HD Parque Cristobal, Playa de las Américas

Vefsíða hótels

Mjög hugguleg smáhúsasamstæða á frábærum stað í hjarta Amerísku strandarinnar. 200 metra frá ströndinni með verslanir, veitingastaði og iðandi mannlíf allt um kring. 

Í samstæðunni eru 150 smáhýsi af tveimur stærðum, 45 og 57 fermetra, öll með verönd. Þau minni eru með einu svefnherbergi og rúma þrjá fullorðna eða tvo fullorðna og barn. Í þeim stærri eru tvö svefnherbergi og rúma þau allt að fimm einstaklinga. Innréttingar eru smekklegar og þægilegar, í ljósum jarðarlitum og flísar eru á gólfum. Alls staðar er flatskjársjónvarp með gervihnattarásum, sími, vifta í lofti og vel útbúinn eldhúskrókur með ísskáp, örbylgjuofni, brauðrist, hraðsuðukatli og kaffivél auk tilheyrandi áhalda. Öryggishólf er gegn gjaldi. Á baðherbergjum er hárþurrka. Í Premier-hýsum er að auki loftkæling, baðsloppar, inniskór og baðvörur. Í svokölluðum Kids Suites eru litirnir líflegri, þar er loftkæling og þeim fylgja leikföng, barnastólar, pelahitari og Playstation 2. Þráðlaus nettenging er á öllu hótelinu.

Morgunverðarhlaðborð er í veitingasal og þar er einnig hlaðborð í hádegi og á kvöldin. Þemað í matargerðinni er mismunandi eftir kvöldum. Snarl, kaffi og kökur fást þar yfir daginn. Sundlaugarbarinn býður upp á svalandi drykki allan daginn og við hlið hans er tapasbar með úrvali smárétta. Á kokteilbarnum fæst að sjálfsögðu úrval ljúffengra kokteila.

Hótelgarðurinn er gróinn og þar eru fjórar sundlaugar, tvær ætlaðar fullorðnum, við aðra er nuddpottur, og tvær börnum, þar af önnur með rennibrautum og leiksvæði. Sólbaðsaðstaðan er góð með bekkjum og sólhlífum. Krakkaklúbbur er starfræktur og starfsfólk sér um afþreyingu fyrir börn jafnt sem fullorðna frá morgni og langt fram á kvöld. 

Líkamsræktaraðstaðan er lítil en ágæt. Hægt er að panta nudd, bæði inni og undir beru lofti, vaxmeðferðir og hársnyrtingu. 

Gestamóttakan er opin allan sólarhringinn. Þar er töskugeymsla, bíla- og hjólaleiga og sjálfsafgreiðsluþvottahús með þvottavélum og þurrkurum. 

HD Parque Cristobal er á frábærum stað í hjarta Amerísku strandarinnar. Verslanir, veitinga- og skemmtistaðir eru í götunum í kring og einungis 200 metrar á ströndina þar sem nóg er um vatnasport og aðra afþreyingu. Siam Park vatnagarðurinn er í 10 mínútna fjarlægð og stutt er í næsta golfvöll. 

Fáeinum dögum eftir að bókun hefur verið gerð er hægt að fara inn á heimasíðu hótelsins, innrita sig og óska eftir ákveðnu húsi. Nauðsynlegt er að slá inn bókunarnúmer og brottfarardagsetningu. Athugið að þetta er einungis ósk og hótelið áskilur sér rétt til þess að færa gesti án fyrirvara.

Fjarlægðir

  • Flugvöllur: 19 km
  • Miðbær: Í hjarta Amerísku strandarinnar
  • Veitingastaðir: Á hótelinu og allt um kring
  • Strönd: 200 m í strönd

Aðstaða

  • Sundlaug
  • Skemmtidagskrá
  • Veitingastaðir
  • Bar
  • Barnadagskrá
  • Barnaleiksvæði
  • Barnasundlaug
  • Gestamóttaka
  • Líkamsrækt
  • Lyfta
  • Nettenging
  • Íbúðir: Smáhýsi
  • Heilsulind: Hægt að panta nudd, bæði inni og undir beru lofti, vaxmeðferðir og hársnyrtingu.

Vistarverur

  • Sjónvarp
  • Vifta
  • Kaffivél
  • Ísskápur
  • Hárþurrka
  • Öryggishólf: Gegn gjaldi
  • Loftkæling: Í premium - hýsum

Fæði

  • Allt innifalið
  • Hálft fæði
  • Morgunverður
  • Án fæðis