Silken Amara Plaza, San Sebastian

Mjög gott nútímalegt hótel á góðum stað við Pio XII. torg í miðborginni. 15 mínútna gangur er niður að ströndinni. Veitingastaðir og verslanir í götunum í kring. Mjög þægilegt er að komast með almenningssamgöngum frá hótelinu að helstu kennileitum og í gamla miðbæinn.

Í hótelinu eru 162 vistarverur sem skiptast í herbergi sem ætluð eru einum eða tveimur fullorðnum og fjölskylduherbergi sem rúma fjóra, auk svítu. Innréttingar eru nútímalegar og þægilegar, í hlýjum litum. Í flestum herbergjum er parkett á gólfum. Alls staðar er loftkæling og upphitun, sími, flatskjársjónvarp með gervihnattarásum, smábar og öryggishólf. Baðherbergin eru marmaraklædd og þar er hárþurrka og baðvörur. 

Úrval heitra og kaldra rétta er á morgunverðarhlaðborði í veitingasal. La Plaza veitingastaðurinn er opinn í hádeginu og á kvöldin og þar er áherslan á pintxo-smárétti og baskneska rétti í bland við alþjóðlega af matseðli. La Ola barinn býður upp á koníak og kokteila, kók og kaffi auk annarra hressandi drykkja. 

Móttakan er opin allan sólarhringinn, þar er töskugeymsla og þvotta- og þurrhreinsiþjónusta. Hægt er að leigja hjól og gefur starfsfólk góð ráð um hjólaleiðir í nágrenninu og aðstoðar við miðakaup ef ætlunin er að fara á tónleika eða aðra viðburði.

Silken Amara Plaza stendur við Pio XII torg, rétt við Urumea-ána sem liðast í gegnum borgina. Kortersgangur er niður að ströndinni og aðeins lengra í gamla miðbæinn, en hótelið er vel staðsett gagnvart almenningssamgöngum og því auðvelt að komast þangað og að helstu kennileitum á nokkrum mínútum. Veitingastaðir og verslanir eru í götunum í kring. Hótelið er nútímalegt, hannað af arkitektinum Peña Ganchegui, í afgerandi stíl. Það státar af miklu safni nútímalistaverka sem prýða sali og ganga hótelsins.