Hagnýtar upplýsingar

FLUGVÖLLUR:

Madeira airport (FNC)

FLUG: 

Flogið með Icelandair í beinu leiguflugi og tekur flugið u.þ.b. 4 1/2 klst.

FARANGUR: 

Leyfilegt er að taka með eina 23 kg tösku á mann og handfarangur skv. reglum Icelandair.

AKSTUR: 

Hægt er að bóka akstur til og frá flugvelli og þarf að greiða fyrir það sérstaklega. Frá flugvellinum til miðborgarinnar er 20  - 30 mínútna akstur.

GISTINÁTTASKATTUR

Athugið að greiða þarf gistináttaskatt 2 EUR á mann á nótt, mest rukkað fyrir 7 nætur og greitt beint til hótelsins. Börn undir 12 ára greiða ekki gistináttaskatt. 

TÍMAMISMUNUR: 

Frá  31. mars til 27. október er klukkan á Madeira einum tíma á undan klukkunni á Íslandi. Frá 28. október  - 30. mars er Maderia á sama tíma.

BÓLUSETNINGAR

Við ráðleggjum farþegum að hafa samband við sinn heimilislækni eða heilsugæslustöð varðandi hvort bólusetninga sé þörf. Einnig er hægt að hafa samband við Ferðavernd, Læknasetrinu í Mjódd, Þönglabakka 1, sími 535-7700
Athugið að ef bólusetningar er þörf getur þurft að gera hana tímanlega fyrir brottför.

GREIÐSLUKORT: 

Lang flestar búðir og veitingastaðir taka öll helstu kreditkort. Ekki er hægt að treysta því að hægt sé að greiða fyrir vöru eða þjónustu með debetkorti, en að sjálfsögðu er hægt að taka pening út úr hraðbönkum, hvort sem er út á kredit- eða debetkort. Nota þarf PIN-númer á allar greiðsluvélar. Þetta á við bæði um verslanir og veitingastaði.

SAMGÖNGUR:

Fyrir þá sem ekki vilja ganga eru leigubílar á hverju strái.

VATN:

Kranavatnið er í góðu lagi og flestir drekka það en sumir kjósa flöskuvatn.

ÞJÓRFÉ:

Það er ekki nauðsynlegt að skilja eftir þjórfé en þó er það oft gert. Á dýrari veitingastöðum tíðkast þó að greiða 10%.

TRYGGINGAR: 

Öllum ferðalöngum er ráðlagt að fara vel yfir sínar tryggingar áður en lagt er af stað í ferðalag og kaupa sérstaka ferðatryggingu sé hún ekki þegar innifalin

Skoðunarferðir

Bæjarferð í Funchal og Monte

Hvernig væri að leyfa sálinni að lenda og kanna í rólegheitum næsta nágrenni? Ökum fyrst upp á Pico dos Barcelos þar sem við njótum frábærs útsýnis yfir vesturhlíðar Funchal og út á haf. Höldum síðan upp í fjöllin að hreint mögnuðum útsýnisstað, Eira do Serrado, þar sem sést niður í víðfrægan Nunnudalinn, Curral das Freiras. Því næst er haldið upp til litla þorpsins Monte og þar er hægt að rölta um í fallegum almenningsgarði og tölta upp ótaldar tröppur að Frúarkirkjunni þar sem síðasti keisari Austurríkis, Karl 2., liggur grafinn. Til baka til Funchal má annað hvort fara akandi eða bruna niður í bæ með Toboggan körfusleðum (ekki innifalið í verði), ýtt áfram og stjórnað af tveimur herramönnum sem eru gjarnan klæddir í hvít bómullarföt og með stráhatt. Í lok ferðar heimsækjum við litríkan Bændamarkaðinn í Funchal þar sem bændur og búalið alls staðar að af eyjunni bjóða afurðir sínar til sölu, m.a. grænmeti, ávexti, fisk og blóm, og að lokum er litið inn í  Vínkjallara og bragðað þar á guðaveigum ef svo ber undir. Undir vissum kringumstæðum þarf að breyta röð viðkomustaða.

Verð: 8.900 kr
Ferðin tekur 6 klst.
Innifalið: Akstur, vínsmökkun (3 tegundir af madeira og hungangskökubiti) og íslensk fararstjórn. 

