Park Inn by Radisson, Alexander Platz

Mjög gott hótel við Alexander Platz í hjarta Berlínar. Hæsta hótelbygging borgarinnar og því stórkostlegt útsýni. Veitingastaðir og heilsulind í hótelinu, Safnaeyjan, Alexa-verslunarmiðstöðin, sjónvarpsturninn og mörg helstu kennileiti í léttu göngufæri. Neðanjarðarlestir og S-Bahn stoppa stutt frá hótelinu og því auðvelt að komast hvert sem hugurinn girnist.

Í hótelinu eru 1.012 vistarverur á 37 hæðum. Hægt er að velja um einstaklings og tveggja manna herbergi, Junior svítur sem rúma þrjá og tveggja manna gluggalausar Color slökunarsvítur. Innréttingar eru nútímalegar og stílhreinar í hlýjum brúnum tónum. Teppi er á gólfum. Alls staðar er loftkæling og upphitun, flatskjársjónvarp með gervihnattarásum, öryggishólf og þráðlaus háhraðanettenging, gestum að kostnaðarlausu. Á baðherbergjum er sturta, hárþurrka og baðvörur og á sumum er regnsturta og hiti í gólfum. Í Superior hornherbergjum og svítum er baðker. 

Þrír veitingastaðir eru í hótelinu, hlaðborðsstaðurinn Humboldt’s, Ztille-Stube, þar sem áherslan er á hefðbundna þýska rétti, og Spagos, sem sérhæfir sig í blöndu af evrópskri og kalifornískri matargerð í nútímalegu og líflegu umhverfi þar sem fylgjast má með kokkunum að störfum. Á Spagos er hægt að setjast úr á verönd og á barnum fæst að sjálfsögðu úrval ljúffengra drykkja. Þeim sem þjást ekki af lofthræðslu er bent á að setjast út á þakveröndina, í 150 metra hæð, með ljúfan drykk og njóta stórfenglegs útsýnisins yfir borgina.

Líkamsræktaraðstaðan er hin ágætasta og í heilsulindinni er gufubað og hvíldarhreiður og í boði eru nudd- og líkamsmeðferðir af ýmsum gerðum. 

Móttakan er opin allan sólarhringinn og þar er farangursgeymsla, þvotta- og þurrhreinsiþjónusta, smávöruverslun, bíla- og hjólaleiga. 
Park Inn er frábært hótel í hjarta borgarinnar, tilvalið hvort sem ætlunin er að vera mikið á ferðinni eða slaka á inn á milli í heilsulindinni. Örstutt frá sjónvarpsturninum, Alexa-verslunarmiðstöðinni, Safnaeyjunni og fjölda kennileita. Veitingastaðir og verslanir allt um kring og bæði neðanjarðarlestir og S-Bahn stoppa stutt frá hótelinu.