Flottur matarmarkaður "Mercat Central d'Alacant" með sjávarfang, kjöt, osta, brauð og fleira er í miðbæ Alicante. Hann er opinn frá kl. 07:00-14:30 alla daga nema sunnudaga, þá er lokað. Heimilisfangið er Av. Alfonso El Sabio, nº 10.
Flottur útimarkaður er einnig í Alicante í u.þ.b. 10 mín aksturs fjarlægð frá miðbæ Alicante. Hann heitir Mercadillo Teulada. Markaðurinn er með allt milli himins og jarðar s.s. sælgæti, ávexti, grænmeti, osta, sjávarfang og ýmislegt fleira matarkinns. Einnig fæst þar fatnaður, skór, gjafavara og ýmislegt fleira. Markaðurinn er staðsettur við götuna Calle Teulada og er opinn á fimmtudögum og laugardögum kl. 07:30-14:00.

ATH Varið ykkur sérstaklega á þjófunum þegar farið er á markaði.