Bela Madeira - Ógleymanleg dagsferð um eyjuna

Sláið tvær flugur í einu höggi og takið þátt í því ævintýri að fá að kynnast því besta sem Madeira hefur upp á að bjóða; töfrum vestur- og austurhlutans á einum degi. Eyjan er ósvikin náttúruperla: Fjölskrúðugt gróðurfar og aldingarðar, fagrar klettamyndanir, skógivaxin fjöll og friðsælir fiskimannabæir gleðja augu og anda. Við ökum fyrst vestur með suðurströndinni með sykurreyr, vínvið og bananaplöntur á báðar hendur. Eftir glæsilegt útsýnisstopp á hæsta sjávarhöfða á eyjunni, Cabo Girão, höldum við í norðurátt til Porto Moniz, stærstu hafnar á norðurhluta eyjarinnar þar sem finna má náttúrulegar baðlaugar. Þar gerum við stuttan stans en höldum svo í austurátt eftir vogskorinni norðurströndinni. Við ökum m.a. fram hjá fallegu litlu þorpi sem kennt er við þjóðardýrling Portúgala, heilagan Vincent. Þar rís klettur með Maríukapellu á, helgaðri undrinu í Fatima 1917. Í bænum Santana, aðeins austar, snæðum við hádegisverð. Eftir mat bíður okkar aðalaðdráttarafl bæjarins; gömul myndræn timburhús með stráþökum sem ná niður á jörð. Á leiðinni til baka til Funchal æjum við á náttúruverndarsvæðinu Ribeiro Frio (Kaldá), sem skartar innlendum plöntum og lárviðarskógi.

Verð: 13.900 kr
Ferðin tekur 8 klst
Innifalið: Akstur, hádegisverður og íslensk fararstjórn.

Paradísardalurinn, hálfsdagsgönguferð

Í þessari ljúfu ferð könnum við magnaðan stað á Madeira sem aðeins fáir þekkja. Hér gefst einnig kjörið tækifæri til að ganga meðfram Levada, áveitukerfi eyjarskeggja, sem er einstakt í sinni röð. Á u.þ.b. tveggja tíma rölti eftir þægilegum göngustíg drögum við að okkur ilminn af safaríkum gróðri í gullfallegu dalverpi með útsýni til sjávar og sveitar. Hvergi eru sneiðingar eða þverhnípi á leiðinni. Þessi ferð er upplagt tilefni til að snúa hjóli tímans aftur á bak og kynnast töfrum veraldar sem var á Madeira og njóta útskýringa innfæddra á mannlífi, viðartegundum og villijurtum. Í lok göngu erum við boðin velkomin í fjölskyldurekið tehús með skínandi útsýni yfir nágrennið. Þar verður boðið upp á alls kyns kræsingar úr framleiðslu gestgjafanna: heimabakað brauð úr sætum kartöflum, heimalagaða sultu og hunang, ljúffengt bakkelsi húsmóðurinnar og ávexti úr heimagarðinum þar sem einnig vaxa lækningagrös. Kaffi eða te úr blómjurtum staðarins fylgir að sjálfsögðu með. Þessi upplifun með heimafólki í ekta umhverfi líður seint úr minni.

Verð: 7.500 kr
Gangan er ca 2 tímar
Innifalið: Akstur, kaffi og kökur og íslensk fararstjórn. 

Kvöldverður að hætti Madeira búa

Kvöldverð, sem snæddur er á dæmigerðum Madeira veitingastað, ætti enginn að láta fram hjá sér fara. Aðalrétturinn er hátíðarmatur Madeiringa, Espetada nautakjötsbitar, þræddir upp á tein og grillaðir yfir opnum eldi. Ýmiskonar meðlæti fylgir, m.a. maískaka, salat og heimabakað brauð og drykkir eru innifaldir. Meðan á máltíð stendur munu innfæddir dansa þjóðdansa og þér verður ef til vill boðið að taka þátt.

Verð: 9.900 kr
Ferðin tekur 3 klst.
Innifalið: Akstur, kvöldverður og danssýning. 
Madeira vín í fordrykk, vatn og glas af hvítvíni eða rauðvíni með matnum og kaffi og Poncha líkjör eftir mat.

