Sandos Monaco, Benidorm

Hótel Sandos Monaco er gott 4ra stjörnu hótel með öllu inniföldu. Gestamóttakan er stór og björt með marmara á gólfum og fínum setustofum. Sundlaugarsvæðið er allt flísalagt með sólstólum og tveimur börum. Hótelið er á Levante-ströndinni, um 450 metra frá ströndinni og gamla bænum.

Hótelið er 16 hæðir og með 199 herbergjum. Herbergin eru þokkalega rúmgóð með nýjum innréttingum og flísum á gólfi. Öll eru loftkæld með hárþurrku, flatskjá með gervihnatta- og tónlistarrásum, öryggishólfi, ísskáp eða smábar, síma og svölum. Á baðherberginu er hárþurrka og sturtuklefi.

Í veitingasal hótelsins er matur borinn fram á hlaðborði og innifalið í verði er morgun-, hádegis og kvöldverður. Barirnir eru fjórir og er einhver þeirra ávallt opinn frá klukkan 10 á morgnana til klukkan 12 á miðnætti. Áfengir drykkir sem eru innifaldir í verði eru ávallt innlendir og greiða þarf fyrir herbergisþjónustu og drykki sem eru í smábar á herbergi. Gestir yngri en 18 ára fá ekki afgreitt áfengi á hótelinu.

Á sundlaugarsvæðinu eru sundlaug, barnalaug og barir. Skemmtidagskrá er bæði á daginn og kvöldin. Á daginn leikfimi og leikir í sundlauginni og á kvöldin troða skemmtikraftar upp með lifandi tónlist. Þráðlaust internet er í gestamóttöku.

Hægt er að fá sundlaugar- og strandhandklæði á hótelinu, greiða þarf 10 EUR í tryggingu sem fæst endurgreidd þegar handklæðunum er skilað.

Athugið að hótelið er eingöngu fyrir 16 ára og eldri.