Melia Marina Varadero

Nýlegt og gott 5 stjörnu hótel við smábátahöfnina í Varadero. Glæsileg aðstaða með átta veitingastöðum og fimm sundlaugum.

Í hótelsamstæðunni eru 423 herbergi og svítur og 348 stúdíó. Allar vistarverur eru flísalagðar og fallega innréttaðar í litum sem vísa í hafið. Herbergin eru 43 fm að stærð, búin loftkælingu, síma, flatskjársjónvarpi með gervihnattarásum, öryggishólfi, straujárni, strauborði og kaffivél og smábar sem fyllt er á daglega. Þau snúa ýmist út að sundlaugargarðinum  eða smábátahöfninni. Á baðherbergi er sturta og bað, hárþurrka, baðvog og sími. Þráðlaust netsamband er í öllum vistarverum gegn gjaldi.

Átta veitingastaðir eru á hótelinu og ættu því allir að finna eitthvað við sitt hæfi. Einn er alþjóðlegur hlaðborðsveitingastaður, aðrir sérhæfa sig í ítalskri, franskri eða asískri matargerð en hér eru einnig grill- og snarlstaður. Barirnir eru einnig átta, hver með sínu yfirbragði. Einn er tileinkaður Havana-vindlunum, hann er loftræstur og drykkirnir sérvaldir til að njóta með vindlunum. Aðrir barir leggja áherslu á kúbverska og alþjóðlega drykki og einnig er spænskur bar með úrvali léttvína og tapasrétta. Nokkrir staðanna bjóða upp á lifandi tónlist á kvöldin. Athugið að reglur geta gilt um klæðaburð.

Svæðið sem tilheyrir hótelinu er 40.900 fm og óhætt er að segja að þar sé allt til alls. Við hótelið eru 5 sundlaugar, þar af tvær barnalaugar. Tennisvellir eru á svæðinu.

Við hótelið er heilsulindin YHI. Þar eru innilaugar, líkamsræktaraðstaða, snyrtistofa og boðið er upp á úrval nudd- og heilsumeðferða. 

Á þeim hluta svæðisins sem snýr að smábátahöfninni er göngugata með gjafavöruverslunum, veitingastöðum, diskóteki, djassbar, leikjasvæði þar sem meðal annars er hægt að fara í keilu og kafa. Hægt er að ganga af hótelinu á göngubrú sem liggur yfir götu og niður á hvíta sandströndina en þangað eru liðlega 300 metrar.

Móttakan er opin allan sólarhringinn, hægt er að skipta gjaldeyri á hótelinu, þar er töskugeymsla og boðið er upp á barnagæslu.