Þriggja tíma sigling á rennilegri „tvíbytnu“ - Magic Dolphin

Farkostur okkar er lúxus-seglbátur með tveimur skrokkum sem tengjast með þverbitum. Siglt er spölkorn á haf út undan suðurströnd Madeira, kannski í fylgd með ærslafengnum og forvitnum höfrungum. Á ströndinni trónir Capo Girão sem heimamenn telja hæsta sjávarhamar í heimi. Við sleikjum sólskinið og slökum á meðan báturinn líður áfram á mjúkum öldum að valinni legu þar sem tækifæri gefst til að busla í sjónum, ef veður leyfir. En auðvitað má líka láta fara vel um sig í forsælu um borð í þessari fallegu fleytu. Eftir skemmtilega sjóferð er aftur lagst að bryggju í Funchal.

Verð: 7.900 kr
Ferðin tekur ca 3 klst
Innifalið: Akstur og sigling. 

Jeppasafarí, hálfsdagsferð

Þeir sem skella sér í ævintýralegt jeppasafarí um austurhluta Madeira fá sannarlega eitthvað fyrir sinn snúð. Fyrsti viðkomustaður er Machico þar sem portúgalskir sæfarar stigu á land á óbyggðri eyjunni 1420 og mörkuðu þar með upphaf landafundatímabilsins, stórveldistímans í sögu Portúgals. Síðan liggur leiðin eftir steinilögðum og grónum götum utan alfaravega. Í bröttum hlíðunum kúra gömul og gleymd þorp þar sem sum húsin standa langt frá þjóðvegum og þorpsverslunum og tíminn hefur staðið kyrr. Á torfærari leiðum að útsýnisstaðnum Portela er ekið í gegnum skóglendi sem er á heimsminjaskrá UNESCO. Í brugghúsinu í Porto da Cruz má dreypa á ýmsum afbrigðum af eldvatni eyjarskeggja sem heimamenn kalla romm. Það er eimað úr safa sykurreyrsins og uppistaða í „poncha“-líkjörnum, þeim frægasta á Madeira. Síðasta stopp verður við Ponta do Rosto með fallegu útsýni yfir klettavík á austasta tanga Madeira, São Lourenço. Þaðan sést vel til eyðieyja, Desertas, og einnig til eyjarinnar Porto Santo eða helgu hafnar, 40 km í burtu.    

Verð: 7.900 kr
Ferðin tekur 4 klst

Flogið með Icelandair

Afþreyingarkerfi um borð

Styttu þér stundir á leiðinni með bíómyndum, tónlist, eða þættinum sem þig langaði alltaf að sjá. Gæði og úrval fyrir alla aldurshópa. Í afþreyingarkerfinu geturðu horft á yfir 600 klukkustundir í formi nýrra og klassískra kvikmynda, sjónvarpsþátta og heimildarmynda og að auki geturðu hlustað á innlenda og erlenda tónlist. Þú ræður hvað þú horfir á því hver og einn hefur snertiskjá fyrir framan sig.

Á ferð með Icelandair VITA nýtur þú afþreyingar og frábærrar þjónustu Icelandair alla leið til Madeira og aftur á leiðinni heim.

Þitt sæti - þitt ferðalag

Þú getur valið þitt sæti um borð í vélum Icelandair þegar þú ferðast með Icelandair VITA. Hafðu ferðalagið eins og þú vilt hafa það.

Nýttu og njóttu Vildarpunkta

Hjá Icelandair VITA geta félagar í Icelandair Saga Club bæði safnað og notað Vildarpunkta þegar ferðast er í leiguflugi. 

Wi-Fi um borð

Nú er hægt að tengjast þráðlausu Interneti í vélum Icelandair. Tengst er í gegnum gervihnött og því má búast við því að hraðinn sé svipaður og þegar 3G er notað á jörðu niðri. Tengingin er virk allt flugið, frá því að þú sest í sætið þitt og þar til þú gengur frá borði. Tengingin hentar vel til að skoða tölvupóst, vafra um vefinn og skoða samfélagsmiðla en ræður því miður illa við að streyma myndböndum eða vinnslu í gegnum VPN tengingu. Hægt er að kaupa aðgang að tengingunni um borð. Þeir farþegar sem eru bókaðir á Saga Premium eða eru Saga Club Gold meðlimir fá fría tengingu fyrir tvö tæki. Það er einfalt að tengjast þráðlausa netinu. Stilltu tækið á flugstillingu og virkjaðu svo Wi-Fi. Veldu "Icelandair Internet Access". Opnaðu vafra að eigin vali og veldu “Get Wi-Fi” til að fara í netgáttina og greiða fyrir tenginguna.
Nánari upplýsingar um virkni Wi-Fi tengingarinnar um borð má finna í Stopover Magazine